އެޗްޑީސީ ބިލްޑިން. (ދައުރޮ ފޮޓޯ/ އަބްދުﷲ އަނޫފް ޖުނައިދް)
ބިންވެރިޔާ ސްކީމްގެ ލިސްޓްގައި ވެސް ނެތި ފަޒުލްގެ ބޭބެއަށް ބިމެއް ދިން ކަމަށް ބުނާ މައްސަލައެއް ފުލުހުން ބަލަން ފަށައިފި
މިދިޔަ ސަރުކާރުގައި މާލޭ މީހުންނަށް ގޯތި ދޭން ހިންގި ބިންވެރިޔާ ސްކީމްގެ ލިސްޓުގައި ނަން ވެސް ނެތި، އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލްގެ އެއްބަނޑު އެއްބަފާ ބޭބެއަށް ހުޅުމާލެއިން ގޯއްޗެއް ދިން ކަމަށް ބުނާ މައްސަލައެއް ފުލުހުން ތަހުގީގުކުރަން ފަށައިފި އެވެ.
ވީ ކިހިނެއް؟ - ހޯމްލޭންޑް ސެކިއުރިޓީ މިނިސްޓަރު އަލީ އިހުސާން 'ދައުރު'އަށް ވިދާޅުވީ އެޗުޑީސީގެ ލިއެކިއުންތަކެއް ފޯޖްކުރި މައްސަލައެއްގެ ތަހުގީގު ފަށާފައިވާ ކަމަށެވެ. ނަމަވެސް އޭނާ ސީދާ ފަޒުލްގެ ނަމެއް ވިދާޅެއްނުވެ އެވެ.
ތަފުސީލް - ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދަށް ބިމެއް ދިންކަމުގެ މައްސަލަ ފުރަތަމަ ތިލަވީ 'ހަސަން ކުރުސީ' ނަމުގައި އެކްސްގައި ހިންގާ ވަގު އެކައުންޓަކުން އެއާ ބެހޭ ލިއުންތަކެއް އާންމުކުރުމާ އެކުގަ އެވެ.
އިހުސާން 'ދައުރު'އަށް ވިދާޅުވީ ބަލަމުން އަންނަނީ އެޗުޑީސީގެ ލިޔެކިޔުންތަކެއް ފޯޖްކުރި ކަމަށް ތުހުމަތުކުރެވޭ މައްސަލައެއް ކަމަށެވެ.
"ތަހުގީގު ކުރަމުން ދަނީ، ޕޮސިބަލް ޑޮކިއުމަންޓް ފޯޖަރީގެ މައްސަލައެއް. އެއީ އަޅުގަނޑުމެން ގަބޫލުކުރަނީ އޭގެން ކޮންމެވެސް އެއް ލިޔުމެއްގައި މައްސަލައެއް އުޅޭނެ ކަމަށް،" އިހުސާން ވިދާޅުވި އެވެ.
"ދެން އޭގެ ތެރެއިން ލާފައި، ކޮރަޕްޝަންގެ މައްސަލައެއް އުޅެންޏާ އޭސީސީއާ އެކު ޖޮއިންޓް އިންވެސްޓިގޭޝަނަކަށް ދާނީ."
އޭނާ ވިދާޅުވި ގޮތުގައި ފުލުހުން އެ މައްސަލަ ތަހުގީގުކުރަނީ ވަކި މީހަކަށް ތުހުމަތު އަމާޒުކޮށްގެންނެއް ނޫނެވެ.
"މި ތަހުގީގުގެ ސްކޯޕް ލީކްވި ދެ ލިޔުމަށް ލިމިޓް ވެސް ނުކުރާނެ،" ސޯޝަލް މީޑިއާގައި ލީކުކޮށްލައިގެން އުޅޭ ލިއުންތަކަށް އިޝާރަތްކުރައްވާ އިހުސާން ވިދާޅުވި އެވެ.
