1،360 ކޭސް ސިނގިރޭޓް ވަގަށް އެ ބޭރުކުރީ ހިލަމެއް ވެސް ނެތި؟

ކީކޭ؟ ދެ ކޮންޓޭނަރުގެ ސިނގިރޭޓް ވަގަށް ނެގީއޭ؟ ކިހިނެއް؟ ނުވާނެ ތެދަކަށް؟

ނޫނެކެވެ. އެއީ ތެދެކެވެ. ގަބޫލުނުކުރެވިގެން ބޯހޫރުވުމުގެ ބޭނުމެއް ނެތެވެ. ގައުމުގައި ވައްކަން އޮތް މިންވަރާއި އެ ވައްކަމުގައި ބޮޑެތި ކުންފުނިތަކުގެ މުވައްޒަފުން ބައިވެރިވާކަން ހިތުގެ އަޑިން ގަބޫލުކޮށްލަމާ ހިނގާށެވެ.

ހުޅުމާލޭގައި ހުންނަ އެމްޕީއެލްގެ ބަނދަރުގައި، ކަސްޓަމްސްއިން ވަކި ގޮތެއް އަންގަންދެން ހުސްނުކުރެވޭ ގޮތަށް، 40 ފޫޓުގެ ދެ ކޮންޓޭނަރު ބަހައްޓާފައި ހުއްޓެވެ. އޭގެ ތެރޭގައި ހުރީ ވަގަށް އެތެރެކުރަނިކޮށް އަތުލައިގަތް 1،360 ކޭސް ސިނގިރޭޓެވެ.

މި ބޮޑު މަކަރު ފަޅާއަރައިގެން ކަސްޓަމްސްއިން އެ އެއްޗެހި ހިފެހެއްޓީ  މި އަހަރުގެ 26 އެޕްރީލްގަ އެވެ. އެމްޕީއެލްގެ ހުޅުމާލޭ ބަނދަރުގައި އެމްޕީއެލްގެ ބެލުމުގެ ދަށުގައި ދެ ކޮންޓޭނަރު ބެހެއްޓީ އޭގެ ތަހުގީގު ނިމި، ކަސްޓަމްސްއިން ވަކި ފިޔަވަޅެއް އަޅަންދެނެވެ.

ނަމަވެސް މިދިއަ ބުރާސްދުވަހު އެމްޕީއެލްއިން ބުނީ ދެ ކޮންޓޭނަރުގައި ހުރި ސިނގިރޭޓްތައް ގެއްލިއްޖެ ކަމަށެވެ. އެއީ ނުބައި ބުނުމެކެވެ. ގެއްލުނީއެއް ނޫނެެވެ. ވަގަށް ނެގީ އެވެ. ބޮޑު އޮޅުވާލުމެއްގެ ތެރެއިން ބަނދަރުން ނެރެގެން ވަގަށް ގެންދިޔައީ އެވެ.

މިއީ ވީއައިއޭގެ އާ ޓާމިނަލްގެ މަސައްކަތްކުރާ ޗައިނާ ހާބާ އިންޖިނިއަރިން ކޮމްޕެނީގެ ނަމުގައި އެތެރެކުރި ކޮންޓޭނަރުތަކެއްގެ ތެރޭގައި ހިމެނުނު ދެ ކޮންޓޭނަރެވެ. އެކަމަކު މި ބޮޑު ހީލަތުގެ ހަގީގަތް ސަރުކާރުގެ އެއްވެސް އިދާރާއަކުން އަދި ހާމައެއްނުކުރެ އެވެ. ތަހުގީގު ކުރިއަށްދާތާ ހަ މަސް ވަނީ އެވެ. 

މާލޭގެ ވިޔަފާރި ބަނދަރުގައި ކަންކަން ހަމަޖެހިފައި ހުންނަ ގޮތް އެނގޭ ބައެއް މީހުން ބުނީ އެހާ ގިނަ މުދާ ބަނދަރުން ވަގަށް ބޭރުކުރެވޭނެ އޮންނާނީ އެންމެ ގޮތެއް ކަމަށެވެ: އެމްޕީއެލް އާއި ކަސްޓަމްސްގެ އެތެރެއިން ރާވައިގެން އެކަން ހިންގުމެވެ.

އެމްޕީއެލްގެ ވިޔަފާރި ބަނދަރުތަކުގެ ސަލާމަތީ ކަންކަން އެނގޭ މީހަކު، ނަން ނުޖަހާ ގޮތަށް ބުނީ، ބަނދަރުގެ ހުރިހާ ކަމެއް ފެންނަ ގޮތަށް ސީސީޓީވީ ހަރުކޮށްފައި ހުންނަ ކަމަށެވެ.

"ދޮރުން އެތެރެއަށް ވަނުމާ އެކު އެ މީހަކު އުޅޭ ގޮތް އެ ކެމެރާތަކަށް ނާރައެއް ނުހުންނާނެ،" ނަން ނުޖަހާ ގޮތަށް 'ދައުރު'އާ ވާހަކަ ދެއްކި މީހަކު ބުންޏެވެ.

