ކުރީ ސަރުކާރުގެ ފެނަކަ ހިޔާނާތް ބަލަން އަންގައިފިން: ރައީސް

ކުރީގެ ސަރުކާރުގައި ފެނަކަ ކުންފުނީގެ މެނޭޖިން ޑިރެކްޓަރަކަށް އަހްމަދު ސައީދު ހުންނެވިއިރު އޭރު ހިންގި ހިޔާނާތުގެ މައްސަލަ އަވަހަށް ބަލަން ކަމާ ގުޅުން ހުރި މުއައްސަސާތަކަށް މިހާރު އަންގަވާފައިވާނެ ކަމަށް ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.

ވީ ކިހިނެއް؟ - ކޮރަޕްޝަންގެ 'ހާއްޔެއް'ގެ ގޮތުގައި އޮތް ފެނަކައިގެ 2021-2023ގެ އޮޑިޓް ރިޕޯޓެއް އޮޑިޓް އޮފީހުން މިދިޔަ ބުރާސްފަތި ދުވަހުގެ ރޭ ދަންވަރު ވަނީ އާންމުކޮށްފަ އެވެ. އެ ރިޕޯޓާ ގުޅޭ ގޮތުން  ރައީސް ވާހަކަފުޅު ދެއްކެވީ އެމަނިކުފާނު މީގެ ދެ ހަފްތާ ކުރިން ފެއްޓެވި އަތޮޅުތަކުގެ ދަތުރުގެ ފަހު މަންޒިލެއްގެ ގޮތުގައި ވަޑައިގެންވި ތ. ތިމަރަފުށީގައި ބޭއްވި ޖަލްސާގަ އެވެ.

ތަފްސީލު - އެ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ދައުލަތުގެ އެންމެ އިސް ވެރިޔާގެ ހައިސިއްޔަތުން މިފަދަ ކޮރަޕްޝަންތައް ތަހުގީގު ކުރުމަށް މުއައްސަސާތަކަށް އެމަނިކުފާނަށް އެންގެވޭނެ ކަމަށެވެ. އެގޮތުގެ މަތިން ފެނަކައިގެ ހިޔާނާތުގެ މައްސަލަ ތަހުގީގު ކުރުމަށް މިހާރު އަންގަވާފައިވާނެ ކަމަށް ރައީސް ވިދާޅުވި އެވެ.

"އޭގައި [އޮޑިޓް ރިޕޯޓުގައި] އެއޮތީ އެތައް ސަތޭކަ މިލިއަން ރުފިޔާގެ ވައްކަންކޮށްފައިވާ ކަމަށް. ދެން މިކަމުގައި ފުލުހުންގެ އިދާރާއިން ކުރަން ޖެހޭ ކަންކަން ފަަށައިފި. އެއީ، ސީދާ އަޅުގަނޑު މި ދެންނެވިހެން އަޅުގަނޑުމެންނަށް ބެލެން ހުންނާނެ ކަަންކަން. އަޅުގަނޑުމެން އަންގައިފިން އޭސީސީއަށް ވެސް، އަޅުގަނޑުމެން އަންގައިފިން ޕްރޮސެކިއުޓާ ޖެނެރަލްއަށް ވެސް، އަޅުގަނޑުގެ މަގާމުގެ ހައިސިއްޔަތުން އެންގޭނެ މިންވަރަށް އަންގައިފިން [ފެނަކައިގެ އޮޑިޓް ރިޕޯޓާ ގުޅިގެން] މިކަން އަވަސް ކުރަން،" ރައީސް ވިދާޅުވި އެވެ.

