ޒުވާނާ ވެއްޓުމާއި ކަން ހިނގި ގޮތް؛ ވަށައިގެންވާ އެތައް ކަމެއް

މިދިޔަ ހުކުރު ދުވަހުގެ ފަތިހު ހެންވޭރުގެ ގެއަކުން 21 އަހަރުގެ ޒުވާނަކު ވެއްޓުނު ހާދިސާ ހިނގި ގޮތާ ގުޅޭ ގޮތުން ފެތުރެމުން ދަނީ އެކި އަޑެވެ. އެއް ބަޔަކު ސުވާލު އުފައްދަނީ އޭނާ ވެއްޓުނީ ހ. ފެންޓެނޯއީގޭގެ ކޮން ފަންގިފިލާއަކުން ހެއްޔެވެ؟ އޭނާ ފުންމާލީ ހެއްޔެވެ؟ ނުވަތަ ވައްޓާލީ ހެއްޔެވެ؟ އެ މީހުން އެ ގެއަށް ވަނީ ކީއްވެ ހެއްޔެވެ؟

ފުލުހުން އެކަމާ ގުޅޭ ގޮތުން ބުނެފައި ވަނީ ޒުވާނާ ވެއްޓުނީ ބުރުޒުމަގުގައި ހުންނަ ފެންޓެނޯއީގޭގެ ނުވަ ވަނަ ފަންގިފިލާގެ ސިޑިމައްޗަށް ވާ ގޮތަށް ހުންނަ ދެ ދޮރުގެ ފެންލައިޓަކުން ކަމަށެވެ. އޭނާ ވެއްޓުމުގައި އެއްވެސް މީހެއްގެ ބައިވެރިވުމެއް ނެތްކަމުގެ ޔަގީންކަން ވެސް ފުލުހުން ދީފައިވެ އެވެ.

'ދައުރު'ން ބެލި ސީސީޓީވީ ވީޑިއޯތަކާއި ކަމުގެ މައުލޫމާތު އެނގޭ ބައެއް ފަރާތްތަކުން އެއްކުރި މައުލޫމާތުތަކާއި ފުލުހުން އާންމުކުރި ބައެއް ކަންކަމުގެ މައްޗަށް އިތުރަށް ބަލައި ހޯދައި ދިރާސާކުރުމަށް ފަހު މިއީ ކަން ހިނގާފައިވާ ގޮތް ކަމަށް މިހާތަނަށް ލަފާކުރެވޭ ޓައިމްލައިނެކެވެ. 

މިއީ ޔުމްނު ރަޝީދު، 21، ގ. ރަނައުރާގެއާގެ ފުރާޅުމައްޗަށް ވެއްޓުމުގެ ގާތްގަނޑަކަށް ފަސް ގަޑިއިރު ކުރި އެވެ. ޔުމްނު ހިމެނޭހެން ގާތްގަނޑަކަށް އަށް މީހަކު، ރަށްދެބައި މަގުގައި ހުންނަ މއ. މާންދޫގޭ ދެކުނުގެއަށް ވަންނަނީ ދަންވަރު 12:00-12:30 ދެމެދުގެ ވަގުތެއްގަ އެވެ. އެ މީހުން އެ ގެއަށް ޖަމާވެފައި ވަނީ އުފަން ދުވަހުގެ ޕާޓީއަކަށެވެ. އެ ގެއަކީ ޓްރާންސްޕޯޓް މިނިސްޓަރު މުހައްމަދު އަމީން އާއި އޭނާގެ އެއްބަޑު އެއްބަފާ މީހުންގެ ގެއެކެވެ. 