ލީކުކޮށްލި ލިއުންތަކުން އެނގޭ ގޮތުގައި ހުޅުމާލޭ ދެވަނަ ފޭސްގެ އެއް ބިން ދެ މީހަކަށް ދީ، އެ ދެ މީހުން ވެސް އެ ތަނުގެ ވަށާފާރު ރާނަން އެޗުޑީސީއަށް ހުށައަޅާފައިވެ އެވެ.
ބިން ލިބިފައި ވަނީ އަސްލު ކާކަށްތޯ ކަށަވަރުކުރަން އެޗްޑީސީގެ ޑެޕިއުޓީ ޑިރެކްޓަރު އަހްމަދު އައިމަން ސޮއިކުރައްވައި މިދިޔަ ޖުލައި މަހު ހައުސިން މިނިސްޓްރީއަށް ސިޓީއެއް ފޮނުއްވި ކަމަށްވެ އެވެ.
ލީކުވެފައިވާ ސިޓީތަކަށް ބަލާއިރު އެނގޭ ކަންކަން:
-
ބިންވެރިޔާ ސްކީމުން ހުޅުމާލެއިން އެއް ލޮޓް ނަންބަރަކުން ބިން ލިބިފައިވާ ކަމަށް ބުނާ ދެ ފަރާތަކުން ފަށާފާރު ރޭނުމުގެ ހުއްދައަށް އެދި އެ ކުންފުންޏަށް ހުށަހެޅި
-
އޭގެ ތެރެއިން އެ ބިން ލިބިފައިވަނީ ކޮން ފަރާތަކަށްކަން އެ ކުންފުންޏަށް އަންގަައިދޭން އެދުނު
-
އެ ލޮޓް ނަންބަރުން ބިން ލިބުނު ކަމަށް ބުނާ އެކަކީ، ފަޒުލްގެ ބޭބެ މުހައްމަދު ފަޒީލްއަށް ކަން ވެސް ސިޓީން އެނގޭ
-
އެ ސިޓީގެ ޖަވާބުގައި 15 އޮގަސްޓްގައި ހައުސިން މިނިސްްޓްރީގެ ސްޓޭޓް މިނިސްޓަރު އިބްރާހިމް ނިޒާމް ފޮނުއްވި ކަމަށް ބުނާ ސިޓީގައި ވަނީ އެ ދެ މީހުންނަކީ ވެސް ބިންވެރިޔާ ސްކީމްގެ ދަށުން ގޯތި ލިބުނު ބައެއް ނޫން ކަމަށް މިނިސްޓްރީގެ ޑޭޓާބޭސްއިން ދައްކާ ކަމަށް
-
މުހައްމަދު ފަޒީލްއަށް ބިންވެރިޔާ ސްކީމުން ގޯތި ލިބި އޭގެ އެގްރިމެންޓް ކަމަށް ''ފޯޖް' ކޮށްފައިވާ އެގްރިމަންޓެއް ވެސް ލީކްކުރި
-
ޝޯޝަލް މީޑިއާގައި ތުހުމަތުކޮށްފައިވަނީ އެއީ ފަޒުލްގެ ނުފޫޒުން ހިންގާފައިވާ ކޮރަޕްޝަނެއް ކަމަށް
-
މި މައްސަލަ ތަހުގީގުކުރަން ރައްޔިތުންގެ މަޖިލިހުގެ ޕީއެންސީގެ ހިތަދޫ މެދު ދާއިރާގެ މެންބަރު އަހްމަދު އަޒާން ވަނީ ގޮވާލައްވާފައި
This is a serious allegation. Urge relevant authorities to investigate this matter. @PoliceMv @ACC_Maldives https://t.co/WJ4BfXr5uO
— Ahmed Azaan (@axanner) December 18, 2024
މި މައްސަލާގައި ފަޒުލް އާއި އެޗްޑީސީގެ ބަހެއް ވެސް އަދި ނުލިބެ އެވެ.
ކޮމެންޓް