ނޫސްވެރިޔާ އަހްމަދު ރިލްވާން (ކ) އާއި ބްލޮގަރު ޔާމީން ރަޝީދު.
ރިލްވާން އާއި ޔާމީންގެ މަރު: ދައުވާ ބޭރުކޮށްލި މައްސަލަ އިސްތިއުނާފް ނުކުރަން ނިންމައިފި
ނޫސްވެރިޔާ އަހްމަދު ރިލްވާން އާއި ބްލޮގަރު ޔާމީން ރަޝީދުގެ މަރާ ގުޅިގެން ދައުވާ އުފުލާފައިވާ ތިން މީހުންނާ ދެކޮޅަށް އެކަށީގެންވާ ހެކި ނެތް ކަމަށް ބުނެ ދައުވާތައް ބޭރުކޮށްލަން ކްރިމިނަލް ކޯޓުން ނިންމި ނިންމުން އިސްތިއުނާފް ނުކުރަން ޕްރޮސެކިއުޓަ ޖެނަރަލް (ޕީޖީ)ގެ އޮފީހުން މިއަދު ނިންމައިފި އެވެ.
ވީ ކިހިނެއް؟ - ކުރީގެ ރައީސް އިބްރާހިމް މުހައްމަދު ސޯލިހް އެކުލަވާލެއްވި މަރު ކޮމިޝަނުން ތަހުގީގު ކުރަމުން އަންނަ، މިނިވަން ނޫހުގެ ނޫސްވެރިޔާ ރިލްވާން ގެއްލުވާލުމާއި ބްލޮގަރު ޔާމީން މަރާލުމުގެ މައްސަލާގައި މިދިޔަ އަހަރުގެ 26 ޖޫންގައި ހައްޔަރުކޮށް، ޖެހިގެން އައި 1 ސެޕްޓެމްބަރުގައި ތިން މީހެއްގެ މައްޗަށް ދައުވާ އުފުލި އެވެ. އެއީ:
-
އަހުމަދު އިސްމާއިލް (އަހަނދު)، މއ. ފާގަފިލާގެ، 39 - ޓެރަރިޒަމްގެ އަމަލެއް ކުރުމަށް އެހީތެރިވުން އަދި ޓެރަރިޒަމްގެ އަމަލެއް ކުރުމަށް ރޭވުން
-
އިސްމާއިލް އަބްދުއްރަހީމް އާދަމް (އިސޫ)، މ. ލެގޫންވިއު، 30 - ޓެރަރިޒަމްގެ އަމަލެއް ކުރުމަށް އެހީތެރިވުމުގެ ދެ ދައުވާ
-
އަހްމަދު މުއާޒު (ގަޓު މުއާ)، މާލޭ ދަފްތަރު އާރުއެސް 8499، 40 - ޓެރަރިޒަމްގެ އަމަލެއް ކުރުމަށް ރޭވުން
މި ތިން މީހުން ވެސް މިފަހުން ޓެގު އެޅުވުމަށް ފަހު ގޭބަންދަށް ދޫކޮށްލައިފައި ވަނިކޮށް، އެ އެންމެންގެ މައްޗަށް އުފުލާފައިވާ ދައުވާތައް މަަދަނީ މިންގަނޑުން ކުރިއަށް ގެންދެވޭތޯ ބެލިއިރު، އެކަށީގެންވާ ހެކި ނެތް ކަމަށް ބުނެ، މި މައްސަލަ ބެއްލެވި ގާޒީ މިސްބާހު މުހައްމަދު މިހާރު ވަނީ ދައުވާތައް ބާތިލުކުރައްވައި މައްސަލަ ބޭރުކޮށްލައްވާފަ އެވެ.