ފުލުހުން ބުނަނީ އެ އަށް މީހުންގެ ތެރޭ ހިމެނެނީ ފަސް ފިރިހެނުންނާއި ތިން އަންހެނުން ކަމަށެވެ. އޭގެ ތެރޭގައި ޔުމްނު އާއި ރައީސް އޮފީހުގެ އަންޑަސެކްރެޓަރީގެ މަގާމުގައި ހުރި އަހުމަދު ދާއޫދުގެ ކޮއްކޮ، ރަައުދު އަހުމަދު ޒިލާލު، 21، ހިމެނެ އެވެ. އެ މީހުން އެ ގޭގައި ހަތަރު ގަޑިއިރު ހޭދަކުރި ކަމަށް ފުލުހުން ބުންޏެވެ. ގާތްގަނޑަކަށް ހަތަރު ގަޑިއިރު އެގޭގައި ހޭދަކުރުމަށް ފަހު ޔުމްނު އާއި ރައުދު ހިމެނޭ ގޮތަށް ހަތަރު މީހުން އެ ގެއިން ނުކުމެފައިވާކަން ފުލުހުން ޔަގީންކޮށްދެ އެވެ. 

ޔުމްނު އާއި ރައުދު ހިމެނޭހެން ހަތަރު މީހުން މާންދޫގެ ދެކުނުގެއިން ނުކުމެގެން ދިޔައީ ފަތިހު 3:40 އެހާކަންހާއިރު ކަމަށް ފުލުހުން ބުންޏެވެ. އެ ހަތަރު މީހުން ދެން ދަނީ، އަމީނީމަގު ސްޓެލްކޯ ކުރިމައްޗަށް ވާ ގޮތަށް ހުންނަ ކަށިވެލިގެ އަށެވެ. އެއީ އެ ގުރޫޕްގައި ހިމެނޭ ޒުވާނަކު ދިރިއުޅޭ ގެއެކެވެ. 

އެ ގޭގައި ގާތްގަނޑަކަށް 15 ވަރަކަށް މިނެޓު އެ ހަތަރު މީހުން ހޭދަކުރުމަށް ފަހު، އަނެއްކާ އެ މީހުން އެކުގައި އެ ގެއިން ނުކުތީ ފަތިހު 4 ޖަހާއެހާކަންހާއިރު އެވެ. ޔުމްނު އާއި ރައުދު އަމީނީމަގުން ހިނގާފައި ކަލާފާނު ސްކޫލާ ދިމާލަށްދާ މަންޒަރު އެ ސަރަހައްދުގައި ހުރި ސީސީޓީވީ ފުޓޭޖްތަކުން ފެނެ އެވެ. އަނެއް ދެ މީހުން ދިޔައީ ސައިކަލެއްގައި އެކުގަ އެވެ.

ބުރުޒު މަގު އެވިޑް ކޮލެޖްގެ ބޭރުގައި ހަރުކޮށްފައިވާ ކެމެރާގެ ވީޑިއޯއިން ފެންނަ ގޮތުގައި ފަތިހު 4:30 އެހާކަންހާއިރު ޔުމްނު "ދެކޮޅަށް ކިރެމުން" ކަހަލަ ގޮތަކަށް ހުސްފަޔާ އެކަނި ހިނގާފައި ބުރުޒު މަގުން މާފަންނާ ދިމާލަށް މަގުގެ ކަނާތް ފަރާތުން ހިނގާފައިދެ އެވެ. ފާރުގައި އަތް ހާކަމުން، ފެންޓެނޯއީ ގެއަށް އެކަނި ވަންނަ ތަން ވެސް ފެނެ އެވެ. 

ކުރިން އެމީހުން ވަތް ކަށިވެލިގެ އާއި ފެންޓެނޯއީގެއާ ދެމެދު ހުންނަނީ ތިން ވަރަކަށް މިނެޓްގެ ތެރޭގައި ހިނގާފައި ދެވޭހާ ދުރުމިނެވެ.

