ރައުދު އެއްބާރުލުމެއް ނުދޭ؛ ހައްޔަރުކުރަން އަމުރަކަށް އެދިއްޖެ

މިދިޔަ ހުކުރު ދުވަހުގެ ފަތިހު ހެންވޭރުގެ ގެއަކުން 21 އަހަރުގެ ޒުވާން އަންހެން ކުއްޖަކު ވެއްޓުނު ހާދިސާގައި ހިމެނޭ ފިރިހެން މީހާ، ރައުދު އަހުމަދު ޒިލާލު ތަހުގީގަށް އެއްބާރުލުން ނުދޭތީ އޭނާ ހައްޔަރު ކުރަން ކޯޓު އަމުރަކަށް އެދިއްޖެ އެވެ.

މައްސަލައިގެ ފެށުން - ހެންވޭރުގައި ހުންނަ ގެއެއްގެ ފުރާޅު މައްޗަށް ހައްވާ ޔުމްނު ރަޝީދު، 21، ގ. ރަނައުރާގެއާގެ ވެއްޓިފައި އޮއްވާ ފެނުނީ މިދިޔަ ހުކުރު ދުވަހު ހެނދުނެވެ. ހާލު ދެރަވަގެން ގޮސް، ޖެހިގެން އައި ހޮނިހިރު ދުވަހު ވެންޓިލޭޓަރަށްލީ ކަމަށް އައިޖީއެމްއެޗުން ބުންޏެވެ. އެ އަންހެން މީހާ ދެ ދުވަސް ފަހުން ވެންޓިލޭޓަރުން ވަނީ ނަގާފަ އެވެ.

ރައުދަކީ އަންހެން މީހާ ވެއްޓުނު ގެއަށް އޭނާއާ އެކު ވަތް މީހާ އެވެ.

ވީ ކިހިނެއް؟ - "ރެއާ ހަމައަށް އަޅުގަނޑުމެން މި ކުރި މަސައްކަތުން ފާހަގަކުރަނީ، ކޮރޮބަރޭޝަންގެ މައްސަލަ އެބައުޅޭ ރައުދުގެ ފަރާތުން. ރައުދު އަލުން ހައްޔަރު ކުރުމަށް އަޅުގަނޑުމެން މިހާރު ވަނީ ކޯޓު އަމުރަކަށް އެދިފައި،" އެސިސްޓެންޓު ކޮމިޝަނާ އޮފް ޕޮލިސް އިސްމާއިލް ނަވީން މިއަދު ނޫސްވެރިންނަށް ވިދާޅުވި އެވެ.

ތަފްސީލް - އެ މައްސަލާގައި ފުލުހުން ކުރިން ބޭއްވި ފުރަތަމަ ނޫސްވެރިންގެ ބައްދަލުވުމުގައި ބުނެފައިވަނީ:

"ކެނަބިސްއަށް ފިރިހެން މީހާ ޕޮޒިޓިވްވެފައިވީ ނަމަވެސް، އެ ނޫން ވެސް ބާވަތްތަކުގެ ޑްރަގު ދެ މީހުން ނަގާފައިވާކަން ތަހުގީގަށް އެނގިފައިވޭ،" ނޫސްވެރިންގެ ބައްދަލުވުމުގައި ޑެތު އެންޑް ހޯމިސައިޑް ޑިޕާޓްމަންޓްގެ ވެރިޔާ، ޗީފް އިންސްޕެކްޓާ ސާމިހު މުހައްމަދު ވިދާޅުވި އެވެ.

މަސްތުވާތަކެއްޗަށް ޕޮޒިޓިވްވި ނަަމަވެސް ރައުދު ހައްޔަރުކޮށްފައި ނުވާތީ އެކަމާ އާންމުން ވަނީ ކަންބޮޑުވުން ފާޅުކޮށްފަ އެވެ.

ރައުދު ހައްޔަރުކުރަން އަމުރަކަށް އެދިފައި މިވަނީ އެ ހާދިސާއަށް ހަފްތާއެއް ވަނިކޮށެވެ. އެ މައްސަލާގައި އިންސާފުވެރި ތަހުގީގެއް ހިންގުމަށް ގޮވާލާ މާލޭގައި ރޭ ވަނީ ޒުވާނުން މުޒާހަރާ ވެސް ކޮށްފަ އެވެ.