ރިޔާސީ ރޭހަށް ނުނުކުންނަން އުޅުނިން؛ ހަރާބުވީ ސޯލިހާ ހެދި: ނަޝީދު

އެ މަނިކުފާނު ކުރިމަތިނުލައްވައި އޭރުގެ ރައީސް އިބްރާހިމް މުހައްމަދު ސޯލިހަށް ރިޔާސީ އިންތިހާބުގައި ފުރަސަތު ދެއްވުމަށް ދެ ފަހަރެއްގެ މަތިން މަސައްކަތް ކުރެއްވި ކަމަށާއި ނަމަވެސް އެކަން ހަރާބުވީ ސޯލިހްގެ ސަބަބުން ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ވީ ކިހިނެއް؟ - ނަޝީދު ރިޔާސީ އިންތިހާބުގެ ވާހަކަ ދެއްކެވީ، އެމްޑީޕީގެ ޗެއާޕާސަންގެ މަގާމުން ރޭ އިސްތިއުފާ ދެއްވި ފައްޔާޒު އިސްމާއިލްގެ އިސްތިއުފާގެ ސިޓީގައި ބަޔާންކޮށްފައިވާ ބައެއް ވާހަކަތަކަށް އިޝާރާތް ކުރައްވައި އެ ޕާޓީގެ މެންބަރުން ތިބޭ ވަޓްސްއެޕް ގްރޫޕަކަށް ފޮނުއްވި މެސެޖެއްގަ އެވެ.

ތަފްސިލު - ނަޝީދުގެ މެސެޖްގައި އެ މަނިކުފާނު ފުރަތަމަ ވިދާޅުވީ، ފައްޔާޒުގެ އިސްތިއުފާގެ ސިޓީގައި އެމްޑީޕީއަށް ރިޔާސީ އިންތިހާބު 2023 އާއި މަޖިލިސް އިންތިހާބު 2024 ގެއްލުނު ގޮތް ސާފުކޮށްދެއްވާފައިވާތީ އޭނާއަށް ޝުކުރު އަދާ ކުރައްވާ ކަމަށެވެ.

އެއާ އެކު ދެން ވިދާޅުވީ ރިޔާސީ އިންތިހާބުގައި އެ މަނިކުފާނު "ކުރިމަތިނުލައި ރައީސް ސޯލިހަށް ފުރުސަތު ދިނުމަށް ދެ ފަހަރު މަސައްކަތް ކުރިން" ކަމަށެވެ.

"ރައީސް ސޯލިހްގެ ބައެއް އަރިސް ބޭފުޅުން އަދި ރައީސް ސޯލިހަށް ވެސް އެގޮތް ކަމުނުގޮސް، އަޅުގަނޑުމެން ނުލާ އިންތިހާބު ކާމިޔާބު ކުރެވޭނެ ކަމަށް މާ ބޮޑަށް ދެކެވި، މުޅިކަން ހަރާބުވީ،" ސޯލިހާ ވާދަކޮށް، އެމްޑީޕީގެ ރިޔާސީ ޕްރައިމަރީން ނާކާމިޔާބީއާ ކުރިމަތިވި ނަޝީދުގެ މެސެޖްގައި ލިޔުއްވި އެވެ.

ސޯލިހަށް އެމްޑީޕީގެ ރިޔާސީ ޓިކެޓް ކާމިޔާބުވި ނަމަވެސް، ނަޝީދު އެ މަނިކުފާނަށް ރިޔާސީ އިންތިހާބުގައި ތާއީދެއް ނުކުރައްވަ އެވެ. އޭގެ ބަދަލުގައި ޕާޓީން ވަކިވެވަޑައިގެން ޑިމޮކްރެޓްސްގެ ނަމުގައި އާ ޕާޓީއެއް ހެއްދެވި އެވެ. އަދި އެ ޕާޓީން ރިޔާސީ އިންތިހާބަށް ކެންޑިޑޭޓަކުން ވެސް ނެރުނެވެ.

ސޯލިހަށް ދެވަނަ ދައުރެއް ނުލިބުމުގެ އެންމެ ބޮޑު ބާރަކަށްވި އެއް ސަބަބަކީ ނަޝީދުގެ ތާއީދު އެ މަނިކުފާނަށް ނުލިބި، އެމްޑީޕީ ދެފަޅިވުމެވެ. ނަމަވެސް ނަޝީދު މިހާރު އަނެއްކާވެސް އަލުން އަނބުރާ އެމްޑީޕީއާ ގުޅިގެންނެވި އެވެ.

ފާހަގަކޮށްލެވޭ ކަމެއް - ފައްޔާޒުގެ އިސްތިއުފާގެ ސިޓީގައި ނަޝީދާއި ސޯލިހާ ދެމެދު ޖެހުނު މައްސަލަގަނޑު ހައްލުކުރަން ޕާޓީގެ ޗެއާޕާސަންގެ ހައިސިއްޔަތުން ކުރެއްވި ބައެއް ކަންކަން އޭނާ ވަނީ ހިމަނުއްވާފަ އެވެ. ނަމަވެސް އެ މަސައްކަތުގެ ތެރެއިން ދެ ފަރާތުން ހިތްހަމަޖެހޭ އެއްބަސްވުމަކަށް ނާދެވުނު ކަމަށް ފައްޔާޒު ވިދާޅުވި އެވެ. 

އެގޮތުން، ސިޓީގައި ވިދާޅުވީ:

"އެހެން ނަމަވެސް އޭގެ ދުވަސްކޮޅެއް ފަހުން ޕާޓީގެ ބައެއް އިސް ފަރާތްތަކަށް ގަބޫލު ކުރެވުނީ ރައީސް ނަޝީދުއާ އެކު އެއްބަސްވެވުނު ގޮތަށް ކުރިއަށް ނުދިޔުމަށެވެ،" ފައްޔާޒުގެ ސިޓީގައި އޭނާ ލިޔުއްވާފައިވެ އެވެ.