ޔުމްނު ފެންޓެނޯއީގެއަށް ވަންތާ ސިކުންތު ކޮޅެއްގެ ތެރޭ ރައުދު، ބުރުޒުމަގުގެ ވާތް ފަރާތުން ސައިކަލުތައް ކައިރިން ފެންޓެނޯއީގެ ކުރިމަތިން ލާފައި މާފަންނާ ވީކޮޅަށް ރައުދު ކުރިއަށްދާތަން ފެނެ އެވެ. ރައުދުގެ ހަރަކާތްތަކުން ޔުމްނު ފެންޓެނޯއީގެއަށް ވަންކަން އޭނާއަށް އެނގޭހެން އޭރު ހިއެއްނުވެ އެވެ. އެއީ މީހަކު ފެނޭތޯ އެ ހިސާބުގެ ހަނި ގޯޅިއެއް ވެސް ބަލާތަން ފެންނާތީ އެވެ. އޭގެ އިތުރުން:

ފުލުހުންގެ ޑެތު އެންޑް ހޯމިސައިޑް ޑިޕާޓްމަންޓުގެ ވެރިޔާ، ޗީފް އިންސްޕެކްޓަރު ސާމިހް މުހައްމަދު ވިދާޅުވި ގޮތުގައި ފެންޓެނޯއީގެ ދޮރު ހުންނަނީ ތަޅުލާފައެއް ނޫނެވެ. ކޮންމެ މީހަކަށް ވެސް ބޭރުން ގޮސް ވަދެވެ އެވެ. އެކަމަކު، ހާދިސާއަށް ފަހު އެ ދޮރު ވަނީ މިހާރު ތަޅުލެވޭ ގޮތް ހަދައިފަ އެވެ. 

މިއީ އެ ދެ މީހުންނާ އެއްވެސް ގުޅުމެއް އޮތް އަދި އޭގެ ކުރިން ވަދެފައިވާ ގެއެއް ވެސް ނޫން ކަމަށް ފުލުހުން ބުނެ އެވެ. ސާމިހުގެ އެ ވާހަކަތައް އެ ގޭގެ ބައެއް ވެރިން 'ދައުރު'އަށް ކަށަވަރުކޮށްދިނެވެ.

"ދެ މީހުން އެ ގެެއަށް ވަދެފައި ވަނީ ދެވޭ ނުވޭ ތަނެއް ނޭނގި، މަސްތުގެ ހާލަތުގައި ހުރެ ކަން އަމަލުތަކުން އެނގޭ،" އެގެެއަށް އެމީހުން ދިޔަ ސަބަބާ ގުޅޭ ގޮތުން ސުވާލު ކުރުމުން ސާމިހު ވިދާޅުވި އެވެ.

އެ ގޭގެ ބައެއް މީހުން 'ދައުރު'އަށް ކިޔައިދިން ގޮތުގައި ޔުމްނު ވެސް އަދި ރައުދު ވެސް އެ ގެއަށް އައިސް އުޅޭތަން ފެނިފައެއް ނުވެ އެވެ. އެ ގޭގައި ދިރިއުޅޭ އެއްވެސް ބަޔަކާ އެ މީހުންނާ ގުޅުމެއް ނޯންނަ ކަމަށް ވެސް ބުންޏެވެ. 

ޓެރަސްއާ އެކު ޖުމްލަ ނުވަ ފަންގިފިލާ ހުންނަ ފެންޓެނޯއީގޭގެ ބައެއް ފަންގިފިލާތަކުގައި ސީސީޓީވީ ކެމެރާ ނުހުރެ އެވެ. ބައެއް ފްލޯތަކުގައި ކެމެރާތައް ހަރުކޮށްފައި ހުރީ އެ ތަންތަނުގައި އުޅޭ މީހުން އަމިއްލައަށެވެ. އޭގެ ތެރެއިން ބައެއް ކެމެރާތަކުން އަޑު ވެސް  ރެކޯޑްވެ އެވެ. އެއީ، ކުލައުޑް ބޭސްޑް ހަރަކާތްތައް ކެމެރާއަށް އެރުމުން ރެކޯޑްވާ ޒާތުގެ ކެމެރާތަކެއްކަން ފާހަގަވި އެވެ. 

