އޯޑިއޯތަކުގެ މައްސަލަ: ގާޒީ ފާއިޒުގެ ސަސްޕެންޝަން، އަޑު ދިމާނުވުމުން އުވާލައިފި

ކްރިމިނަލް ކޯޓުގެ ފަނޑިޔާރުންގެ އޯޑިއޯ ރެކޯޑިންތަކެއް ކަމަށް ބުނެ ސޯޝަލް މީޑިއާގައި ދައުރުކުރި އޯޑިއޯތަކުގެ މައްސަލައިގައި ސަސްޕެންޑުކުރި ކްރިމިނަލް ކޯޓުގެ ގާޒީ ހުސައިން ފާއިޒު ރަޝާދުގެ ސަސްޕެންޝަން، ޖުޑީޝަލް ސާވިސް ކޮމިޝަން (ޖޭއެސްސީ) އިން މިއަދު އުވާލައިފި އެވެ.

މައްސަލައިގެ ފެށުން - ކުރީގެ ރައީސް އަބްދުﷲ ޔާމީންގެ މައްޗަށް މަނީ ލޯންޑަރިންގެ ކުށް ސާބިތުވާ ކަމަށް ކަނޑައަޅައި އެ މަނިކުފާނު ފަސް އަހަރަށް ޖަލަށް ލާން ހުކުމް ކުރި ކްރިމިނަލް ކޯޓުގެ ބެންޗުގައި ތިއްބެވި ތިން ފަނޑިޔާރުން ވާހަކަ ދައްކަވާ ކަމަށް ބުނާ އެ އޯޑިއޯތަކެއް ލީކުވެ، އެ މައްސަލަ ހޫނުވި އެވެ. އެގޮތުން:

ބުނީ ކީކޭ؟ - ޖޭއެސްސީން މިރޭ ނެރުނު ބަޔާނެއްގައި ބުނީ ގާޒީ ފާއިޒް ރަޝާދު މަސައްކަތުން ސަސްޕެންޑުކޮށްފައި ވަނިކޮށް، މެލޭޝިއާގެ މިނިސްޓްރީ އޮފް ކޮމިއުނިކޭޝަންސް އެންޑް މަލްޓިމީޑިއާގެ ޑިޖިޓަލް ފޮރެންސިކް ޑިޕާޓްމަންޓުން ތައްޔާރުކޮށްފައިވާ ޑިޖިޓަލް ފޮރެންސިކް ކޭސް ރިޕޯޓެއް ފުލުހުން އެ ކޮމިޝަނާ ހިއްސާކުރި ކަމަށެވެ.

"އެ ރިޕޯޓުގައި، މީޑިއާގައި ދައުރުވި އޯޑިއޯތަކުގެ ފޮރެންސިކް އެނެލިސިސް އިން އެ އޯޑިއޯގައިވާ އަޑާއި ކްރިމިނަލް ކޯޓުގެ ގާޒީ ހުސައިން ފާއިޒު ރަޝާދުގެ އަޑާ ދިމާ ނުވާ ކަމަށް ބަޔާންކޮށްފައިވެ އެވެ،" ޖޭއެސްސީން ބުންޏެވެ.

އެހެންކަމުން، ގާޒީ ފާއިޒުގެ ސަސްޕެންޝަން އުވާލަން މިއަދު ބޭއްވި އެ ކޮމިޝަންގެ ބައްދަލުވުމުން ވަނީ ނިންމައިފަ އެވެ.

އިތުރަށް ކިޔާލަން -