ރައީސް، މެމްބަރުންނަށް އިރުޝާދު ދެއްވާ ގްރޫޕުން ނާޒިމް ބޭރުކޮށްފި

ރައީސް މުހައްމަދު މުއިއްޒު ޕީއެންސީގެ މަޖިލިސް މެމްބަރުންނަށް އިރުޝާދު ދެއްވަން ގެންގުޅުއްވާ ވަޓްސްއެޕް ގްރޫޕަކުން، ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހްމަދު ނާޒިމް ބޭރުކުރައްވައިފި އެވެ.

ވީ ކިހިނެއް؟ - އެ ގްރޫޕުން ރައީސް މުއިއްޒު، ނާޒިމް ބޭރުކުރެއްވިކަން އެކަކަށް ވުރެ ގިނަ މަސްދަރުތަކުން 'ދައުރު'އަށް ވަނީ ކަށަވަރުކޮށްދީފަ އެވެ.

ތަފްސީލު - މިކަމާ ބެހޭ މައުލޫމާތު އެނގޭ ފަރާތްތަކުން 'ދައުރު'އަށް ބުނީ އެ ގްރޫޕުގައި ހުންނަނީ އެންމެ އެޑްމިނިސްޓްރޭޓާއެއް ކަމަށާއި އެއީ ރައީސް މުއިއްޒު ކަމަށެވެ.

ނަމަވެސް އެ ގްރޫޕުން ނާޒިމް ބޭރުކުރެއްވީ ކޮން ސަބަބަކާ ހުރެކަން އެއްވެސް ބޭފުޅަކު ވިދާޅެއްނުވެ އެވެ.

އެނގުން މުހިންމު - މަޖިލީހުގެ މި ދައުރަށް އިންތިހާބުވި ޕީއެންސީގެ މެމްބަރުންނަށް ސަރުކާރުގެ ފަރާތުން އަންގާ އެއްޗެއް އަންގަވާނީ ސީދާ ރައީސް މުއިއްޒު ކަމަށް، މަޖިލިސް އިންތިހާބު ނިމުނު ދުވަސްވަރު އެ މަނިކުފާނު ވިދާޅުވެފައިވެ އެވެ.

ފާހަގަކޮށްލެވޭ ކަމެއް - ނާޒިމް ވަނީ ރައްޔިތުންގެ މަޖިލީހުގެ ބާރުގަދަ ބައެއް ކޮމިޓީތަކުން ވެސް މިފަހުން ވަކިކޮށްފަ އެވެ.

އޭގެ އިތުރުން، ނިމިދިޔަ ކައުންސިލް އިންތިހާބުގައި ނާޒިމްގެ ދާއިރާގައި ހިމެނޭ ފަސް ރަށުގެ ތެރެއިން ގިނަ ރަށްރަށުން ސަރުކާރު ހިންގާ ޕީއެންސީއަށް ކާމިޔާބު ލިބިފައެއް ނުވެ އެވެ.

މަޖިލީހުގެ ނައިބު ރައީސްގެ މަގާމުން ނާޒިމް މަގާމުން ވަކިކުރުމަށްޓަކައި ބޭނުންވާ ސޮއި ހޯދައި އެކަމަށް ލޮބީ ކުރުމުގެ މަސައްކަތްތަކެއް މިދިޔަ މަހު ޕީއެންސީ ތެރެއިން ފެށިކަން އެ ޕާޓީގެ ބައެއް މަޖިލިސް މެންބަރުން ވަނީ 'ދައުރު'އަށް ކަށަވަރުކޮށްދީފަ އެވެ.

ނަމަވެސް ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހު ވަނީ އެކަން ދޮގުކުރައްވާފަ އެވެ.