'ދައުރު'ން ބެލި އެ ގޭގެ ބައެއް ސީސީޓީވީ ކެމެރާގެ ވީޑިއޯތަކުން ފެންނަ ގޮތުގައި އެ މީހުން އެ ގޭގެ އެއްވެސް އެޕާޓްމަންޓަކަށް ވަދެފައިވާ ކަމަށް ނުބެލެވެ އެވެ. އެ މީހުން މުޅިން ވެސް އުޅެފައި ވަނީ 7،8،9 ވަނަ ފަންގިފިލާގެ ސިޑިމަތީގަ އެވެ. އެކަން އެނގެނީ ލިބުނު ސީސީޓީވީ ފުޓޭޖުތަކުން އެ މީހުން އެގޭ ތެރޭ ހޭދަވި ވަގުތާއި އެ މީހުން ސިޑީމަތީ އުޅޭތަން ފެންނަ ވަގުތުތައް  ގުޅުވާލުމުންނެވެ. 

ބައެއް ސީސީޓީވީ ފުޓޭޖްތަކުން ފެންނަ ގޮތުގައި ދެ މީހުން ގޭގެ ސިޑިމަތީ ދެ ލޯބިވެރިން ފަދައިން އުޅުނެވެ. އެ މީހުން ޒުވާބު ކުރާތަނެއް ނުވަތަ ގަދަކަމުން ކަމެއް ކުރާ ޒާތުގެ ހަރަކާތްތަކެއް ވެސް ނުފެނެ އެވެ. ނަމަވެސް އެ މީހުން ހޭލި މޭލިވެ އުޅޭ ގޮތުން އެ މީހުން ތިބީ މުޅިން ހަމަ ބުއްދީގައި ނޫންކަން ފާހަގަވެެ އެވެ. 

ޔުމްނު ވެއްޓުމުގެ ގާތްގަނޑަކަށް މިނެޓެއް ކުރި އެވެ. ސީސީޓީވީ ފުޓޭޖުން ފެންނަ ގޮތުގައި ޔުމްނު އާއި ރައުދު ނުވަ ވަނަ ފަންގިފިލާގެ ސިޑި ކައިރީ ތިބެ ވާހަކަތަކެއް ދައްކަ އެވެ. އޭރު ޔުމްނު ހުރީ ރައުދު އެ ގެއަށް ވަންއިރު ލައިގެން ހުރި ޓީޝާޓްގަ އެވެ. ނުވަ ވަނަ ފަންގިފިލާއަށް އަރާ ސިޑި ކައިރީ ހުރެގެން އޭނާ އެ ޓީޝާޓްލާތަން ނުވަ ވަނަ ފަންގިފިލާގެ ސީސީޓީވީ ފްޓޭޖަށް ރެކޯޑްވެފައިވެ އެވެ. ރައުދު ހުރީ ޓީޝާޓެއް ނުލަ އެވެ. ދެން ޔުމްނު އެކަނި ޓެރަސްއަށް ދެވެން ހުންނަ ސިޑިން މައްޗަށް އަރާތަން ފެނެ އެވެ. ރައުދު އަނެއްކާ ވެސް ސިޑިން ތިރިއަށް ފައިބައިގެންދެ އެވެ. 

އެ މަންޒަރުތައް ފެންނަނީ ނުވަ ވަނަ ފަންގިފިލާގައި ހުރި ކެމެރާއަކުންނެވެ. ޓެރަސްއަށް އެރެން ހުންނަ ސިޑި ފެންނަ ގޮތަށް އެންމެ މަތީގައި ކެމެރާއެއް ހަރުކޮށްފައެއް ނުހުރެ އެވެ. ނުވަ ވަނަ ފަންގިފިލާގެ މައްޗަށް ހުންނަނީ ޓެރަސް އެވެ. އެ ތަނަށް އަރަން ހުންނަ ސިޑީގައި ކެމެރާ ނުހުންނަނީ އެވެ. 