-
އިތުރަށް ކިޔާލަން - ޔާމީން، ރިލްވާން މަރު: އެންމެންގެ ދައުވާ ބޭރުކޮށް، މިނިވަންކޮށްފި
ބުނީ ކީކޭ؟ - ޕީޖީ އޮފީހުގެ ތަރުޖަމާނު އަހްމަދު ޝަފީއު 'ދައުރު'އަށް ވިދާޅުވީ، ކްރިިމިނަލް ކޯޓުގެ އެ ނިންމުންތައް އިސްތިއުނާފް ނުކުރާނެ ކަމަށެވެ. އެކަމަކު އެކަމާ ގުޅޭ ގޮތުން އިތުރު އެއްޗެއް އޭނާ ވިދާޅެއް ނުވެ އެވެ.
ތަފްސީލް - ސިއްރުކޮށްގެން ވަކިވަކިން ކުރިއަށް ގެންދިޔަ އެ މައްސަލާގައި:
-
އަހުމަދު އިސްމާއިލްގެ މައްޗަށް ދައުލަތުން ކުރި ދައުވާތައް ކުރިއަށް ގެންދެވޭ ވަރަށް ހެކި ނެތިގެން ދައުވާތައް ބާތިލުކޮށް މިިނިވަންކުރީ މިދިޔަ މަހުގެ 12ގައި
-
އިސްމާއިލް އަބްދުއްރަހީމް އާދަމް އަދި އަހުމަދު މުއާޒުގެ މައްޗަށް ދައުލަތުން ކުރި ދައުވާތައް ކުރިއަށް ގެންދެވޭ ވަރަށް ހެކި ނެތިގެން ދައުވާތައް ބާތިލުކޮށް މިނިވަންކުރީ އިއްޔެ
ފާހަގަކޮށްލެވޭ ކަމެއް - އެކަށީގެންވާ ހެކި ނެތް ކަމަށް ބުނެ ރިލްވާން އާއި ޔާމީންގެ މަރުގެ ތުހުމަތުގައި ހައްޔަރުކޮށް ބޮޑެތި ދައުވާތަކެއް އުފުލާފައިވާ އެންމެން މިނިވަން ކުރިއިރު، މި މަރަށް އިންސާފު ހޯދައިދިނުމަކީ ނިމިދިޔަ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
އެކަމަކު އެ މަނިކުފާނުގެ ވެރިކަމުގެ ފަހުކޮޅު، ތުހުމަތުކުރެވޭ މި އެންމެންގެ ފައިގައި ޓެގު އެޅުވުމަށް ފަހު، މިނިވަންކޮށްފައިވެ އެވެ. ގޮތް ނޭނގޭ މަރުތައް ތަހުގީގުކުރުމަށް އެ މަނިކުފާނުގެ ވެރިކަމުގެ ފުރަތަމަ ދުވަހު މަރު ކޮމިޝަނެއް އުފެއްދެވި އެވެ. މި މައްސަލަ އަކީ އެ ކޮމިޝަނުން ތަހުގީގުކޮށް، ދައުވާކުރަން ފޮނުވި ފުރަތަމަ މައްސަލަ އެެވެ.
ރިލްވާންގެ މަރުގެ މައްސަލަ:
މި މައްސަލާގައި ހިމެނޭ ރިލްވާންގެ މަރުގެ ތަހުގީގީ ރިޕޯޓު މިދިޔަ އަހަރުގެ 15 ޑިސެމްބަރުގައި ރައީސް ސޯލިހަށް އަރުވާފައި ވާއިރު، މި ރިޕޯޓު އާންމުކޮށްފައެއް ނުވެ އެވެ. އެކަމަކު އެ ފަހަރު އެ ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ، ދައުވާ ކުރަން ފޮނުވާފައިވާ އެންމެންގެ މައްޗަށް ކުށް ސާބިތުވާ ވަރުގެ ހެކިތައް އެ ރިޕޯޓަށް ހޯދިފައިވާ ކަމަށެވެ.
