ޝަހުމް އަދި އޭނާގެ ވަކީލު ސުޕްރީމް ކޯޓުގައި
ޝަހުމް މަރަން ކުރި ހުކުމުގެ ޝަރީއަތް ސުޕްރީމް ކޯޓުގައި ފެށުން ލަސްވީ އޭނާ ފިިހިގެން ބަލިވެ އުޅުމުން
އަހްސަން ބަޝީރުގެ ކަރަށް ވަޅި ހަރައި މަރާލި މައްސަލާގައި، އިބްރާހީމް ޝަހުމް އާދަމް މަރަން ކުރި ހުކުމް ކަށަވަރު ކުރަން ދައުލަތުން ހުށަހެޅިތާ ދެ އަހަރަށް ވުރެ ގިނަ ދުވަސް ފަހުން އެ މައްސަލައިގެ ޝަރީއަތް ސުޕްރީމް ކޯޓުގައި މިއަދު ފަށައިފި އެވެ.
ކަމުގެ ފެށުން - އަހުސަން، ވަރުދީ/އައްޑޫ ހިތަދޫ މަރާލާފައި ވަނީ 16 މާޗު 2011ގައި މެންދަމު 3:20 ހާއިރު އަލިކިލޭގެފާނު މަގާއި މަޖީދީމަގާ ގުޅުނު ކަންމަތީގައި ހުއްޓަ އެވެ.
އެ މައްސަލާގައި ޝަހުމް، ގ. ގޯޒީގެ މައްޗަށް ދައުލަތުން އުފުލީ ގަސްތުގައި މީހަކު މެރުމުގެ ކުށުގެ ދައުވާ އެވެ. އަދި ހަސަން ޝިމާޒު މުހައްމަދު، މއ. ވީނަސްތަރިގެ މައްޗަށް މީހަކު މެރުމުގައި ބައިވެރިވުމުގެ ކުށުގެ ދައުވާ ވެސް ކުރި އެވެ.
މި މައްސަލާގައި ކަން ހިނގި ގޮތަކީ:
-
ކުރިމިނަލް ކޯޓުގައި ދެ މީހުންގެ މައްޗަށް ސާބިތެއް ނުވި
-
ހައި ކޯޓުން ޝަހުމް މަރަން ހުކުމް ކުރި އިރު، ޝިމާޒްގެ މައްޗަށް އިއްވީ 15 އަހަރު ދުވަހުގެ މުއްދަތަކަށް ޖަލަށް ލުން
-
މަރުގެ އަދަބުގެ ހުކުމް ސުޕްރީމް ކޯޓަށް ހުށަހެޅީ 4 ސެޕްޓެމްބަރު 2022ގައި
ވީ ކިހިނެއް؟ - ސުޕްރީމް ކޯޓުން އަންނަ މަހުގެ 4 ވަނަ ދުވަހަށް މި މައްސަލައިގެ ފުރަތަމަ އަޑުއެހުން ތާވަލު ކުރި އެވެ. ނަމަވެސް ހަފުތާއެއް ކުރިއަށް، މިއަދު ބާއްވާ ގޮތަށް ދެން ތާވަލުކޮށް، މިއަދު ޝަރީއަތް ފެށި އެވެ.
ތަފްސީލް - ޝަރީއަތުގެ ފުރަތަމަ އަޑުއެހުން މިއަދު ފައްޓަވަމުން، ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު ޑރ. މުހައްމަދު އިބްރާހީމް ފުރަތަމަ ކަމަކަށް ޝަރީއަތް ފެށުން މިހާ ލަސްވި ސަބަބު ސާފުކޮށްދެއްވި އެވެ. އެ ގޮތުން:
-
މި ފަހުން ޝަހުމް ފިހުމުގެ ސަބަބުން ބަލި ހާލަތުގައި އުޅުމުން، އޭނާގެ ފަރާތުން މައްސަލަ ލަސްކޮށްދިނުމަށް އެދުނު.
-
ޝަހުމްގެ އާއިލާގެ ފަރާތުން އިހުތިޔާރުކުރާ އަމިއްލަ ވަކީލެއް ހަމަޖެއްސުމަށް ވެސް ދިގު މުއްދަތެއް ހޭދަވެފައިވޭ
މިއަދު ބޭއްވި އަޑުއެހުމުގައި ކުރިއަށް ދިޔައީ ހުކުމް ދެމެހެއްޓުމަށް އެދި ދައުލަތް ތަމްސީލްކުރާ ޕްރޮސެކިއުޓަ ޖެނެރަލް (ޕީޖީ)ން ހުށަހަޅާ ނުކުތާތައް އެ އޮފީހުގެ ވަކީލުން ހުށަހެޅުމެވެ. ޝަހުމްގެ ފަރާތުން ޖަވާބުގައި ނުކުތާ ހުށަހަޅާނީ ދެން އޮންނަ އަޑުއެހުމެއްގަ އެވެ.
ސުޕްރީމް ކޯޓުގައި މި މައްސަލަ ބައްލަވާ ބެންޗުގައި ތިއްބެވި ފަނޑިޔާރުންނަކީ:
-
ޑރ. މުހައްމަދު އިބްރާހީމް (ރިޔާސަތު)
-
ޑރ. އަޒްމިރާލްދާ ޒާހިރު
-
އާއިޝާ ޝުޖޫން މުހައްމަދު
-
ހުސްނުއްސުއޫދު
-
އަލީ ރަޝީދު ހުސައިން
އެނގުން މުހިންމު - މަރުގެ އަދަބު ދޭން ކުރާ ހުކުމްތައް ޝަރީއަތުގެ ތިން މަރުހަލާ ފުރިހަމަ ކުރަން ގާނޫނުގައި ލާޒިމުކޮށްފައިވެ އެވެ. ޝަހުމް މަރަން ކުރި ހުކުމް ސުޕްރީމް ކޯޓަށް ދައުލަތުން ހުށަހެޅީ އެހެންވެ އެވެ.
މައްސަލައިގެ ހުލާސާ - އަހުސަންގެ މަރުގެ ތަހުގީގުން ހާމަވި ގޮތުގައި، އޭނާ މާރާމާރީ ހިންގައި އޭނާގެ ކަރަށް ވަޅި ޖެހީ، ޝަހުމްގެ ރައްޓެއްސެއް އޭރު ލޯބީގެ ގޮތުން އުޅުނު އަންހެން ކުއްޖަކާ އަހުސަން ފޮށުނު ކަމަށް ތުހުމަތުކޮށެވެ.
ހައި ކޯޓުން ޝަހުމްގެ މައްޗަށް ކުށް ސާބިތުވާ ކަމަށް ކަނޑައެޅީ، އަހުސަން ކަރަށް ހަމަލާ ދިނުމުން އޭނާއަށް ހޮސްޕިޓަލުގައި ފަރުވާ ދެމުން ދަނިކޮށް، އޭނާ އޮކްސިޖަން މާސްކު ނެގުމަށް ފަހު އެ ތަނުގައި ހުރި ފުލުހެއްގެ ގާތުގައި ދެއްކި ވާހަކައަށް ހެކީގެ ބުރަދަން ދިނުމަށް ފަހު އެވެ. އަހުސަން މަރުމަތީގައި އޮވެ ބުނެފައި ވަނީ އޭނާއަށް ހަމަލާ ދިނީ ޝަހުމް ކަމަށެވެ.
ކޮމެންޓް