ނައީމާގެ މަރުގެ ދައުވާ ލިބޭ އަބްދުލްވާހިދު ރިފާސް ޝަރީއަތުގެ މަޖިލީހުގައި
ނައީމާގެ މަރު: ރިފާސްގެ އިއުތިރާފު ބަޔާނަކީ ތެދެއްކަން ސާބިތުކުރަން ހެކިތަކެއް ހުށަހަޅައިފި
މިދިޔަ އަހަރު ނ. މަނަދޫގައި ނައީމާ މޫސާ މަރާލި މައްސަލައިގައި ދައުވާކުރާ އަބްދުލް ވާހިދު ރިފާސް ކުރިން ތަހުގީގަށް ދިން އިއުތިރާފު ބަޔާނުގައި ސީދާ އޭނާ ކިޔައިދިން ގޮތަށް ހާދިސާ ހިނގިކަން ސާބިތުކުރަން ދައުލަތުން ގިނަ ހެކިތަކެއް މިއަދު ޝަރީއަތަށް ހުށަހަޅައިފި އެވެ.
ކަމުގެ ފެށުން - މަސްތުވާތަކެތީގެ މައްސަލައެއްގައި މަނަދޫން އަހްޒަމް އަބްދުއްޝަކޫރު ހައްޔަރުކޮށްފައިވަނިކޮށް ނައީމާ މަރާލި ކަމަށް ކުށަށް އެއްބަސްވެ ހާދިސާ ހިނގި ގޮތް ކިޔައިދިނެވެ. އޭގެ ފަހުގައި:
-
މަސްތުވާތަކެއްޗާ އެކު މަނަދޫން ރިފާސް ހައްޔަރުކޮށް ރިފާސް ވެސް ހާދިސާ ހިނގި ގޮތް ތަހުގީގަށް ކިޔައިދިން
-
މާލޭން ހަސަން ފަވާޒު ހައްޔަރުކުރީ އަހުޒަމާއި ރިފާސް ތަހުގީގަށް ދިން މައުލޫމާތުގެ އަލީގައި؛ ފަވާޒަކީ ނައީމާ މަރާލަން ރާވައި އަހުޒަމާއި ރިފާސްއަށް އެ މަސައްކަތުގެ އަގު ހުށަހަޅައި އަގުގެ ގޮތުގައި މަސްތުވާތަކެތި ދިން ކަމަށް ތުހުމަތުކުރާ މީހާ
-
ޝަރީއަތް ފެށި ފަހުން އަހުޒަމާއި ރިފާސް ވަނީ ދައުވާތަކަށް އިންކާރުކޮށް، ކުރިން ދިން ބަޔާން އަނބުރާ ގެންގޮސްފައި
ވީކިހިނެއް؟ - މިއަދު ބޭއްވި އަޑުއެހުމުގައި ދައުލަތުގެ ފަރާތުން ހެކި ހުށަހެޅީ ރިފާސް ކުރިން ދިން އިއުތިރާފު ބަޔާނުގައި ކުށް ހިނގި ކަމަށް ކިޔައިދީފައިވާ ގޮތަށް އެ ކަން ހިނގި ކަން ސާބިތުކުރުމަށާއި އެ ބަޔާން ދިނީ މަޖުބޫރު ކަމެއް ނެތި ކަން ސާބިތު ކުރުމަށެވެ.
ތަފްސީލް - ދައުލަތުން ހުށަހެޅި ހެކިތަކުގެ ތެރޭގައި ހިމެނެނީ:
-
ރިފާސް، އަހުޒަމް، ފަވާޒުގެ ސެލް ލޮކޭޝަންތަކާއި ކޯލް ރެކޯޑިންތައް
-
ނައީމާ ގެއަށް ވަތް ވަގުތު ލައިގެން އުޅުނު މާސްކްއާއި އަންގިތައް އަދި ނައީމާ މަރާލަން ގެންގުޅުނު 2 ވަޅި ވަޅުލާފައި އޮއްވާ ފުލުހުން ނެގީ ރިފާސް ބުނެދިން ތަނުން ކަން
-
ރިފާސް ކިޔައިދިން ގޮތަށް ވަޅުގަނޑުގައި ތަކެތި އަންދާލާފައި ހުރި ކަން
-
ވަޅުގަނޑުން ނެގި ތަކެތިން ނައީމާގެ ޑީއެންއޭ ފެނިފައިވާ ކަން ބަޔާންކޮށްފައިވާ ޑީއެންއޭ ތަހުލީލު ރިޕޯޓް
-
ބަޔާން ދިން އިރު ހަރަކާތްތެރިވި ފުލުުހުން، އަދި ތަހުގީގުގައި ބައިވެރިވި ފުލުހުންގެ ހެކިބަސް ނެގުމަށް
ރިފާސްގެ ފަރާތުން ދިފާއުގައި ހެކިތަކެއް ހުށަހެޅީ ކުށް ހިނގި ތަނުގައި އެ ވަގުތު އޭނާ ނެތް ކަމަށް ސާބިތު ކުރުމަށާއި ކުރިން އިއުތިރާފު ބަޔާނެއް ދިނީ އޭނާގެ ވަކީލު ދިން ލަފާގެ މައްޗަށް ޖިނާއީ އަދުލުގެ ނިޒާމުގައި ލިިބިދޭ ހައްގުތައް ނޭނގި ހުރެ ކަން ސާބިތު ކުރުމަށެވެ.
