އަހުސަން ބަޝީރު މަރާލި މައްސަލައިގައި ކުށް ސާބިތުވެފައިވާ އިބްރާހިމް ޝަހުމް އާދަމް
ޝަހުމް މަރަން ކުރި ހުކުމް ކަށަވަރު ކުރަން ހުށަހެޅިތާ 2 އަހަރު ފަހުން ސުޕްރީމް ކޯޓުގައި ފަށަނީ
އަހްސަން ބަޝީރުގެ ކަރަށް ވަޅި ހަރައި މަރާލި އިބްރާހީމް ޝަހުމް އާދަމް މަރަން ކުރި ހުކުމް ކަށަވަރު ކުރަން ދައުލަތުން ހުށަހެޅިތާ ދެ އަހަރަށް ވުރެ ގިނަ ދުވަސް ފަހުން ފުރަތަމަ އަޑުއެހުން އަންނަ މަހަށް ސުޕްރީމް ކޯޓުގައި ތާވަލުކޮށްފި އެވެ.
ކަމުގެ ފެށުން - އަހުސަން، ވަރުދީ/އައްޑޫ ހިތަދޫ މަރާލާފައި ވަނީ 16 މާޗު 2011ގައި މެންދަމު 3:20 ހާއިރު އަލިކިލޭގެފާނު މަގާއި މަޖީދީމަގާ ގުޅުނު ކަންމަތީގައި ހުއްޓަ އެވެ.
އެ މައްސަލާގައި ޝަހުމް، ގ. ގޯޒީގެ މައްޗަށް ދައުލަތުން އުފުލީ ގަސްތުގައި މީހަކު މެރުމުގެ ކުށުގެ ދައުވާ އެވެ. އަދި ހަސަން ޝިމާޒު މުހައްމަދު، މއ. ވީނަސްތަރިގެ މައްޗަށް މީހަކު މެރުމުގައި ބައިވެރިވުމުގެ ކުށުގެ ދައުވާ ވެސް ކުރި އެވެ.
މި މައްސަލާގައި ކަން ހިނގި ގޮތަކީ:
-
ކުރިމިނަލް ކޯޓުގައި ދެ މީހުންގެ މައްޗަށް ސާބިތެއް ނުވި
-
ހައި ކޯޓުން ޝަހުމް މަރަން ހުކުމް ކުރި އިރު، ޝިމާޒްގެ މައްޗަށް އިއްވީ 15 އަހަރު ދުވަހުގެ މުއްދަތަކަށް ޖަލަށް ލުން
-
މަރުގެ އަދަބުގެ ހުކުމް ސުޕްރީމް ކޯޓަށް ހުށަހެޅީ 4 ސެޕްޓެމްބަރު 2022ގައި
ވީކިހިނެއް؟ - ސުޕްރީމް ކޯޓަށް ހުށަހެޅި މައްސަލައިގެ ފުރަތަމަ އަޑުއެހުން އަންނަ މަހު ހަތަރު ވަނަ ދުވަހު ހެނދުނު 10 ޖަހާއިރު ތާވަލުކޮށްފައިވާކަން ސުޕްރީމް ކޯޓުގެ އަޑުއެހުންތަކުގެ ތާވަލުން ފެނެ އެވެ.
ތަފްސީލް - މައްސަލަ ބައްލަވާ ފަނޑިޔާރުންގެ ބެންޗު ވެސް ތާވަލުގައި ހިމަނާފައިވެ އެވެ. އެ ބެންޗުގައި ތިއްބެވީ:
-
1-
ޑރ. މުހައްމަދު އިބްރާހީމް
-
2-
ޑރ. އަޒްމިރާލްދާ ޒާހިރު
-
3-
އާއިޝާ ޝުޖޫން މުހައްމަދު
-
4-
ހުސްނުއްސުއޫދު
-
5-
އަލީ ރަޝީދު ހުސައިން
މި ޝަރީއަތް ފެށުން ލަސްވި ސަބަބެއް އަދި ނޭނގެ އެވެ. ބެލެވޭ ގޮތުގައި ފުރަތަމަ އަޑުއެހުމުގައި ފަނޑިޔާރުންގެ ބެންޗުން އެ ސަބަބު ފާހަގަކުރައްވާނެ އެވެ.
އެނގުން މުހިންމު - މަރުގެ އަދަބު ދޭން ކުރާ ހުކުމްތައް ޝަރީއަތުގެ ތިން މަރުހަލާ ފުރިހަމަ ކުރަން ގާނޫނުގައި ލާޒިމުކޮށްފައިވެ އެވެ. ޝަހުމް މަރަން ކުރި ހުކުމް ސުޕްރީމް ކޯޓަށް ދައުލަތުން ހުށަހެޅީ އެހެންވެ އެވެ.
މީހުން މެރުމާއި ބޮޑެތި ކުށުގެ ރެކޯޑު އޮތް ޝަހުމްގެ ވާހަކަ
މައްސަލައިގެ ހުލާސާ - އަހުސަންގެ މަރުގެ ތަހުގީގުން ހާމަވި ގޮތުގައި، އޭނާ މާރާމާރީ ހިންގައި އޭނާގެ ކަރަށް ވަޅި ޖެހީ، ޝަހުމްގެ ރައްޓެއްސެއް ކަމަށްވާ އިބްރާހީމް (އަސްލު ނަމެއް ނޫން) ލޯބީގެ ގޮތުން އުޅުނު އަންހެން ކުއްޖަކާ އަހުސަން ފޮށުނު ކަމަށް ބުނާ މައްސަލައިގަ އެވެ.
ހައި ކޯޓުން ޝަހުމްގެ މައްޗަށް ކުށް ސާބިތުވާ ކަމަށް ކަނޑައެޅީ، އަހުސަން ކަރަށް ހަމަލާ ދިނުމުން އޭނާއަށް ހޮސްޕިޓަލުގައި ފަރުވާ ދެމުން ދަނިކޮށް، އޭނާ އޮކްސިޖަން މާސްކު ނެގުމަށް ފަހު އެ ތަނުގައި ހުރި ފުލުހެއްގެ ގާތުގައި ދެއްކި ވާހަކައަށް ހެކީގެ ބުރަދަން ދިނުމަށް ފަހު އެވެ. އަހުސަން މަރުމަތީގައި އޮވެ ބުނެފައި ވަނީ އޭނާއަށް ހަމަލާ ދިނީ ޝަހުމް ކަމަށެވެ.