ޔުމްނު މައްޗަށް ދިޔަތާ ސިކުންތު ކޮޅެއް ފަހުން އަނެއްކާ ވެސް ސިޑިން ނުވަ ވަނަ ފަންގިފިލާއަށް އޭނާ ފައިބަ އެވެ. އޭރު ރައުދު އެ ފަންގިފިލާގައި ނެތެވެ. އޭރު ޔުމްނުގެ ހަރަކާތްތައް ވަރަށް އަވަސްވެފައި ހުރިކަން ފާހަގަވެފަ އެވެ. އޭނާ ފާރުގައި އަތް ކާއްތަމުން ގޮސް ނުވަ ވަނަ ފަންގިފިލާގައި ހުރި ދެ އެޕާޓްމަންޓެއްގެ ދޮރުގައި ހިފައި ހުޅުވޭތޯ މަސައްކަތްކުރި އެވެ. 

އެތަނުން އެއް އެޕާޓްމަންޓުގައި ބަޔަކު ނޫޅެ އެވެ. އަނެއް އެޕާޓްމަންޓުގައި ދެމަފިރިއަކާއި އޭނާގެ ކުދިން ދިރިއުޅެ އެވެ. 

އެޕާޓްމަންޓުގެ ދޮރުގައި ހިފުމަށް ފަހު ވަރަށް އަވަސް އަވަހަށް އައިޝާ އަނެއްކާ ވެސް ޓެރަސްއަށް އެރެން ހުންނަ ސިޑިން މައްޗަށް ދާތަން ފެނެ އެވެ. އޭރު ވެސް ރައުދު ތިރިއަށް ދިޔަ ގޮތަށް އެ ފަންގިފިލާއަކަށް ނާރަ އެވެ. 

މާ ގިނައިރުތަކެއް ނުވެ ދެން ވީޑިއޯއިން ކުއްލިއަކަށް އިވެނީ ދަގަނޑު ގަނޑެއްގެ މައްޗަށް އެއްޗެއް ވެއްޓޭ ކަހަލަ އަޑެކެވެ. ފުލުހުން ބުނާ ގޮތުގައި އެއީ ޔުމްނު ވެއްޓުނު އަޑުކަން ތަހުގީގަށް ވަނީ ކަށަވަރުވެފަ އެވެ. ނަމަވެސް ޓެރެސްއަށް އަރާ ސިޑި ފެންނަ ގޮތަށް އެންމެ މަތީގައި ކެމެރާ ނުހުންނާތީ އެ މަންޒަރު ފެންނަ ވީޑިއޯއެއް ނެތެވެ. 

އެ އަޑު އިވުނުއިރު ރައުދު ހުރީ ހަތް ވަނަ ފަންގިފިލާގަ އެވެ. އެތާ ހުރުމަށް ފަހު އޭނާ އަނެއްކާ ވެސް މަތީ ފަންގިފިލާއަށް އަރާތަން ފެނެ އެވެ. އޭނާގެ ހަރަކާތްތައް ހުރި ގޮތުން ބެލެވެނީ ޔުމްނު ހޯދަނީ ކަމަށެވެ. 

