އިޒްރޭލު ޕާސްޕޯޓު މައްސަލަ ލަސްވާތީ އެމްޑީޕީގެ ގަރާރެއް މަޖިލީހަށް

އިޒްރޭލުގެ ޕާސްޕޯޓުގައި ރާއްޖެއަށް އެތެރެވުން މަނާކުރުމަށް އިމިގްރޭޝަން ގާނޫނަށް ހުށަހަޅާފައިވާ އިސްލާހުގެ މަސައްކަތް ކުރިއަށް ނުދާ ކަމަށް ބުނެ އެމްޑީޕީން ރައްޔިތުންގެ މަޖިލީހަށް މިއަދު ގަރާރެއް ހުށަހަޅައިފި އެވެ.

ވީ ކިހިނެއް؟ - ފަލަސްތީނުގެ ދަރިފަސްކޮޅު ނައްތާލުމަށް އިޒްރޭލުން ހިންގަމުންދާ ގަތުލުއާންމާ ދެކޮޅަށް އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއިލް ނަސީމް އެ ބިލު ހުށަހެޅުއްވީ މީގެ ފަސް މަސް ކުރިން ޖޫން މަހު 10ގަ އެވެ.

އެނގުން މުހިންމު - އެމްޑީޕީން މިއަދު އެ ގަރާރު މަޖިލީހަށް ހުށަހެޅިއިރު، އެ ބިލު ދިރާސާ ކުރާ ސަލާމަތީ ހިދުމަތްތަކާ ބެހޭ 241 ކޮމިޓީން އެ ބިލުގެ ދިރާސާއަށް ފުރަތަމަ ކޮމެޓީ ބައްދަލުވުން މިއަދު ހެނދުނު 9:30 ވަނީ ތާވަލްކޮށްފަ އެވެ.

ތަފްސީލް - އެމްޑީޕީގެ ފަރާތުން މި ގަރާރު މަޖިލީހަށް ހުށަހަޅުއްވާފައިވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ. އެ ގަރާރުގައި މެންބަރު މުހައްމަދު އިބްރާހީމް ވިދާޅުވީ:

"މުޅި އިސްލާމީ އުއްމަތަށް އިސްރާއީލުން ޖައްސަމުން މިދާ ގިލަންވެރިކަމާއި އާފާތް ކުށްވެރިކޮށް އަޅުގަނޑުމެން އެކަމާއި ކަނޑައެޅިގެން ދެކޮޅުވެރިކަން ހާމަކޮށްދިނުމަށްޓައި ކޮންމެހެން ކުރަން ޖެހޭ ކަމެއްގެ ގޮތުން އިޒްރޭލު ޕާސްޕޯޓް މިހާރުން މިހާރަށް މަނާކުރުމަށްޓަކައި ގާނޫނު ނަމްބަރު 1/2007 (ދިވެހިރާއްޖޭގެ އިމިގްރޭޝަން ގާނޫނު)އަށް އިސްލާހު ގެނައުމަށް ހުށަހަޅައިފައިވާ ބިލު އަވަހަށް ފާސްކުރުމަށް ބާރުއަޅައިދިނުމަށް ސަރުކާރަށް ގޮވައިލުމަށްޓަކައި މި ގަރާރު ހުށަހެޅީމެވެ،" މުހައްމަދު އިބްރާހީމްގެ ގަރާރުގައި ބުނެފައިވެ އެވެ.

އެނގުން މުހިންމު: އެ ބިލުގެ މަސައްކަތް ކުރިއަށް ނުގެންދާތީ އެކަމާ ކަންބޮޑުވުން ފާޅުކޮށް މިދިޔަ މަހު 21ގައި ވެސް އެ މެންބަރު މަޖިލީހަށް ކުއްލި މައްސަލައެއް ހުށަހެޅި އެވެ. ނަމަވެސް މަޖިލީހުގެ ގަވައިދުގައި ބުނާ "ކުއްލި މައްސަލައެއްގައި ހުންނަން ޖެހޭ ޝަރުތުތައް އެ މައްސަލައިގައި ފުރިހަމަ ނުވާތީ" އެ މައްސަލަ މަޖިލިސް ރިޔާސަތުން ބަލައިނުގަނެ ވަނީ ބޭރުކޮށްލާފާ އެވެ.