ޖަވާބުދާރީ ނުވެވޭނެ ކަމެއް ކޮށްފައެއް ނޯންނާނެ: ފަޒުލް

ޕްރެސް ކޮންފަރެންސް ނިންމާލެއްވުމުގެ ކުރިން ފަޒުލް ވިދާޅުވީ މިހާރު ފެންމަތިވެގެން އުޅޭ މައްސަލައާ ގުޅިގެން އެޗުޑީސީގެ އެއްވެސް މުވައްޒަފަކު ވަކިކޮށް، ޑިމޯޓްކޮށް ނުވަތަ އެއް ޑިޕާޓްމަންޓުން އަނެއް ޑިޕާޓްމަންޓަށް ވެސް ބަދަލުކޮށްފައި ނޯންނާނެ ކަމަށް. ބައްދަލުވުން ނިންމާލެއްވިކަން އޭނާ އިއުލާންކުރެއްވި އިރު ވެސް ނޫސްވެރިން ގެންދިޔައީ ސުވާލު ހުރި ކަމަށް ބުނެ، ފުރުސަތު ލިބޭތޯ ބަލަމުން.

މައްސަލަ ޖެހުނު ގޯތީގެ ވަށާފާރު ރާނަން ހުއްދަދިނީ 14 ޖުލައިގައި ހައުސިންއަށް ސިޓީ ފޮނުވުމުގެ ކުރިން ކަމަށް ފަޒުލް ވިދާޅުވި. އެ ގޯތި ލިބުނު އެކަކަށް ބޭބެ ވުމަކީ އިއްތިފާގެއް ކަމަށާއި އޭގައި އޭނާގެ އިޝޫއެއް ނެތް ކަމަށް ވެސް ވިދާޅުވި.

ފަޒުލްއާ މެދު ކުރެވޭ އެހެން ތުހުމަތުތަކާ ބެހޭ ގޮތުން ވެސް ވާހަކަ ދެއްކެވި. އޭގެ ތެރޭގައި ވިނަރެސްގެ ބައެއް ފްލެޓްތަކެއް ބަޔަކަށް ދިނުމާއި ހިޔާގައި ހަރުކުރާ 32 ލިފްޓަށް 18 މިލިއަން ޑޮލަރު ހޭދަވުން ހިމެނޭ. އޭނާ ވިދާޅުވީ "ތުހުމަތުކުރާ ކިތައްމެ ކަމެއް އޮވޭ. އެއަށް ޖަވާބުދާރީ ނުވަނީ ސޯޝަލް މީޑިއާގެ ހުރިހާ ކަމަކީ ހަގީގަތެއް ނޫން. އަޅުގަނޑުމެން އައިއިރު ނެތް ދޭނެ ވިނަރެސްއެއް. ބޮޑު މަސްއުނިގަނޑެއް ހަދާފައި އޮތީ. އަޅުގަނޑުމެން އައިސް އެ ހުރިހާ ކަމެއް ރަނގަޅުކޮށް ދީފައި ހުންނާނީ މި ސަރުކާރުން."

"އަޅުގަނޑު މިތަން ހިންގަން މި އިންނަނީ. މިތަނުގައި ކަމެއް ފެންމަތިވެގެން އައިމާ އެނގޭނެ އަޅުގަނޑަށް. އަޅުގަނޑަށް އެނގިގެން ސިޓީ ފޮނުވާފައި އޮތީ. ދެން މިއީ އާންމުންގެ މަސްލަހަތާ ގުޅިފައި އޮތް ކަމެއް. އަޅުގަނޑު ބޭނުންވޭ ޖަވާބެއް ދޭއިރު އެކަންކަން ފުރިހަމަތޯ ޔަގީންކުރަން."

އެޗުޑީސީން ހައުސިންއަށް ފޮނުވި ސިޓީގެ ޖަވާބުގައި ބުނެފައި އޮތީ މައްސަލަ ޖެހުނު ޕްލޮޓް ލިބުނު ކަމަށް ލިއުންތަކުން ދައްކާ ފަޒުލްގެ ބޭބެ މުހައްމަދު ފަޒީލް ހަސަންކަން ފަޒުލްއަށް އެނގިވަޑައިގެންނެވި ހިސާބުން އެކަން ނުބެލީ ކީއްވެގެންތޯ ސުވާލުކުރުމުން ފަޒުލް މަސައްކަތްކުރެއްވީ ލިއުމެއްގެ ސައްހަކަން ބެލުމަކީ އެޗުޑީސީގެ ކަމެއް ނޫން ކަމަށް ދައްކަވަން.

ފަޒުލްއާ އެންމެ ބޮޑަށް ކުރި އެއް ސުވާލަކީ މި އަހަރުގެ ޖުލައި މަހު އެނގުނު ކަމެއްގައި މިހާ ހިސާބަށް ވެސް އެކަން ނުބެލި އޮތީ ކީއްވެގެންތޯ. އޭގެ ޖަވާބުގައި އޭނާ ވިދާޅުވީ އެހެން ފަރާތްތަކާ ވެސް ގުޅިގެން ކުރަން ޖެހޭ ކަންކަން ހުންނަ ކަމަށް. 

ފަޒުލް ވިދާޅުވީ ދެ ޕްލޮޓްގެ މައްސަލަ ބަލަން އުޅުނީ ވެސް އެޗުޑީސީން ކަމަށް. އާއިލާގެ ގުޅުމަށް ނުބަލާ އެކަން ޔަގީންކުރުމުގެ ގޮތުން އެޗުޑީސީން އިސްނެގިކަން ތަކުރާރުކޮށް އޭނާ ވިދާޅުވި. 

