މިނިސްޓްރީތަކާއި އެތަނުގެ ސިޔާސީ ބޭފުޅުންގެ އަދަދު މަޖިލީހުން ފާސްކުރާ ގޮތަށް ގާނޫނު އަސާސީއަށް އިސްލާހެއް

ސަރުކާރުގެ މިނިސްޓްރީތަކުގެ އަދަދާއި އެތަންތަނުގެ ސިޔާސީ މަގާމުތަކަށް އައްޔަން ކުރަން ބޭނުންވާ ބޭފުޅުންގެ އަދަދު ރައްޔިތުންގެ މަޖިލީހުން ފާސްކުރާ ގޮތަށް ހެދުމަށް އިދިކޮޅު ޑިމޮކްރެޓްސްގެ ފަރާތުން ގާނޫނު އަސާސީއަށް އިސްލާހު ހުށަހަޅައިފި އެވެ.

ވީ ކިހިނެއް؟ - ގާނޫނު އަސާސީގެ 116 ވަނަ މާއްދާއަށް މި އިސްލާހު ގެނައުމަށް ހުށަހެޅުއްވީ، ގަލޮޅު އިތުރު ދާއިރާގެ މަޖިލިސް މެންބަރު އީވާ އަބްދުﷲ އެވެ. އެ ބިލުގެ ފުރަތަމަ ކިޔުން މިދިޔަ ބުދަ ދުވަހުގެ މަޖިލީހުގެ ޖަލްސާގައި ވަނީ އިއްވައިފަ އެވެ.

ތަފްސީލު - އެ ބިލު މިހާރު މަޖިލީހުގެ ވެބްސައިޓްގައި އާންމުކޮށްފައިވާއިރު، އެ އިސްލާހުގައިވާ ގޮތުން، ސަރުކާރުން އުފެއްދުމަށް ބޭނުންވާ މިނިސްޓްރީތަކާއި އެ މިނިސްޓްރީތަކުގެ މަސްކަތުގެ ދާއިރާ/ މެންޑޭޓް ކަނޑައެޅުމުގެ އިހްތިޔާރު ރައީސަށް ލިބިގެންވެ އެވެ. ނަމަވެސް މިނިސްޓްރީއެއް އުފައްދާ ދުވަހުން ފެށިގެން ހަތް ދުވަހުގެ ތެރޭގައި އެ މިނިސްޓްރީތަކުގެ އަދަދާއި އެތަންތަނުގެ މަސައްކަތުގެ ދާއިރާތައް މަޖިލީހުން ފާސް ކުރުމަށް ރައީސް ހުށަހަޅަންވަން ޖެހޭ ގޮތަށް އެ އިސްލާހުގައި ބަޔާންކޮށްފައިވެ އެވެ.

އޭގެ އިތުރުން މިނިސްޓްރީތައް އުފައްދާ ތާރީހުން ފެށިގެން ދެ ހަފްތާގެ މުއްދަތެއްގެ ތެރޭގައި އެ މިނިސްޓްރީތަކުގެ މަސައްކަތްތަކަށް ބޭނުންވާ ސިޔާސީ މުވައްޒަފުންގެ އަދަދު، ރައީސް ރައްޔިތުންގެ މަޖިލީހަށް ހުށަހަޅައި، މަޖިލީހުން ފާސްކުރަން ވާނެ ކަމަށް ވެސް ބަޔާންކޮށްފައިވެ އެވެ.

މި އިސްލާހުތަކަށް އަމަލުކުރަން އޮތީ، ބިލު ފާސްވެ، ރައީސް ތަސްދީގުކުރުމާ އެކު ސަރުކާރުގެ ގެޒެޓްގައި ޝާއިއު ކުރާ ދުވަހުން ފެށިގެންނެވެ.

ގާނޫނު އަސާސީގެ 116 ވަނަ މާއްދާ މިހާރު އޮންނަ އޮތުން، މިނިސްޓްރީތަކުގެ އަދަދާއި އެތަންތަނަށް އައްޔަން ކުރާ ސިޔާސީ ބޭފުޅުންގެ އަދަދު މަޖިލީހުން ފާސް ކުރާކަށް ނުޖެހެ އެވެ. އެ މާއްދާގައި މިހާރު އޮންނަނީ، ހަމައެކަނި މިނިސްޓްރީތަކުގެ މެންޑޭޓަށް ގެންނަ ބަދަލުތައް މަޖިލީހުން ފާސް ކުރުމެވެ.

ފާހަގަކޮށްލެވޭ ކަމެއް - ރައީސް މުއިއްޒު 17 ނޮވެމްބަރު 2023ގައި ވެރިކަމާ ހަވާލުވެވަޑައިގެން އެކުލަވާލި ކެބިނެޓްގައި ބަންޑާރަނައިބާ އެކު 22 މިނިސްޓަރުން ތިއްބަވަ އެވެ. މިއީ، މިހާތަނަށް އެކުލަވާލި އެންމެ ބޮޑު ކެބިނެޓެވެ. އަދި އެ މިނިސްޓްރީތަކަށް އިންތިހާއަށް ސިޔާސީ ބޭފުޅުން އައްޔަން ކުރަމުންދާތީ ބައެއް ފަރާތްތަކުން އެކަމުގެ ކަންބޮޑުވުން ވެސް ފާޅު ކުރެ އެވެ. 

ރައީސް އޮފީހުގެ ވެބްސައިޓުން ފެންނަނަން ހުރި ސިޔާސީ މަގާމުތައް 300 އަށް ވުރެ ގިނަ އެވެ.

ހަރަދު ކުޑަކުރުމަށް އަޅާ ފިޔަވަޅެއްގެ ގޮތުން ހާއްސަ ހާލަތްތަކުގައި ނޫނީ ސިޔާސީ މަގާމުތަކަށް މީހުން އިތުރަށް އައްޔަން ނުކުރައްވާނެ ކަމަށް ރައީސް މުއިއްޒު ވަނީ މިދިޔަ މަހު މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާނުގައި އިއުލާންކުރައްވައިފަ އެވެ. ނަމަވެސް އޭގެ ފަހުން ވެސް މަގާމުތަކަށް މީހުން އައްޔަންކޮށްފައިވެ އެވެ.

ރިޔާސީ ކެމްޕެއިން ތެރޭ ރައީސް މުއިއްޒު ވައުދުވެވަޑައިގެންނެވީ، ސިޔާސީ މަގާމުތައް 700ގައި ހިފެހެއްޓުމަށެވެ. ނަމަވެސް ބޮޑު މުސާރަ ލިބޭ މަގާމުތައް 300 އަށް އެރުމަކީ އާންމުންނާއި އިދިކޮޅު ފަރާތްތަކުން ކަންބޮޑުވުން ފާޅު ކުރާ ކަމެކެވެ.