ރިލްވާންގެ މައްސަލައިގައި ޕާސްޕޯޓު ހިފެހެއްޓި ހަސަން އަލީއަށް ޑެޕިއުޓީ މިނިސްޓަރުކަން ދީފި

ނޫސްވެރިޔާ އަހްމަދު ރިލްވާން ގެއްލުވާލި ފަހުން، 2014 ވަނަ އަހަރު ތެރޭ އޭނާ ރާއްޖެއިން ބޭރަށް ފުރިކަމަށް ދެއްކުމަށް ފޭކް ލިޔުމެއް ތައްޔާރު ކުރި ކަމަށް ތުހުމާތުކުރެވޭ، އިމިގްރޭޝަން ކޮންޓްރޯލަރުގެ މަގާމުގައި ހުންނެވި ހަސަން އަލީއަށް މި ސަރުކާރުގެ އިސް މަގާމެއް ދީފި އެވެ.

ވީ ކިހިނެއް؟ - ރައީސް އޮފީހުގެ ވެބްސައިޓުގައިވާ ގޮތުން ހަސަން އަލީ އައްޔަންކޮށްފައިވަނީ ހޯމް ލޭންޑް ސެކިއުރިޓީ އެންޑް ޓެކްނޮލޮޖީގެ ޑެޕިއުޓީ މިނިސްޓަރަކަށެވެ.

ތަފްސީލު - ރައީސް މުހައްމަދު މުއިއްޒުގެ ސަރުކާރުގެ 21 މިނިސްޓްރީގެ ތެރެއިން އެންމެ ޒިންމާތައް ބޮޑު މި މިނިސްޓްރީގައި މިހާރު ވެސް 15 ޑެޕިއުޓީ މިނިސްޓަރުން އެބަތިއްބެވި އެވެ.

އެ މިނިސްޓްރީގެ ޑެޕިއުޓީ މިނިސްޓަރުކަމަށް ހަސަން އަލީ ހަމަޖައްސާފައި ވާއިރު، އެންމެ ފަހުން އޭނާ ހުންނެވީ ހައި ކޯޓުގެ ފަނޑިޔާރު ކަމުގެ މަގާމުގަ އެވެ. 

ފާހަގަކޮށްލެވޭ ކަމެއް - ކުރީގެ ރައީސް އަބްދުﷲ ޔާމީންގެ ސަރުކާރުގައި މާޗު 2018ގައި އެ ކޯޓުގެ ފަނޑިޔާރުކަމަށް އައްޔަން ކުރެއްވި ހަސަން އަލީ އެ މަގާމުން އިސްތިއުފާ ދެއްވީ، ރިލްވާންގެ މައްސަލައިގައި އޭނާއަށް މަރު ކޮމިޝަނުން ތުހުމަތުތަކެއް ކުރުމުން، އެކަން ޖުޑީޝަލް ސާވިސް ކޮމިޝަން (ޖޭއެސްސީ)ން ބަލަން ފެށުމާ އެކު އެވެ. ޖުލައި 2020ގައި އޭނާ އެ މަގާމުން އިސްތިއުފާ ދެއްވީ، ޖޭއެސްސީން އޭނާއާ ގުޅޭ ގޮތުން ބެލި އެ މައްސަލައަށް ޖަވާބުދާރީވެވަޑައިނުގަންނަވަ އެވެ.

މަރު ކޮމިޝަނުން ރިލްވާންއާ ގުޅޭ ގޮތުން އެކުލަވާލި ރިޕޯޓުގައިވާ ގޮތުން:

މިކަންކަން މަރު ކޮމިޝަނުން ކަށަވަރުކޮށްފައި ވަނީ، މި މައްސަލައިގައި ހަސަން އަލީ ފުލުހުންނަށް ދީފައިވާ ބަޔާނުން ކަމަށް ވެސް ރިޕޯޓުގައި ފާހަގަކޮށްފައިވެ އެވެ.

އެއާ އެކު، އޭރު އޭނާގެ ޕާސްޕޯޓު ވެސް ހިފެހެއްޓި އެވެ.