އިނގިރޭސި ސަފީރު ނިކް ލޯ އޭނާގެ ސަފީރުކަމުގެ ލިޔުން ރައީސް މުހައްމަދު މުއިއްޒުއަށް އެރުވުމުގެ ރަސްމިޔާތު (ފައިލް ފޮޓޯ/ރައީސް އޮފިސް)
މިނިވަން ނޫސްވެރިކަމަށް ހުރަސްނާޅަން އިނގިރޭސިވިލާތުން ރާއްޖެއަށް ގޮވާލައިފި
މިނިވަންކަމާ އެކު ހިޔާލު ފާޅުކުރުމާއި ނޫސްވެރިކަންކުރުމަށް ހުރަސް އެޅޭ ގޮތަށް ރައްޔިތުންގެ މަޖިލީހުން ފާސްކުރި މީޑިއާ ބިލު ރައީސް މުހައްމަދު މުއިއްޒު ތަސްދީގުކުރައްވާފައިވަނިކޮށް، ޒިންމާދާރު މިނިވަން ނޫސްވެރިކަމަށް ހުރަސްނާޅަން އިނގިރޭސިވިލާތުން ދިވެހި ސަރުކާރަށް މިއަދު ގޮވާލައިފި އެވެ.
ވީ ކިހިނެއް؟ - ހިޔާލު ފާޅުކުރުމުގެ ހައްގާއި މިނިވަން ނޫސްވެރިކަން ހަނިވާ ގޮތަށް ފަރުމާކޮށްފައިވާ ބިލު ބޭރުކޮށްލުމަށް ދާއިރާގެ ތަޖުރިބާކާރުންނާއި ނޫސްވެރިން އަދި ބައިނަލްއަގުވާމީ ޖަމިއްޔާތަކުން ތަކުރާރުކޮށް ގޮވާލާފައިވެ އެވެ. ނަމަވެސް، މަޖިލީހުން އަަވަސް އަރުވާލައިގެން ދައުރުން ބޭރުން ބޭއްވި ޖަލްސާތަކެއްގައި މި ބިލު ދިރާސާކޮށް، މިދިޔަ އަންގާރަ ދުވަހު ވަނީ ފާސްކޮށްފަ އެވެ. އަދި އޭގެ ދެ ދުވަސް ފަހުން ރައީސް މުއިއްޒު ވަނީ އެ ބިލު ތަސްދީގުކުރައްވައިފަ އެވެ.
ތަފްސީލް - މިނިވަން ނޫސްވެރިކަމަކަށް ޖާގަދިނުމަށް އިނގިރޭސިވިލާތުން ދިވެހި ސަރުކާރަށް ގޮވާލީ، ރާއްޖޭގައި ހުންނަ އިނގިރޭސިވިލާތުގެ ހައި ކޮމިޝަނުން އެކްސްގައި ކުރި ޕޯސްޓެއްގަ އެވެ.
At @samoachogm2024, the leaders of the Commonwealth - including the 🇬🇧 and 🇲🇻 - reaffirmed the vital role of free, independent, and responsible media in democracy. We urge all partners to honour and uphold the commitments we made together.
— UK in Maldives 🇬🇧🇲🇻 (@UKinMaldives) September 19, 2025
އެ ޕޯސްޓުގައި ވަނީ:
-
މިދިޔަ އަހަރު ސަމޯއާގައި ބޭއްވި ކޮމަންވެލްތު ގައުމުތަކުގެ އިސްވެރިންގެ ބައްދަލުވުމުގައި، މިިނިވަން ނޫސްވެރިކަމަށް ފުރުސަތު ދިނުމަށް ވެފައިވާ އެއްބަސްވުމަށް އިހުތިރާމުކޮށް، އެ އެއްބަސްވުން ނެގެހެއްޓުމަށް ގޮވާލާފައި
-
އެ ބައްދަލުވުމުގައި ރާއްޖެ ހިމެނޭހެން ކޮމަންވެލްތުގެ ހުރިހާ ގައުމެއްގެ މެދުގައި ވެފައިވާ އެ އެއްބަސްވުމުގައި، މިނިވަން ޒިންމާދާރު ނޫސްވެރިކަމަކަށް ޖާގަދިނުމަށް އެއްބަސްވެފައިވާކަން ފާހަގަކުރި
ގުޅުންހުރި - މަޖިލީހުން މި ބިލް ފާސްކުރުމާ ގުޅިގެން، އެމެރިކާއިން ވެސް ވަނީ ހިޔާލުފާޅުކުރުމުގެ މިނިވަންކަން ނެގެހެއްޓުމަށް ރާއްޖެއަށް ގޮވާލައިފަ އެވެ.
The United States supports freedom of expression, including for journalists, as a fundamental freedom. We urge the Maldives and all countries to uphold the freedoms of expression, including dissenting and opposition voices.
— U.S. Embassy Male' (@USinMaldives) September 16, 2025
އެނގުން މުހިންމު - ސަރުކާރުގެ ނޫފުޒު ފޯރުވޭނެ ގޮތަށް މީޑިއާ ރެގިއުލޭޓުކުރުން ވަކި ކޮމިޝަނަކާ ހަވާލުކޮށްފައިވާ ގާނޫނަށް އަމަލުކުރަން ސަރުކާރުން ފެށި ނަމަވެސް، ގިނަ އަދަދެއްގެ ނޫސްވެރިން ދަނީ އެ ގާނޫނަށް އަމަލުނުކުރާނެ ކަމަށް ބުނަމުންނެވެ. އެކަމާ ދެކޮޅުހެދުމުގެ ގޮތުން ނޫސްވެރިން ކުރަމުންދާ އިހުތިޖާޖުތައް ހުއްޓާނުލައި ކުރިއަށް ގެންދަން ވެސް ވަނީ ނިންމާފަ އެވެ.
މީގެ އިތުރުން، 'މީޑިއާ ކޮންޓްރޯލް ގާނޫނޫ'ގެ ދަށުން ރައީސް އުފައްދަވާ ކޮމިޝަންގެ އިންތިހާބު ބޮއިކޮޓްކޮށް، ނޫސްތައް ރެގިއުލޭޓް ކުރަން އަމިއްލަ ނިޒާމެއް އެކުލަވާލަން ނޫސްވެރިންގެ ޖަމިއްޔާ (އެމްޖޭއޭ) އިން ރޭ ވަނީ ނިންމާފަ އެވެ.
މިއީ ގާނޫނުއަސާސީ އާއި ބެސްޓް ޕްރެކްޓިސްއާ ހިލާފު ގާނޫނެއްކަން ފާހަގަކޮށް، މި ގާނޫނު ބާތިލުކުރަން ކޯޓަށް ދާން ވެސް އެ ޖަމިއްޔާއިން ވަނީ ނިންމާފަ އެވެ.