އެ އަޑު އިވުނު ފަހުން ސީސީޓީވީގެ ވީޑިއޯއަކަށް ޔުމްނު އަރާފައެއް ނުވެ އެވެ. ދެން ފެންނަނީ ރައުދު "ލޫލޫ"އޭ ކިޔާ ގޮވަމުން ޔުމްނު ފެނޭތޯ އުޅޭތަނެވެ. ޓެރަސްއަށް ދެވެން ހުންނަ ސިޑިން މައްޗަށް ވެސް އަރަ އެވެ. އެގޮތަށް ސިޑިން މައްޗަށް ފައިބައި އަރައި ލިފްޓަށް ވެސް އަރައި، 10 ވަރަކަށް މިނެޓެއްހާއިރު އެހެން އޭނާ އުޅުނެވެ. އެހެން އުޅެމުން އަށް ވަނަ ފަންގިފިލާގެ ސިޑި ކައިރީ ހުރި ކުޑަ ދޮރު ހުޅުވާ ބޭރު ބަލައި "ލޫލޫ"އޭ ގޮވާ ވެސް ހެދި އެވެ. 

ގޭގެ ފަރާތުން ވާހަކަ ދެއްކި މީހަކު ބުނި ގޮތުގައި އެހެން ރޭރެއެކޭ ވެސް އެއްގޮތަށް އެ ރޭ ވެސް ހުރީ ޓެރަސްގެ ދޮރު ތަޅުލައިފަ އެވެ. އެހެންވެ ޔުމްނު އާއި ރައުދު ވެސް ޓެރަސްއަށް އެރުމުގެ ފުރުސަތެއް ނެތެވެ. އޭނާ ބުނި ގޮތުގައި އެ ހާދިސާއަށް ފަހު ބެލިއިރު ޓެރަސްގެ ދޮރު ހުރީ ތަޅުލައިފަ އެވެ. އަދި ދޮރު ހުޅުވާފައިހުރިކަން ފާހަގައެއް ނުވެ އެވެ.

އެ ގޭގައި ދިރިއުޅޭ ބައެއް މީހުން ބުނި ގޮތުގައި އެ ވަގުތާ ދިމާކޮށް ބާރު އަޑެއް ބައެއް މީހުންނަށް އިވުނެވެ. އެ އަޑު އިވިގެން ބޭރު ބެލި މީހުން ބަލާފައި ވަނީ ބުރުޒު މަގާ ދިމާލަށް ހުންނަ ބެލްކަނިންނެވެ. 

އެހެންވެ ފުލުހުން ބުނެފައި ވަނީ ޔުމްނު ވެއްޓުނީ ނުވަ ވަނަ ފަންގިފިލާއިން، ޓެރަސްއަށް އަރަން ހުންނަ ސިޑި ކައިރީގައިވާ ދެ ދޮރު ލީ ފެންލައިޓެއް ކަހަލަ ކުޑަ ދޮރަކުން ކަމަށެވެ. ކޮންމެ ކުޑަ ދޮރެއްގެ އުސްމިނުގައި ދެ ފޫޓް އަދި ފުޅާ މިނުގައި ދޮޅު ފޫޓު ވަރު ހުރެ އެވެ. ޔުމްނުގެ އިސްކޮޅުގައި ހުންނަ މީހަކަށް ވެސް އަތް އަޅުވާފައި އެ ކުޑަދޮރުގެ މައްޗަށް އެރިދާނެ ކަމަށް ބެލެވެ އެވެ. 

އެ ކުޑަ ދޮރުން ބޭރު ބެލުމުން ފެންނަނީ ހ. މިޓާޒުގޭގައި ހަދާފައިވާ ގުދަނެއްގެ ފުރާޅު މައްޗެވެ. އަދި ޔުމްނު ވެއްޓިފައި އޮތް ކަމަށް ފޮޓޯތަކުން ފެންނަ ފުރާޅުގެ އެދިމާ އެ ކުޑަދޮރުން ވަރަށް ރީއްޗަށް ފެނެ އެވެ.