"ދެން ކީއްވެގެންހޭ ދެ ކޮންޓޭނަރު ކަނޑައިގެން އެ ކޭސްތައް ބޭރުކުރި އިރު ކެމެރާއަށް ނާރަންވީ؟"

ދެ ކޮންޓޭނަރު ހުރި ސަރަހައްދުގެ ކެމެރާތައް އެވަގުތު ނިއްވާލުމަކީ އެންމެ ކައިރި ގޮތެވެ.

މި ސިނގިރޭޓް ޝިޕްމަންޓްގެ ޑިއުޓީއަށް ގާތްގަނޑަކަށް 122 މިލިއަން ރުފިޔާ ޖެހެ އެވެ. މިހާ ބޮޑު ޝިޕްމެންޓެއް ވަގަށް ބޭރުކުރުމުގެ އޮޕަރޭޝަންގައި އެމްޕީއެލް އާއި ކަސްޓަމްސްގެ އެތެރެއިން އެހީތެރިކަން ނެތިއެއް ނުދާނެ އެވެ. އެހެންކަމުން މިއީ ދައުލަތުގެ ބޮޑު ދެ އިދާރާއެއްގެ އެތެރޭގެ ހިޔާނާތް މި ވަގުތުން ފެށިގެން ވެސް ބަލަން ދައުލަތުގެ ވެރިންގެ މައްޗަށް ލާޒިމްވާ ބޮޑު ވައްކަމެކެވެ.

މިއީ އަދި ޖަވާބެއް ނެތް ސުވާލެކެވެ. މިހާތަނަށް އެމްޕީއެލްއިން ބުނީ ސިނގިރޭޓް 'ގެއްލުނު' މައްސަލަ ބަލަމުން އަންނަ ކަމަށެވެ. އެމްޕީއެލްގެ އިތުރުން ފުލުހުން ވެސް ތަހުގީގެއް އެބަ ހިންގަ އެވެ.

މިހާތަނަށް އަރާފައި ހުރި އަޑުތަކަށް ބަލާާއިރު އެ ވައްކަން ކުރި ބަޔަކު އެއް ކޮންޓޭނަރުގެ އެެތެރޭގައި ކުރީގެ ރައީސް މައުމޫން އަބްދުލް ގައްޔޫމްގެ ފޮޓޯގަނޑެއް ހަރުކުރި އެވެ. އެއީ އެމަނިކުފާނުގެ ކޮއްކޯފުޅު ކުރީގެ ރައީސް އަބްދުﷲ ޔާމީންއާ ޖެހުނު މައްސަލަގަނޑުގައި ޕީޕީއެމް އޮފީސް ހުސްކުރި އިރު ނެގި ފޮޓޯއެކެވެ. މައުމޫނަށް ނިސްބަތްކޮށް ވަރަށް ހުތުރު ބަސްތައް ފާރުގައި ލިއެފައި ހުއްޓެވެ. އެއިން ފާރެއްގެ ކައިރީގައި ހުންނަވަނިކޮށް ނެގި ފޮޓޯގަނޑުގެ ކޮޕީއެއް ކޮންޓޭނަރުގެ އެތެރޭގައި ތަތްކުރުމުގެ މާނައަކީ 'ކަލޭމެން ދެން ބށ' ބުނުމެވެ. އެހެން ގޮތަކަށް ސިފަކުރާ ނަމަ ދައުލަތުގެ އިދާރާތަކަށް ވަގުން ގޮން ވެސް ޖެހީ އެވެ.

ސިނގިރޭޓްތައް ގެއްލުނީ ކޮން އިރަކުކަން އެނގޭ ބަޔަކު ނެތެވެ. ދެ ކޮންޓޭނަރު ޗެކްކުރީ، ބައެއް އަޑުތަކަށް ބުރަވާ ނަމަ، އޭގައި އެއްވެސް އެއްޗެއް މިހާރު ނުހުންނާނެ ކަމަށް ލިބުނު މައުލޫމާތަކާ ގުޅިގެންނެވެ.

މި ދައްކަނީ ކޮތަޅަކަށް އަޅައިގެން އެއްޗެއް ނެރޭ ވާހަކައެއް ނޫނެވެ. ދެ ކޮންޓޭނަރުގައި އެ ހުރީ 1،360 ކޭހެވެ. އެއީ އޭރު ކަސްޓަމްސް ބުނި ގޮތުގައި ޖުމްލަ 13.6 މިލިއަން ސިނގިރޭޓެވެ.

