އޮލިމްޕިކްސްގައި ދީމާގެ 20 މިނިޓްގެ ފެނިލުން، އެއީ ވެސް ޝަރަފެއް

ރާއްޖޭގެ ޓީޓީ ތަރި ފާތުމަތު ދީމާ އަލީ، ޕެރިސް އޮލިމްޕިކްސްގެ ޓީޓީ މޭޒު ކައިރީގައި މިރޭ ހޭދަކުރީ އެންމެ 20 މިނިޓެވެ. ޕޮލެންޑްގެ ކަޓަޒިނާ ވެގްޒިންއާ ދެކޮޅަށް މާ ބޮޑު ވާދައެއް ނުކުރެވުނު ނަމަވެސް ދީމާއަށާއި ދިވެހިންނަށް ވެސް އެ މެޗަކީ ޝަރަފެކެވެ.

ދުނިޔޭގެ އެންމެ މޮޅު ކުޅުންތެރިން ވާދަކުރާ މުބާރާތުގެ ޕްރިލިމިނަރީ ބުރުގައި އުމުރުން އެންމެ 16 އަހަރުގެ ދީމާ، 23 އަހަރުގެ ކަޓަޒިނާ އަތުން ބަލިވީ 11-5 ،11-5، 11-2، 11-8 އިންނެވެ. މުޅި މެޗަށް ހޭދަވީ 20 މިނިޓެވެ.

ސީދާ ކޮލިފައިވެގެން އޮލިމްޕިކްސްއަށް ދިޔަ ފުރަތަމަ ދިވެހި ކުޅުންތެރިޔާ/އެތުލީޓުގެ ގޮތުން ތާރީހުން ޖާގަ ހޯދި ދީމާ އޮލިމްޕިކްސްގެ ޓީޓީގައި ރާއްޖެ ތަމްސީލްކުރުމަކީ ވެސް ގިނަ ދިވެހިންނަށް ބޮޑު އުފަލެކެވެ. ސޯޝަލް މީޑިއާގައި އެކި މީހުން އަންނަނީ އެކަން ފާހަގަކުރަމުންނެވެ.

ރައީސް މުހައްމަދު މުއިއްޒު ކުރެއްވި ޓްވީޓެއްގައި ވިދާޅުވީ "ތިޔަ ހިތްވަރާއި މޮޅު ކުޅުމަށް މުޅި ގައުމު ފަހުރުވެރިވާ" ކަމަށެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ އަނބިކަނބަލުން ފަޒްނާ އަހުމަދު، އެކަމަނާގެ ފޭސްބުކްގައި ދީމާ ސިފަކުރެއްވީ 'ހިތްވަރެއް'ގެ ގޮތުގަ އެވެ.

"ކޮންމެ ކަމެއް ވެސް ކުރެވިދާނެކަމަށް ގަބޫލުކޮށް، ތިބާ ކަހަލަ އެހެން އަންހެން ކުދިންނަށް ހިތްވަރަކަށް ވީތީ ދީމާއާ މެދު އަހަރެން ފަހުރުވެރިވަމެވެ،" ފަޒްނާ، އިނގިރޭސި ބަހުން، ލިއުއްވި އެވެ.

ފަޒްނާ ވިދާޅުވީ މިހާރަށް ވުރެ ވަރުގަދަކޮށް ކުރިއަށް އޮތް ތަނުގައި ދީމާ ފެންނާނެ ކަމަށެވެ.

ފަޒްނާގެ އެ ޕޯސްޓްގައި ވަނީ ދީމާ ކުޅޭތަން ބައްލަވަން ސޯލިހު އިށީނދެވަޑައިގެން އިންނަވަނިކޮށް ނެންގެވި ކުރު ވީޑިއޯއެއް ވެސް ހިމަނުއްވައިފަ އެވެ.

ބައެއް އެހެން މީހުން ވެސް ދީމާއަށް ކުރީ ތައުރީފެވެ. އެގޮތުން އިގުތިސާދާއި ވިޔަފާރީގެ ދާއިރާގެ ތަޖުރިބާކާރެއް ކަމަށްވާ އިބްރާހިމް އާތިފް ޝަކޫރު އޭނާގެ ފޭސްބުކްގައި ލިއުއްވީ 'މެޗު ބެލީ ފަހުރުވެރިކަމާ އެކުގައި' ކަމަށެވެ. ކުރިއަށް އޮތް ތަނުގައި ދީމާ މިހާރަށް ވުރެ ވެސް ރަނގަޅުވާނެ ކަމަށް، އޭނާ ވެސް ލަފާކުރެއްވި އެވެ.

އޮލިމްޕިކްސްގައި ފުރަތަމަ ފަހަރަށް ކުޅުނު ދީމާ ކޮލިފައިވީ ސައުތު އޭޝިއާގައި ބޭއްވި ކޮލިފިކޭޝަންގައި އަންހެން ބައިން ޗެމްޕިއަންކަން ހޯދައިގެންނެވެ. އެހެންކަމުން އޭނާއަކީ އޮލިޕިކްސްގެ ކޮލިފިކޭޝަން ބުރެއް ކާމިޔާބުކޮށްގެން ޖާގަ ހޯދި ދިވެހި ފުރަތަމަ ކުޅުންތެރިޔާ/އެތުލީޓެވެ.