އެތަނުން މީހަކު ވެއްޓޭނީ މިޓާޒުގޭ ގުދަނުގެ ބުރުޒުމަގާ ވީ ކޮޅަށްކަން، ޔުމްނު ވެއްޓުނު ދޮރާ ދިމާލު ތިރި ބެލުމުން އެނގެ އެވެ. ބޭރުން ބަލާއިރު އެހެން ގޮތަކަށް ފެނުނަސް ގޭގެ އެތެރެއިން، އެ ކުޑަދޮރުން ބެލުމުން ފެންނަނީ ޔުމްނު ވެއްޓިފައި އޮތް އެ ފުރާޅުގެ ދިމާލެވެ. އަދި އޭނާ ވެއްޓެމުން ދާއިރު އޭސީ އައުޓްޑޯ ޔުނިޓެއްގައި ނުވަތަ ތިރީ ފަންގިފިލާގެ ކުޑަދޮރެއް ހުޅުވާފައި ހުރި ނަމަ ޖެހުމުގެ ފުރުސަތު ވެސް އޮންނާނެ އެވެ.

އޭނާއަށް ލިބިފައިވާ ސީދާ ޒަހަމްތައް ނޭނގޭތީ މަތިން ވެއްޓުނުއިރު އޭނާ ތަނެއްގައި ޖެހުނު ކަމެއް ނުވަތަ ނޫން ކަމެއް ނޭނގެ އެވެ. 

ޔުމްނު ވެއްޓުނު ފަހުން 10-15މިނެޓް ވަންދެން ފެންޓެނޯއީގޭގެ އެކި ފަންގިފިލާތަކަށް ރައުދު އެރުމަށް ފަހު، އޭނާ އެ ގެއިން ނުކުމެގެން ދަނީ ފަތިހު 5:10 ވީ ފަހުންނެވެ. އޭގެ ފަހުން އޭނާ އެ ގެއަށް ވަދެފައިވާ ކަމަށް ސީސީޓީވީ ކެމެރާގެ ފުޓޭޖްތަކުން ފާހަގައެއް ނުވެ އެވެ. އަދި ޔުމްނު ނުފެނިގެން އެ ވަގުތު މަގުމަތިން ދިޔަ މީހުން ކައިރީ ރައުދު އޭނާ ފެނުނުތޯ އެހި ކަމަށް ފުލުހުން ބުނެފައިވެ އެވެ.  

"ފިރިހެން މީހާ [ރައުދު] އޭނާގެ ރައްޓެހިން ގާތު މި ވާހަކަ ދައްކާފައިވާކަން ތަހުގީގަށް އެެނގިފައިވޭ. ނަމަވެސް އޭނާގެ ހާލަތު ހުރި ގޮތުން އެއްވެސް މީހަކަށް އެވާހަކަ ގަބޫލުކުރަން ދަތިވި ކަމަށް މައުލޫމާތު ލިބެނީ،" ސާމިހު ވިދާޅުވި އެވެ.

މިއީ ޔުމްނު ވެއްޓުނުތާ ގާތްގަނޑަކަށް ދެ ގަޑި އިރާ ބައި ފަހެވެ. މިޓާޒުގޭގެ ފުރާޅުމައްޗަށް އަންހެނަކު ވެއްޓިފައި އޮތް ކަމުގެ ރިޕޯޓް އާންމު ފަރާތުން ކުރީ ހުކުރު ދުވަހުގެ ހެނދުނު 7:23ގަ އެވެ. އެގޮތުން ފުލުހުން ބުނީ:

މިހާރު އާންމުވެގެން އުޅޭ ވީޑިއޯއިން ވެސް ފެންނަނީ ސިފައިންގެ ފަޔާ ރެސްކިއުގެ މީހަކު އޭނާ ވެއްޓިފައި އޮއްވާ އެތަނުން ނެގުމަށް ފުރާޅުމައްޗަށް އަރާ އުޅޭ މަންޒަރެވެ. 