ކޮމިޝަނުން އެ ދުވަހު ބުނި ގޮތުން:
-
10 އޮގަސްޓް 2014ގެ ރޭގަނޑު 10 އިން ފެށިގެން ބަޔަކު ރިލްވާންއަށް ފާރަލަމުންދިޔަ
-
ދެ މީހަކު ވެގެން ގަދަކަމުން ރިލްވާން ކާރަކަށް އެރުވީ އޭނާ ގެއަށް ދިޔަ މަގުމަތީ ހުޅުމާލެއިން؛ އެ ކާރުގައި ތިން މީހުން ތިބިއިރު، ކާރުގެ ފަހަތުން ތިން މީހަކު ސައިކަލުގައި ދިޔަ
-
ކާރުގައި ގަދަކަމުން ގެންގޮސް ދެން ރިލްވާން އަރުވާފައިވަނީ ޑިންގީއަކަށް؛ ޑިންގީގައި ގެންގޮސް ކަންނެލި ދޯންޏަކަށް އަރުވައި ޝަހާދަތުގެ ކަލިމަ އޭނާއަށް ލައިދީ، އޭނާގެ ކަރު ބުރިކޮށް، މަރާލުމަށް ފަހު ކަނޑުފައްތާފައިވޭ
-
ކޮމިޝަނުން ބުނި ގޮތުން، އެކަން ކުރީ ހަ މީހެއް؛ އެ ހަ މީހުން ވެސް ސީރިއާގައި މަރުވެފައިވާ ކަމަށް މައުލޫމާތު ލިބިފައިވޭ
-
ރިލްވާން ގެއްލުވާލުމުގެ ކުރިން އެތައް ބަޔަކަށް އިންޒާރުދީ، ރިލްވާންގެ މައުލޫމާތު ހޯދުމަށް ވެސް އެތައް ދުވަހެއް ވަންދެން އެ މީހުން މަސައްކަތްކޮށްފައިވޭ
-
އެކަން އޭރު ފުލުހުންނަށް ވެސް އެނގޭ ކަމަށާއި ވަކި މަގުސަދެއް އޮވެގެން ބަޔަކު "ސީދާ މަރަން ނުވަތަ ހުއްޓުވަން" ނުކުމެ އުޅޭ ބަޔަކު އުޅޭ ކަމުގެ ސާފު މައުލޫމާތު ފުލުހުންނަށް ލިބެމުންދިޔަ
ގުޅުން ހުރި ކަމެއް - ރިލްވާން މަރާލި މައްސަލައިގައި ދެ މީހެއްގެ މައްޗަށް ޓެރަރިޒަމްގެ ދައުވާ ކުރިން ވެސް އުފުލި އެވެ. އެ ދެ މީހުންގެ މައްޗަށް ވެސް ކުށް ސާބިތުނުވާ ކަމަށް 2018ގައި ހުކުމްކުރިއިރު، އެ ހުކުމް ވެސް އިސްތިއުނާފްކޮށްފައެއް ނުވެ އެވެ.
ޔާމީންގެ މަރުގެ މައްސަލަ:
-
2017 ވަނަ އަހަރު އަނިޔާވެރި ގޮތަކަށް މަރާލި ބްލޮގަރު ޔާމީންގެ މައްސަލައިގައި ހަ މީހެއްގެ މައްޗަށް ކުރިން ދައުވާ އުފުލި
-
އެ މީހުންގެ ތެރެއިން ދައުވާ ސާބިތުވީ އެންމެ ދެ މީހުންގެ މައްޗަށް
-
އަނެއް ދެ މީހުންގެ މައްޗަށް ކުށް ސާބިތު ނުވާ ކަމަށް މިދިޔަ އަހަރުގެ ޖެނުއަރީ މަހު ކޯޓުން ނިންމުމުން، ޕީޖީން ވަނީ އެ މައްސަލަ އެ އަހަރުގެ އޭޕްރީލްގައި ހައި ކޯޓުގައި އިސްތިއުނާފްކޮށްފައި