ރިފާސްގެ މައްޗަށް ކުރާ ދައުވާތަކަކީ:
-
ތޫނު އެއްޗެއް ބޭނުންކޮށްގެން މީހަކު މެރުން؛ މި ދައުވާ ސާބިތުވެއްޖެ ނަމަ، އަންނާނެ އަދަބަކީ މަރުގެ އަދަބު
-
އަދުލު އިންސާފު ގާއިމުކުރުމަށް ހުރަސް އެޅުން؛ މި ދައުވާކޮށްފައިވަނީ ނައީމާ މަރާލުމަށް ބޭނުންކުރި ތަކެތި ފޮރުވައި ބައެއް ތަކެތި ނައްތާލައި ހެކި ނައްތާލުމަށް މަސައްކަތްކޮށްފައިވާތީ
-
މައްޔިތާގެ ބޭނުން ނަހަމަ ގޮތުގައި ކުރުން؛ މި ދައުވާކޮށްފައިވަނީ ނައީމާ މަރާލުމަށް ފަހު މީހަކަށް ނުފެންނާނެހެން ކޮޓަރި ތަޅުލައި ލެޔާ އެކު ނައީމާގެ ހަށިގަނޑު ކުނިވާން ދޫކޮށްލާފައިވާތީ
ކިޔާލަން
-
މަނަދޫ ނައީމާގެ މަރުނައީމާ މަރާލަން ގެއަށް ވަތް ކަމަށް ރިފާސް ވެސް އެއްބަހެއް ނުވި
22 އޮކްޓޯބަރު 2024 -
މަނަދޫ ނައީމާގެ މަރުނައީމާ މަރާލަން ވަތް ކަމަށް ބުނާ އަހްޒަމް ދައުވާއަށް އިންކާރު
15 އޯގަސްޓު 2024 -
މަނަދޫ ނައީމާގެ މަރުހައްޔަރުކުރީ ޝައްކުވެގެން ފާރަލާތާ ދުވަސްކޮޅެއް ފަހުން ޑްރަގާއެކު
27 މޭ 2023
މައްސަލައިގެ ހުލާސާ
މަނަދޫގައި އޭނާގެ އަމިއްލަ ގޭގައި ވަކިން ދިރިއުޅެމުންދިޔަ އުމުރުން 62 އަހަރުގެ ނައީމާގެ ހަބަރެއް ނުވެގެން ފުލުހުންނަށް ރިޕޯޓު ކުރީ 7 އެޕްރީލް 2023ގަ އެވެ. އެ މައުލޫމާތާ ގުޅިގެން އަންނާރުމާގޭގެ ދޮރު ވައްޓާލައިގެން ފުލުހުން ވަދެ ބެލިއިރު، ނައީމާ އޮތީ ބޮޑެތި ޒަހަމުތަކަކާ އެކު މަރާލައިފަ އެވެ.
-
އޭނާގެ ހަށިގަނޑުގެ އެތައް ތަނަކަށް ތޫނު އެއްޗަކުން ހަމަލާދީފައިވޭ؛ ތޫނު އެއްޗެއް ކަރުގައި އަޅާފައި ހުރި ކަމުގެ ނިޝާންތަކެއް ވެސް ހުރި
-
މައްސަލައިގެ ތަހުގީގަށް ފުލުހުންގެ ސީރިއަސް އެންޑް އޮގަނައިޒްޑް ކްރައިމްސް ޑިޕާޓްމެންޓުގެ ޓީމެއް އެރޭ ދަންވަރު މަނަދުއަށް ދިޔަ
-
ޕޯސްމޯޓަމް ހަދަން ޖެހޭ ސަބަބެއް ނެތް ކަމަށް ފުލުހުންގެ ފޮރެންސިކް ޕެތޮލޮޖިސްޓް ނިންމުމުން، ޖެހިގެން އައި ދުވަހު ނައީމާ ވަނީ އެ ރަށުގައި ވަޅުލާފައި
-
ނައީމާ ދިރިއުޅުނު ގޭގެ އިތުރުން، އެ ރަށުގެ ހަތަރު ގެއެއް ބަލާފައިވޭ؛ އޭގެ ތެރޭގައި، ބިދޭސީން ދިރިއުޅޭ ގެއަކާއި ފަޅު ގެއެއް ވެސް ހިމެނޭ
މި މައްސަލާގައި ފުލުހުންގެ ތަހުގީގަށް ކުރިއެރުމެއް ލިބި، ފުރަތަމަ މީހަކު ހައްޔަރުކުރީ އޭގެ އެއް މަސް ފަހުން، 26 މޭ 2023ގަ އެވެ. އޭގެ ފަހުން މިހާތަނަށް މި މައްސަލާގައި ހައްޔަރުކުރީ ތިން މީހުންނެވެ.
އެއަށް ފަހު، ނައީމާ މަރާލަން ބޭނުންކުރި ކަމަށް ބެލެވޭ ދެ ވަޅި އާއި އެ ދެ މީހުން އެ ރޭ ލައިގެން އުޅުނު ކަމަށް ބުނާ އަންނައުނު ވެސް ފުލުހުން ވަނީ ހޯދައިފަ އެވެ. ފުލުހުން ބުނެފައިވާ ގޮތުގައި، އެ އަންނައުނުތައް ހޯދީ، ވަޅުގަނޑެއްގެ ތެރޭގައި އަންދާލުމަށް ފަހު ފަސް އަޅައި ފޮރުވާފައި ހުއްޓަ އެވެ.
ކޮމެންޓް