މި ތަހުގީގަށް ފުލުހުން ބަލާ ފާސްކޮށްފައިވަނީ، ރައުދު ދިރިއުޅޭ ގެ އެކަންޏެވެ. ފުލުހުން ބުނި ގޮތުގައި އެމީހުން އެންމެ ފުރަތަމަ ދިޔަ ދެ ގެ ބަލާ ފާސްނުކުރީ ތަހުގީގަށް "މިހާތަނަށް އެއީ ޒަރޫރަތެއް އޮތް ކަމަށް ނުބެލެވޭތީ" އެވެ. ނަމަވެސް ތަހުގީގަށް ކުރަން ޖެހޭ ކޮންމެ ކަމެއް ކުރާނެ ކަމުގެ ޔަގީންކަން ފުލުހުން ދިނެވެ.

މި ހާދިސާ ހިނގި ގޮތް ހޯދުމުގައި، އެރޭ އެ ދެ މީހުން ކުރިން ދިޔަ ދެ ގޭގައި ކުރި ކަމެއް، ހިނގި ކަމެއް އެނގުމަކީ މުހިންމު ކަމެއް ނަމަވެސް ފުލުހުންގެ ތަހުގީގުން އަދި އެކަމެއް ނުހޯދެ އެވެ. އެކަމަށް އެހާ ބޮޑަކަށް ނުބަލަ އެވެ. އެގޮތުން:

ފުލުހުން ބުނި ގޮތުގައި ޔުމްން އާއި ރައުދުގެ ޓެސްޓުތަކުގެ ވަގުތީ ނަތީޖާއިން ދައްކާ ގޮތުން ދެ މީހުން ވެސް މަސްތުވާތަކެއްޗަށް ޕޮޒިޓިވް އެވެ. ދެން ތިބި މީހުން ސާމްޕަލް ނެގުމަށް ދެކޮޅު ހެދުމުން އެމީހުންގެ ސާމްޕަލް ފުލުހުން އަދި ނުނަގަ އެވެ. އެއީ ވެސް މީހުން ސުވާލު އުފައްދާ ކަމެކެވެ. ފުލުހުން އެހާ ފަސޭހައިން އެ މީހުން ދޫކޮށްލުމުންނެވެ. 

"ދާއިމީ ނަތީޖާ ދައްކާ ގޮތުން ފިރިހެން މީހާ ޕޮޒިޓިވްވެފައި ވަނީ ކެނަބިސްއަށް. ނަމަވެސް އެމީހުން އެހެން ބާވަތްތަކުގެ ޑްރަގު ނެގިކަން ތަހުގީގަށް އެނގޭ،" ސާމިހް ވިދާޅުވި އެވެ.

މި ރިޕޯޓަށް އާއިލާގެ ބަހެއް ހޯދުމަށް މަސައްކަތް ކުރި ނަމަވެސް މިވަގުތު އާއިލާއިން، އެ މީހުންގެ ކަންބޮޑުވުންތައް މީޑިއާއަށް ތިލަކުރަން ބޭނުން ނުވާ ކަމަށް ބުނެ ވާހަކައެއް ނުދެއްކި އެވެ. 

ކޮންމެ ގޮތަކަށް ކަން ހިނގިއަސް ފުލުހުންގެ ތަހުގީގު ފަށަން ޖެހެނީ ދަންވަރު ފެށުނު އުފަންދުވަހުގެ ޕާޓީއާ ހަމައިންނެވެ. ދެން އެއަށް ފަހު ކަންކަން ނިއުޅިގެން އައި ގޮތެވެ. އެއީ އަދި ނޭނގުމެއްގެ ތެރޭގައި އޮތް ކަމެކެވެ. އެ ހިސާބަށް އަންހެން ކުއްޖަކު ދިޔަ ގޮތާއި އެކަމުގެ ހިމެނޭ ހުރިހާ ކަމަކަށް ބަލައިގެން ނޫނީ ފުރިހަމަ ތަހުގީގެއް މިކަމުގައި ނުހިންގޭނެ އެވެ. އަދި މި ތަހުގީގު ކުރިއަށް ދާވަރުން އާ އެތައް ކަމެއް ނިއުޅިގެން އަންނާނެ އެވެ.