ފަޒުލް ވިދާޅުވީ އޭނާގެ އަބުރު ކަތިލަން ނުވަތަ ސިޔާސީ މަންފާއެއް ހޯދަން ބަޔަކު އުޅޭ އިރު އެ ހުރިހާ ކަމަކަށް ފުރިހަމަށް ޖަވާބުދާރީވަން ތައްޔާރަށް ހުންނެވި ކަމަށް. އަދި އޭނާއަށް ޖަވާބުދާރީ ނުވެވޭނެ އެއްވެސް ކަމެއް ކުރައްވާފައި ނުވާނެ ކަމަށް ވެސް ވިދާޅުވި. 

ހައުސިން މިނިސްޓްރީން ސާފުކުރަން ހުށައެޅީ ދެ ޕްލޮޓެއްގެ މައުލޫމާތު ހޯދައި، ވެރިފައިކުރަން ކަމަށް.

އެއްވެސް ހާލެއްގައި ހައުސިން މިނިސްޓްރީން ނުބުނާ ބަޔަކަށް ބިން ދޫކޮށްފައެއް ނުވާނެ ކަމަށް ވެސް އޭނާ ވިދާޅުވި

ފަޒުލް ވިދާޅުވި ގޮތުގައި އުސޫލުތަކާ ހިލާފު ކަންކަން ހިނގާފައި ވާތީ އެކަން އޮޅުންފިލުވާ ދިނުމަށް ހައުސިން މިނިސްޓްރީގައި އެދިފައިވާނެ ކަމަށް.

ފަޒުލް ވިދާޅުވީ މިހާތަނަށް 'ބިންވެރިޔާ' ސްކޫމްގެ ދަށުން 709 ގޯތި ދޫކޮށްފައިވާ ކަމަށް.

ފަޒުލް ވިދާޅުވީ ބިންވެރިޔާގެ ސްކީމުން ބިން ދެނީ ވެސް، ބިމުގެ ރަޖިސްޓްރީ ދެނީ ވެސް އެޗުޑީސީން ނޫން ކަމަށް.

ފަޒުލް ވިދާޅުވީ ފުލުހުން އެޗުޑީސީއަށް އައި ކަމަށާއި ކޮންމެ ތަހުގީގެއް ކުރިއަށް ގެންދިޔަސް ފުރިހަމަ އެއްބާރުން ދޭނެ ކަމަށް. 

އެޗުޑީސީގެ މެނޭޖިން ޑިރެކްޓަރު އިބްރާހިމް ފަޒުލް މިހާރު ގެންދަވަނީ ނޫސްވެރިންނާ ބައްދަލުކުރައްވާ ވާހަކަ ދައްކަވަމުން

އެމްޑީޕީން ނެރުނު ބަޔާނުގައި ބުނީ 'ބިންވެރިޔާ' ސްކީމުން ހައްގު ނޫން އެތައް ބަޔަކަށް ބިން ދިނުމަކީ އެކަކަށް ކުރެވޭނެ ކަމެއް ނޫން ކަމަށް. އެހެންވެ އެ މުއާމަލާތްތަކުގައި ހިމެނޭ އެންމެންނަށް ވެސް އަދަބު ދޭން އެ ޕާޓީން ގޮވާލި. ސަރުކާރަށް ފާޑުކިއުމުގެ އިތުރުން އެމްޑީޕީން ވަނީ ތަހުގީގީ އިދާރާތަކާއި މިނިވަން މުއައްސަސާތަކުން އެކަންކަމާ ދެކޮޅަށް މަސައްކަތްނުކުރާތީ ވެސް ފާޑުކިޔާފައި.

އެޗުޑީސީ ކައިރިއަށް ބައެއް އާންމުން ވެސް އެއްވެ ލިއުންތަކެއް ދައްކައި، އަންނަނީ ޝުއޫރު ފާޅުކުރަމުން. އެ މީހުން ބުނަނީ އެމީހުންގެ ފްލެޓް ދޭށާއި ދައުލަތުން ދީފައި ހުންނަ ރަސްމީ ލިއުންތަކާ ނުކުޅޭށޭ.

އެޗުޑީސީއާ މެދު ކޮންމެ ސަރުކާރެއްގައި ވެސް ބޮޑެތި ތުހުމަތުތަކެއް ކުރެވޭ. އެކަމަކު އެއިން އެއްވެސް ތުހުމަތެއްގެ ތަހުގީގަށް ފުލުހުން މީގެ ކުރިން ވަދެފައެއް ނުވޭ. 

މިހާރު ކުރިމަތިވެގެން އުޅޭ މައްސަލައިގެ ހުލާސާއަކީ:

އެޗުޑީސީއާ ގުޅުން ހުރި ސީރިއަސް ތުހުމަތުތަކެއްގެ ވާހަކަ ލީކުވެ، އޭގެ ތަހުގީގު ފުލުހުން ފަށައިގެން އެޗުޑީސީގައި މިހާރު އަންނަނީ ހަރަކާތްތެރިވަމުން. މިހާރު އެޗުޑީސީއަށާއި މެނޭޖިން ޑިރެކްޓަރު އިބްރާހިމް ފަޒުލް ރަޝީދަށް އަމާޒުވެފައި ވާ ތުހުމަތުތަކާ ގުޅިގެން އޭނާގެ ޕްރެސް ކޮންފަރެންސެއް މިރޭ އޮންނާނެ ކަމަށް، އެޗުޑީސީން ވަނީ މީޑިއާތަކަށް އަންގާފައި.