މިރޭގެ މުޒާހަރާއަކީ ގައުމު އިނދަޖައްސާލަން ކުރާ ބޮޑު ނުބައި ކަމެއް: ގާސިމް

އެމްޑީޕީން މިރޭ މާލޭގައި ކުރިއަށް ގެންދާ މުޒާހަރާ އަކީ 'ވެރިކަން ހޯދަން ކުރާ ބޮޑު ނުބައި ކަމެއް' ކަމަށާއި އެއީ ގައުމު އިނދަޖައްސާލަން ކުރާ ކަމެއް ކަމަށް ޖުމްހޫރީ ޕާޓީ (ޖޭޕީ)ގެ ލީޑަރު އަދި މާމިގިލި ދާއިރާގެ މެންބަރު ގާސިމް އިބްރާހިމް މިއަދު ވިދާޅުވެއްޖެ އެވެ.

ވީ ކިހިނެއް؟ - މިރޭގެ އެއްވުމާ ގުޅުވައި ސޯޝަލް މީޑިއާގައި ކުރެއްވި ޕޯސްޓެއްގައި ގާސިމް ވަނީ، އެ މުޒާހަރާގައި ޖޭޕީގެ އެއްވެސް މެންބަރަކު ބައިވެރިނުވުމަށް ގޮވާލައްވައިފަ އެވެ.

ތަފްސީލް - މިރޭގެ މުޒާހަރާއަކީ ފަނާކުރަނިވި މުޒާހަރާއެއް ކަމަށް ވިދާޅުވެ ގާސިމް ލިޔުއްވި ގޮތުގައި ދަރަނި ބޮޑު މި ހާލަތުގައި ކޮށްދެވޭނެ އެއްވެސް ކަމެއް ނެތެވެ.

"އެއްވެސް ކަމެއް މި އޮތް ބޮޑު ދަރަނިވެރި ހާލަތުގައި ކޮށްދެވޭނެތީ ކުރާ ކަމެއް ނޫން. އެއީ ގައުމަށް މި ވެރިކަމުގައި ރަނގަޅު ކަމެއް ކުރިޔަނުދީ ވެރިކަން ހޯދަން، ފިތުނަ ކުރަން ވެގެން ކުރާ ނުބައި ކަމެއް،" ގާސިމް ވިދާޅުވި އެވެ.

މިހާރުގެ ސަރުކާރަށް ކުރަން ޖެހިފައިވާ ކަމަކީ މީގެ ކުރިން ވެރިކަން ކުރި ތިން ހަތަރު ސަރުކާރުން ނަގާފައިވާ ބޮޑެތި ދަރަނިތައް ދެއްކުން ކަމަށް ވިދާޅުވެ ގާސިމް ވަނީ ސަރުކާރަށް ލިބޭ ފައިސާގެ ބޮޑު ބައެއް ހޭދަވަނީ ދަރަނި ދައްކަންކަން ފާހަގަކުރައްވާފަ އެވެ.

ގާސިމް ލިޔުއްވި ގޮތުގައި:

ސަރުކާރުގެ ކުންފުނިތަކުން މީގެ ކުރިން ވެސް ހިޔާނާތްތައް ހިންގި ކަމަށާއި ކުރީގެ ސަރުކާރުތަކުން އެ ކަންތަކަށް ފިޔަވަޅު އަޅާފައި ނުވާ ކަމަށް ގާސިމް ވިދާޅުވި އެވެ. މި ސަރުކާރުން ގެންދަނީ އެފަދަ ހިޔާނާތްތައް ބަލައި ތަހުގީގު ކުރަމުން ކަމަށާއި އެހެންކަމުން މިރޭގެ މުޒާހަރާގެ ނަތީޖާއަކަށް ވާނީ ގައުމު އިތުރު ވަޅުގަނޑަކަށް ވައްޓާލައި ރައްޔިތުން އިތުރަށް ދަރަނިވެރި ކުރުވައި އިނދަޖައްސާލުން ކަމަށް ވެދާނެ ކަމުގެ ސުވާލު ގާސިމް އުފެއްދެވި އެވެ.

"ވީމާ އަޅުގަނޑުގެ ނަސޭހަތަކީ އެއްވެސް މީހަކު މި މުޒާހަރާގައި ބައިވެރިނުވުން. މި ގައުމުގެ އަމަން އަމާންކަން ގެއްލޭ ފަދަ އެއްވެސް ކަމެއް ނުކުރެއްވުން،" މިއީ ގައުމު އިނދަޖައްސާލުމުގެ އަމަލެއްގެ ގޮތުގައި ސިފަކުރައްވަމުން ގާސިމް ވިދާޅުވި އެވެ.

އެނގުން މުހިއްމު - ސަރުކާރު ދިފާއު ކުރައްވާ ސޯޝަލް މީޑިއާގައި ގާސިމް ދިގު ޕޯސްޓެއް ކުރެއްވި އިރު، ގާސިމްގެ ވިލާ ކުންފުނިން ހިންގަމުން އައި ގދ. ކާޑެއްދޫ އެއާޕޯޓު ސަރުކާރަށް ނަގައި ބަދަލެއްގެ ގޮތުގައި 18 މިލިއަން ޑޮލަރު (278 މިލިއަން ރުފިޔާ) ދޭން ސަރުކާރުން ވަނީ އެއްބަސްވެފަ އެވެ.

ފާހަގަ ކުރެވޭ - މިރޭގެ އެއްވުމުގައި މާލޭގެ ހަމަޖެހުން ނަގާލަން މަސައްކަތް ކުރާ ކަމަށް ބުނެ ފުލުހުން މިދިޔަ ބުދަ ދުވަހު ވަނީ ނޫސްބަޔާނެއް ނެރެފަ އެވެ. އެ ބަޔާން ކުށްވެރިކޮށް އެމްޑީޕީން ބުނީ ފުލުހުންގެ ބަޔާނުގައި ވަނީ ދޮގު ތުހުމަތުތަކެއް ކަމަށެވެ.