މިވަރުގެ ގިނަ މުދާތަކެއް ލޮރީއެއްގައި ބަނދަރުން ނެރެން ފުދޭވަރަކަށް ގިނަ މީހުންނާއި މަދުވެގެން ހަތަރު ވަރަކަށް ލޮރީ ވެސް ބޭނުންވެ އެވެ. މީހުންނާއި ތަކެތި ގިނަވި ވަރަކަށް ފަޅާއެރުން ކައިރި އެވެ. އަނެއްކާ މައި ގޭޓުން އެގޮތަށް ނެރުމަކީ ވެސް އެހާ ފަސޭހަ ކަމަކަށް ނުވެދާނެ އެވެ. އެހެންކަމުން 'ދައުރު'އާ ވާހަކަ ދެއްކި ބައެއް މީހުން ބުރަވަނީ  ދޯންޏަކަށް އަރުވައިގެން ބޭރުކުރުން މާ ފަސޭހަވާނެ ކަމަށެވެ.

"އޭރުން އެހާ ގިނަ ބަޔަކު ބޭނުމެއް ނުވާނެ ހުސްކުރާކަށް ވެސް. ފަސޭހައިން އެކަން ކޮށްލެވޭނީ އެހެން ކަމަށް ފެންނަނީ،" އެކަކު ބުންޏެވެ.

ނަމަވެސް އޭރުން ވެސް ކޮންޓޭނަރު ހުޅުވުމާއި އެއިން ސިނގިރޭޓް ކޭސްތައް ނަގާއިރު ކަސްޓަމްސް އާއި އެމްޕީއެލްގެ ކޮންމެވެސް ބަޔަކު ތިބޭނެ ކަމަށް ބަލަމާ ހިނގާށެވެ.  ކަސްޓަމްސްގެ މީހަކު ނެތި އެ އެއްޗެހި ހުޅުވިގެން ނުވާނެ އެވެ. 

ބައެއް މީޑިއާތަކަށް ކަސްޓަމްސްއިން ބުނެފައި ވަނީ ވަގަށް ސިނގިރޭޓް އެތެރެކުރި މައްސަލައިގެ ތަހުގީގު އަދި ނުނިމޭ ކަމަށެވެ.

"ތަހުގީގު އަދިވެސް ކުރިއަށް ދަނީ. އޭގެ ތެެރެއިން ބައެއް ކަންކަން މިހާރު ވާނީ ޕީޖީއާ ހަމައިގައި،" ކަސްޓަމްސްގެ އޮފިޝަލަކާ ހަވާލާދީ 'މިހާރު'އިން ލިއުނެވެ.

އެހެންކަމުން ތަހުގީގު މުޅިން ނިންމައި، އެއާ މެދު ވަކި ގޮތެއް ކަނޑައެޅެންދެން އެ ދެ ކޮންޓޭނަރު ހުޅުވިގެން ނުވާނެ އެވެ. އެކަމަކު އެ އޮތީ ހުޅުވައިގެން ހުސްކޮށްފަ އެވެ.

މިހާ ބޮޑު ވައްކަމަކާ ބެހޭ ގޮތުން ރައްޔިތުންނަށް ޖަވާބުދާރީ ނުވެ ކަސްޓަމްްސް އާއި އެމްޕީއެލް އާއި ފުލުހުން ތިބެގެން ނުވާނެ އެވެ. އަނެއްކޮޅުން އަޑިއަޑިން މިކަން ހިންދާލުމުގެ ފުރުސަތު، މީޑިއާތަކުން ދީގެން ވެސް ނުވާނެ އެވެ. އެ ތިން އިދާރާގެ ވެރިން ރައްޔިތުންގެ ކުރިމައްޗަށް ނުކުމެ، އެ ވައްކަމުގެ ހުރިހާ މައުލޫމާތެއް ހިއްސާކުރަން މަޖުބޫރުކުރަން އެބަ ޖެހެ އެވެ. އެހެން ނޫނީ މިކަހަލަ ބޮޑެތި ވައްކަމާއި މަކަރާއި ހީލަތާއި ހިޔާނާތުގެ ތެރޭގައި އެ އިދާރާތައް އަތުނުވާ ހިސާބަށް ހިނގައިދާނެ އެވެ. ނޫނީ މިހާރު ވެސް އެ އޮތީ ގޮސްފަ އެވެ.

މި ރިޕޯޓް ފަށަމުން ބުނިގޮތަށް ދެ ކޮންޓޭނަރުގެ ސިނގިރޭޓް ވަގަށް ގެންދިޔަ ހަބަރާ އެކު ބައެއް މީހުންނަށް ހައިރާންކަން ލިބުން ކައިރި އެވެ. ނަމަވެސް މި ގައުމުގައި ވައްކަން އާންމުވަމުންދާ ނިސްބަތަށް ބަލާއިރު އެކަހަލަ ހަބަރެއް އިވިގެން ހައިރާންނުވާށެވެ. އޭގެ ބަދަލުގައި ވަގުންނަށް އެ ފުރުސަތު ލިބުމާއި އެކަންކަން ހުއްޓުވަން އެކަށީގެންވާ ފިޔަވަޅު ނޭޅުމާއި އިދާރާތަކުގެ ވެރިންގެ ނާގާބިލްކަމާ މެދު ހިތާމަކުރަމާ ހިނގާށެވެ.