ރައުދަށް އިއްވީ 27 ދުވަހުގެ ޖަލު ހުކުމެއް؛ އެހާ ދުވަހު ޖަލުގައި ހޭދަކޮށްފައިވާތީ އިތުރަށް ތަންފީޒުކުރާކަށް ނުޖެހޭ

ގުދަނެއްގެ ފުރާޅުމައްޗަށް ހައްވާ ޔުމްނު ރަޝީދު ވެއްޓިފައި އޮއްވާ ފެނުނު މައްސަލައިގައި ހައްޔަރުކޮށް ދައުވާ އުފުލި ރައުދު އަހްމަދު ޒިލާލު ކުށަށް އިއުތިރާފުވުމުން 27 ދުވަހުގެ ޖަލު ހުކުމެއް މިއަދު އިއްވައިފި އެވެ.

ވީ ކިހިނެއް؟ - މިދިޔަ 18 އެޕްރީލްގައި ހިނގި އެ ހާދިސާއާ ގުޅިގެން ރައުދުގެ މައްޗަށް މިދިޔަ ޖޫން މަހު ދައުލަތުން އުފުލީ އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއް ނެތި، އެހީތެރިކަން ފޯރުކޮށްނުދިނުމުގެ ކުށުގެ ދައުވާ އެވެ.  

އެ މައްސަލައިގައި އޭނާއަށް އަންނާނީ، ގާނޫނުގައިވާ ގޮތުން، އަސާސީ މިންގަނޑުން ބަލާއިރު، އެއް މަހާއި ހަ ދުވަހަށް ޖަލު ހުކުމެކެވެ.

ތަފްސީލު - މި މައްސަލައިގައި މިދިޔަ ހަފުތާ ބޭއްވި އަޑުއެހުމުގައި ރައުދު ވަނީ ކުށަށް އިއުތިރާފްވެފަ އެވެ.  އެހެންވެގެން މައްސަލަ ބެއްލެވި ގާޒީ ނިންމެވީ އަސާސީ މިންގަނޑަށް ވުރެ އެއް ދަރަޖަ އަދަބު ލުއިކޮށްދެއްވުމަށެވެ.

އެހެންވެ އޭނާއަށް އިއްވީ 27 ދުވަހުގެ ޖަލު ހުކުމެކެވެ.

ރައުދު ބަންދުކޮށްފައިވާ ދުވަސްތަކަށް ބެލުމުން އެއަށް ވުރެ ދިގު މުއްދަތަކަށް އޭނާ ބަންދުގައި ހޭދަކޮށްފައިވާ ކަން އެނގެ އެވެ. އެއީ އެއް މަހާއި ތިން ދުވަހެވެ. އެގޮތުން:

އެނގުން މުހިންމު - ރައުދަކީ ޔުމްނު ވެެއްޓުނު އިރު އޭނާއާ އެކު ބުރުޒުމަގުގައި ހުންނަ ހ. ފެންޓެނޯއީ ގޭގެ ސިޑިމަތީގައި އުޅުނު ޒުވާނާ އެވެ. 

މަސްތުވާތަކެތީގެ ބާވަތެއް ކަމަށްވާ ކެނަބިސްއަށް ރައުދު ޕޮޒިޓިވްވެފައިވާ ކަމަށް ފުލުހުން ބުނެފައިވެ އެވެ.

މި މައްސަލައިގައި ފުލުހުން ފުރަތަމަ ބުނީ، ޔުމްނު ވެއްޓުމުގައި ރައުދު ނުވަތަ އެެހެން މީހެއްގެ ބައިވެރިވުން ވެސް ނެތް ކަމަށެވެ. އޭގެ ފަހުން ރައުދު ހައްޔަރުކުރީ ތަހުގީގަށް އެއްބާރުލުން ނުދޭ ކަމަށް ބުނެ އެވެ.

ރައުދު ހައްޔަރުކޮށް ބަންދުކުރަން ނެރުނު ދެވަނަ އަމުރުން އެނގުނު ގޮތުގައި އެ ރޭ ރައުދު އާއި ޔުމްނުއާ ދެމެދު 'ހަމަނުޖެހުމެއް' ވެސް ހިނގަ އެވެ. އަދި ޔުމްނު ވެއްޓުނު ކަމަށް ކޮންމެވެސް ބަޔަކު ކައިރީ އޭނާ ބުނިކަން އެ އަމުރުގައިވެ އެވެ.