ހުކުރު ދުވަހުގެ އެއްވުމުގައި ހަމަޖެހުން ނަގާލަން އެބަ މަސައްކަތް ކުރޭ: ފުލުހުން

ހުކުރު ދުވަހު އެމްޑީޕީ އިން މާލޭގައި ކުރިއަށް ގެންދަން ނިންމާފައިވާ އެއްވުން ކުރިއަށް ގެންދަން ހުއްދަ ދީފައިވާ ރޫޓާ ހިލާފަށް އެއްވުމުގެ ބައިވެރިން މާލެ ތެރޭގައި ހިނގާލުން ކުރިއަށް ގެންގޮސް ހަމަޖެހުން ނަގާލަން މަސައްކަތް ކުރަކަމުގެ މައުލޫމާތު ލިބިފައިވާ ކަމަށް ފުލުހުން ބުނެފި އެވެ.

ވީ ކިހިނެއް؟ - އެމްޑީޕީ އިން ހުކުރު ދުވަހުގެ ރޭ ބާއްވަން ނިންމާފައިވާ އެއްވުމަށް ފުލުހުން ވަނީ ހުއްދަ ދީފަ އެވެ.

ތަފްސީލް - ފުލުހުން މިއަދު ނެރުނު ނޫސްބަޔާނެއްގައި ބުނީ  ގާނޫނުއަސާސީން ކަށަވަރުކޮށްދީފައިވާ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ހައްގު ބޭނުންކުރުމުގެ ހަމަތައް ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާއި އެ ގާނޫނަށް އިސްލާހު ގެނެސްފައިވާ ގާނޫނުތަކުގައި ބަޔާންކޮށްފައިވާ ކަމަށެވެ.

އެ ގާނޫނާ އެއްގޮތަށް ސުލްހަވެރިކަމާއެކު ކުރިއަށްގެންދާ ހަރަކާތްތަކަށް ފޯރުކޮށްދޭންޖެހޭ ރައްކާތެރިކަން ދީ،އެ ހަރަކާތްތައް ކުރިއަށް ގެންދާ ސަރަހައްދުތަކުގެ މަގުތަކާއި އެހެނިހެން ތަންތަނުގެ ސަލާމަތާއި ރައްކާތެރިކަން ބެލެހެއްޓުމުގެ އިންތިޒާމުތައް ފުލުހުން ހަމަޖައްސާ ކަމަށް އެ ބަޔާނުގައި ބުންޏެވެ.

ފުލުހުންގެ ބަޔާނުގައި ބުނީ:

މިއީ  މާލޭގެ އަމާން ކަމާއި އާންމު މަސްލަހަތު ގެލިދާނެ ކަންކަން ކަމަށް ފުލުހުން ބުންޏެވެ.

ސުލްހަވެރި ހަރަކާތެއްގެ ނަމުގައި ކުރިއަށް ގެންދިއުމަށް ހަމަޖެހިފައިވާ އެ ހަރަކާތުގައި، ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފު އަދި އަމަން އަމާންކަމަށް ނުރައްކާވެދާނެ އެއްވެސް އަމަލެއް ހިންގުމަށް ހިތްވަރު ނުދިނުމަށް ގޮވާލާ ފުލުހުންގެ ބަޔާނުގައި ބުނީ، މާލެ ހަލަބޮލިކޮށް ތަންތަނަށް ގެއްލުންދޭން ފުރުސަތު ނުދޭނެ ކަމަށެވެ.

އެއްވުން ކުރިއަށްދާއިރު، އާންމު ރައްޔިތުންގެ ރައްކާތެރިކަން ކަށަވަރުކުރުމަށް ހަރަކާތްތެރިވާ ފަރާތްތަކަށް އެއްބާރުލުން ދީ، ރައްޔިތުންގެ ހައްގުތަކަށް އިހުތިރާމު ކޮށް މުޖުތަމައުގެ އާންމު މަސްލަހަތަށް އުނިކަމެއް ނާންނާނެ ގޮތަށް ހަރަކާތް ކުރިއަށް ގެންދިއުމަށް ފުލުހުން ވަނީ އެދިފަ އެވެ.