އެޗްޑީސީގެ ފަޒުލް އާއި ބޯޑު މެމްބަރުން ސަސްޕެންޑުކޮށްފި

މިދިޔަ ސަރުކާރުގައި މާލޭ މީހުންނަށް ގޯތި ދޭން ހިންގި 'ބިންވެރިޔާ' ސްކީމްގެ ލިސްޓުގައި ނަން ވެސް ނެތި، އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލްގެ އެއްބަނޑު އެއްބަފާ ބޭބެއަށް ހުޅުމާލެއިން ގޯއްޗެއް ދިން ކަމަށް ބުނާ މައްސަލައާ ގުޅިގެން ފަޒުލް އާއި އެ ކުންފުނީގެ ބޯޑުގެ މެމްބަރުން މިއަދު ސަސްޕެންޑްކޮށްފި އެވެ.

ވީ ކިހިނެއް؟ - ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)ން ދެންމެ ނެރުނު ބަޔާނެއްގައި ބުނި ގޮތުގައި، އެޗްޑީސީގެ ޗެއާމަން އަހުމަދު ނާސިފް ފިޔަވައި އެހެން ހުރިހާ ބޯޑު މެމްބަރުން ވަނީ ސަސްޕެންޑްކޮށްފަ އެވެ. އެއީ ފުލުހުން ކުރިއަށް ގެންދާ ތަހުގީގަށް 'ފުރިހަމަ' އެހީތެރިކަމާއި އެއްބާރުލުން ދިނުމަށް ނިންމި ނިންމުމެއް ކަމަށް އެ ބޯޑުން ބުންޏެވެ.

ބުނީ ކީކޭ؟ - "ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވެސް މި ބޯޑުން ވަކި ގޮތެއް އަންގަންދެން އޮފީހަށް ނުނުކުމެވޭ ގޮތަށް ވަނީ ސަސްޕެންޑްކޮށްފަ އެވެ،" ޕީސީބީގެ ބަޔާނުގައި ބުންޏެވެ.

ތަފްސީލް - އެޗްޑީސީގެ ބޯޑުގައި ނާސިފް އާއި ފަޒުލް ފިޔަވައި ދެން ހިމެނިވަޑައިގަންނަވަނީ:

އެނގުން މުހިންމު - ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދަށް ބިމެއް ދިންކަމުގެ މައްސަލަ ފުރަތަމަ ތިލަވީ 'ހަސަން ކުރުސީ' ނަމުގައި އެކްސްގައި ހިންގާ ވަގު އެކައުންޓަކުން އެއާ ބެހޭ ލިއުންތަކެއް އިއްޔެ އާންމުކުރުމާ އެކުގަ އެވެ.

ލީކުކޮށްލި ލިއުންތަކުން އެނގޭ ގޮތުގައި، ހުޅުމާލޭ ދެވަނަ ފޭސްގެ އެއް ބިން ދެ މީހަކަށް ދީ، އެ ދެ މީހުން ވެސް އެ ތަނުގެ ވަށާފާރު ރާނަން އެޗްޑީސީއަށް ހުށައަޅާފައިވެ އެވެ.

ބިން ލިބިފައި ވަނީ އަސްލު ކާކަށްތޯ ކަށަވަރުކުރަން އެޗްޑީސީގެ ޑެޕިއުޓީ ޑިރެކްޓަރު އަހްމަދު އައިމަން ސޮއިކުރައްވައި މިދިޔަ ޖުލައި މަހު ހައުސިން މިނިސްޓްރީއަށް ސިޓީއެއް ފޮނުއްވި ކަމަށްވެ އެވެ.

ލީކުވެފައިވާ ސިޓީތަކަށް ބަލާއިރު އެނގޭ ކަންކަން:

އެއާ އެކު، ފުލުހުން ރޭ ވަނީ އެޗްޑީސީގެ މައި އިމާރާތަށް ވަދެފަ އެވެ.

ފަޒުލްގެ ބަސް - އެކަން ސޯޝަލް މީޑިއާއަށް ތިލަވުމާ އެކު ފަޒުލް ވަނީ ރޭ އެޗްޑީސީގައި ނޫސްވެރިންގެ ބައްދަލުވުމެއް ބާއްވަވައިފަ އެވެ. ނޫސްވެރިން ކުރި ގިނަ ސުވާލުތަކުން ރެކިވަޑައިގެން، އެއް ތައްގަނޑަކަށް ޖަވާބެއްގެ ގޮތުގައި އޭނާ ވިދާޅުވީ 'ޕްރޮސެސް' އޮންނަ ގޮތެވެ.

ފަޒުލް ތަކުރާރުކޮށް ވިދާޅުވަމުން ގެންދެވީ މައްސަލަ ފުރަތަމަ ފާހަގަކުރީ ވެސް އެޗުޑީސީއަށް ކަމަށާއި އެކަން ބަލަން ހައުސިން މިނިސްޓްރީއަށް ސިޓީ ފޮނުވީ ވެސް އެ ކުންފުނިން އިސްނައިގެން ކަމަށެވެ. އެ ހުރިހާ މަރުހަލާތަކެއް ހިނގަމުން ދިޔަކަން އެނގިވަޑައިގަންނަވާ ކަމަށް ވެސް ފަޒުލް އެއްބަސްވެވަޑައިގަތެވެ.