ފެނަކަ ތެރެއިން ހިޔާނާތް އެވީ ރައްޔިތުންގެ ފައިސާއިން ކަން ފާހަގަކުރައްވައި ރައީސް ވިދާޅުވީ ކުރީ ސަރުކާރުގައި އެ ކުންފުނި ހަލާކުވާން އޭރު އޮތީ ދޫކޮށްލާފައި ކަމަށެވެ. އަދި ފެނަކައިގެ އިތުރުން ދައުލަތުގެ އެހެން ކުންފުނިތައް ވެސް ހުރީ އެގޮތަށް ބާރުގެ ބޭނުން ނަހަމަ ގޮތުގައި ބޭނުންކޮށްގެން ހަލާކުކޮށްލާފައި ކަމަށް ރައީސް ވިދާޅުވި އެވެ.

"އެހެންވީމާ އެ މައްސަލަތައް ހައްލުކުރަން އަޅުގަނޑުމެންނަށް އެހާ ދުވަސް މި ނެގީ އަޅުގަނޑުމެންނަށް. މި ހުރިހާ ކުންފުނިތައް ހުރީ މިގޮތަށް މިސްޔޫސްކޮށްފައި،" ރައީސް ވިދާޅުވި އެވެ.

ކުރިން ހިންގާފައި ހުރި ވައްކަންތަކުން ދައުލަތަށް ހޯދަން ޖެހޭ ފައިސާ ހޯދުމަށް  އެސެޓް ރިކަވަރީ ގާނޫނެއް ގެންނަވާނެ ކަމަށް މިދިޔަ އަހަރުގެ ޖުލައި މަހު ރައީސް ވަނީ އިއުލާން ކުރައްވާފަ އެވެ. ނަމަވެސް އޭގެ ފަހުން އަހަރަކަށް ވުރެ ގިނަ ދުވަސް ވީއިރު، އަދިވެސް އެ ބިލު މަޖިލީހަށް ހުށަނާޅަ އެވެ.

ރައީސް ވިދާޅުވީ މަޖިލިސް ދެން ހުޅުވުމާ އެކު އެ ބިލު ހުށަަޅާނެ ކަމަށެވެ. މިފަދަ ވައްކަންތަކުގެ ފައިސާ ދައުލަތަށް ހޯދުމަށް އެއީ މުހިންމު ބިލެއް ކަމަށް ވެސް އެމަނިކުފާނު ފާހަގަކުރެއްވި އެވެ.

"މިދިޔަ ދުވަސްތަކުގައި ހިންގާފައި ހުރި ބޮޑެތި ކޮރަޕްޝަނާއި ވައްކަމުގެ މައްސަލަތައް، އެމްއެމްޕީއާރުސީ [ހިޔާނާތް] ހާއްސަކޮށް. މިކަންކަން ބަލައި ނިމޭއިރުގައި މިއިން އެއްވެސް ފަރާތެއް ދައްކަން އޮތް އެއްޗެއް ހޯދޭ ގޮތެއް ނުވޭ. މިހާރު އޮތް ނިޒާމުގެ ތެރެއިން ނުހޯދޭ،" ރައިސް ވިދާޅުވި އެވެ.

"އެހެންވީމާ އަޅުގަނޑުމެން މި ހުށަހަޅަނީ އެސެޓް ރިކަވަރީ ގާނޫނެއް ތައާރަފު ކުރުމަށްޓަކައި ބިލެއް. މި ބިލު މަޖިލީހުން ނިންމުމާ އެކު ތަސްދީގުކުރަން ފޮނުވާ ދުވަހު ހަމަ އަޅުގަނޑު ތަސްދީގުކުރާނަން."

އެއާ އެކު ރައީސް ވިދާޅުވީ އެ ގާނޫނު ތަންފީޒުކުރަން ފެށުމާ އެކު، ބޮޑެތި ވައްކަން ކޮށްފައި ތިބި ހުރިހާ އެންމެންގެ ފަހަތުން ސަރުކާރުގެ އިދާރާތަކުން ބާރަށް ދާނެ ކަމަށެވެ. އަދި އެކަމުގައި ވަކި މީހެއް އިސްތިސްނާ ނުވާނެ ކަމަށް ވެސް ވިދާޅުވި އެވެ.