ކުރީ ސަރުކާރުގެ ލިސްޓަށް ފްލެޓް ދޭން ނިންމައިފި؛ އާ ލިސްޓެއް ނުނެރޭނެ

ކުރީގެ ސަރުކާރުން ކުރިއަށް ގެންދިޔަ، 'ގެދޮރުވެރިޔާ' ސްކީމުން ފްލެޓް ލިބޭނެ ކަމަށް އެ ސަރުކާރުން ނެރެފައިވާ ދާއިމީ ލިސްޓަށް ފްލެޓް ދޭން ނިންމައި އާ ލިސްޓެއް ނުނެރޭނެކަން ސަރުކާރުން މިއަދު އިއުލާންކޮށްފި އެވެ. 

ވީ ކިހިނެއް؟ - އެ ގޮތަށް އިއުލާންކޮށްފައި ވަނީ ރައީސް އޮފީހުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގަ އެވެ. އެ ބައްދަލުވުމުގައި ހައުސިން މިނިސްޓަރު ޑރ. އަބްދުﷲ މުއްތޮލިބު ވިދާޅުވީ: 

"އިތުރު އާ ލިސްޓެއް އަޅުގަނޑުމެން ދެން ނުނެރޭނަން. އަޅުގަނޑުމެން ހަމައެކަނި އެ ލިސްޓުން ޝަރުތު ހަމަނުވާ ކަމަށް ސާބިތުވާ މީހުންނަށް އެޕީލްކުރަން ފުރުސަތު ދީ އަންގައި މުއާމަލާތް ކުރަމުން ދާނީ. އެފަދަ ފަރާތްތަކަށް އެ ޕްރޮސެސްތައް ނިމިގެން ފްލެޓް ނުލިބޭނީ،" މުއްތޮލިބު ވިދާޅުވި އެވެ. 

"ގިނަ މީހުންނަށް އެހެންވީމާ އެ ލިސްޓުން ފްލެޓް ލިބޭނެ."

ގެދޮރުވެރިޔާ ސްކީމްގެ ދަށުން ހަދަމުން އަންނަނީ 4،000 ފްލެޓެވެ. 

އެނގުން މުހިންމު - މި ސަރުކާރުން ވަނީ ކުރީގެ ލިސްޓް މުރާޖައާކޮށް 27 ފެބުރުއަރީގައި ލިސްޓެއް ނެރެ ޝަކުވާއަށް ހުޅުވާލައިފަ އެވެ. އެ ލިސްޓްގައިވާ ގޮތުން ޝަރުތު ހަމަވަނީ، 1،820 މީހުންނެވެ. އެ ލިސްޓަށް 8،000 އަށް ވުރެ ގިނަ ޝަކުވާ ވަނީ ލިބިފަ އެވެ. 

ތަފްސީލް - މުއްތޮލިބު ވިދާޅުވީ، އެ ލިސްޓަށް ދެން އިތުރަށް ނުބަލާނެ ކަމަށެވެ. އޭނާ ވިދާޅުވީ ކުރިން ބެލި ގޮތަށް އެހާ ހަރުކަށި އުސޫލަކުން ބަލައިގެން ފްލެޓް ލިބޭ މީހުން ނިންމާ ނަމަ އެކަން ކޮށް ދުވަހަކު ވެސް ނުނިމޭނެ ކަމަށެވެ. އެހެންކަމުން، އެންމެ މަސްލަހަތު ހުރި ގޮތަކީ ކުރީގެ ލިސްޓަށް ބަލައިގެން ފްލެޓްތައް ހަވާލުކުރަމުން ގެންދިޔުން ކަމަށް ވިދާޅުވި އެވެ.

ކުރީ ސަރުކާރުން އެކުލަވާލައި އަދި މިހާރު މި ސަރުކާރުން ވެސް އަމަލުކުރަން ނިންމާފައިވާ ދާއިމީ ލިސްޓުގައި ފާހަގަވެފައި ހުރި ބައެއް މައްސަލަތަކުގެ އަދަދު އޭނާ ވިދާޅުވި އެވެ. އޭނާ ވިދާޅުވި ގޮތުގައި:  

މާލޭގައި އުޅޭ ކަމަށް ބުނެ އޮޅުވާލައިގެން ލިޔުން ހުށަހަޅާފައިވާ ކަމަށް ނިންމައި ލިސްޓުން އުނިވަނީ ކިތައް ފަރާތް ކަމެއް މުއްތޮލިބު ވިދާޅެއްނުވެ އެވެ.

މުއްތޮލިބު ވިދާޅުވީ 4،000 ފްލެޓުގެ ތެރެއިން މިހާތަނަށް އަދި ނިމިފައި ވަނީ 1،000 ފްލެޓް ކަމަށެވެ. ނަމަވެސް އެ ތަންތަނަށް ފެނާއި ކަރަންޓް ގުޅާ ނިމޭނީ ޖުލައި މަސް ތެރޭގައި ކަމަށް މުއްތޮލިބު ވިދާޅުވި އެވެ. އެގޮތުން:

މުއްތޮލިބު އިތުރަށް ވިދާޅުވި ގޮތުގައި ފްލެޓް ލިބޭ މީހުންނާ އެކު، އެ ފްލެޓްތައް ހަދާ ސަރުކާރުގެ ކުންފުނި ފަހި ދިރިއުޅުން ކޯޕަރޭޝަން (އެފްޑީސީ)ން މިދިޔަ ސަރުކާރުގެ އެންމެ ފަހު ދުވަސްކޮޅު ހެދި އެގްރިމަންޓް ބަލައި ނުގަންނަ ކަމަށެވެ. އެހެންވެ، ހައުސިން މިނިސްޓްރީން ފްލެޓް ލިބޭ މީހުންނާ އެކު އަލުން އެގްރިމަންޓް ހަދާނޭ ކަމަށް ވެސް މުއްތޮލިބު ވިދާޅުވި އެވެ. 

"ޗުއްޓީއަށް ފަހު އަންނަ މަހުގެ ތެރޭ ދާއިމީ ލިސްޓްގައި ހުރި މީހުންނާ އެކު އެގްރިމަންޓް ހަދަން ފަށާނަން. ޖުލައި މަސް ތެރޭ އެތަނުގައި އުޅެން ފެށޭނެ ކަމަށް މި ބަލަނީ،" މުއްތޮލިބު ވިދާޅުވި އެވެ.