ބައްސާމްގެ އެޕާޓްމަންޓްތައް ފުލުހުން ނެގި މައްސަލަ ހައި ކޯޓުން ބޭރުކޮށްލައިފި

އެފްއޭއެމްގެ ހިޔާނާތުގެ ފައިސާއިން އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލު ގަތް ކަމަށް ތުހުމަތުކުރެވޭ ދެ އެޕާޓްމަންޓް ފުލުހުން ނެގުމަށް ހުޅުމާލެ މެޖިސްޓްރޭޓް ކޯޓުން ނެރުނު އަމުރު ބައްސާމްގެ ފަރާތުން ހައި ކޯޓުގައި އިސްތިއުނާފުކުރި މައްސަލަ ބޭރުކޮށްލައިފި އެވެ.

ވީކިހިނެއް؟ - ބައްސާމް އެދުނު ގޮތަށް ދެ އެޕާޓްމަންޓް ފުލުހުންނާ ހަވާލުކުރުމަށް މި މަހުގެ ނިޔަލަށް ވަގުތު ދޭން ފުރަތަމަ ނިންމި ނަމަވެސް މިދިޔަ ހަފްތާގެ އަންގާރަ ދުވަހު ފުލުހުން ވަނީ ބައްސާމް އެދޭ ގޮތަށް މުއްދަތު އިތުރުކޮށްދެވެން ނެތް ކަމަށް އަންގައިފަ އެވެ.

ހުޅުމާލެ މެޖިސްޓްރޭޓް ކޯޓުން ނެރުނު އަމުރެއްގެ ދަށުން ފުލުހުން އެކަން އެންގުމުން، އެ ދުވަހުގެ ރޭ ބައްސާމް ވަނީ ފުލުހުންނާ އެ ދެ އެޕާޓްމަންޓް ހަވާލުކޮށްފަ އެވެ. ދަށު ކޯޓުގެ އަމުރު މިދިޔަ ހަފުތާ ބުދަ ދުވަހު ބައްސާމްގެ ފަރާތުން އިސްތިއުނާފު ކުރި އެވެ.

ތަފްސީލް - އެ މައްސަލަ ބަލައިނުގަންނަން ހައި ކޯޓުގެ ރަޖިސްޓްރާ ނިންމާފައިވާ ކަން އެ ކޯޓުން ކަށަވަރުކޮށްދިނެވެ. ނަމަވެސް މައްސަލަ ބަލައިނުގަތް ސަބަބެއް އަދި ނޭނގެ އެވެ.

ރަޖިސްޓްރާގެ ނިންމުންތައް ފަނޑިޔާރުންގެ މަޖިލީހަށް އިސްތިއުނާފު ކުރެވޭނެ އެވެ.

ފުލުހުން ބައްސާމްގެ އެޕާޓްމަންޓްތައް ނަގާފައިވަނީ މަނީ ލޯންޑަރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ 51 ވަނަ މާއްދާގެ ދަށުންނެވެ.

ފުލުހުން 'ދައުރަށް' ބުނެފައިވާ ގޮތުގައި:

އެނގުން މުހިއްމު - ފުލުހުން މިދިޔަ މަހުގެ 18ގައި ބޭއްވި ނޫސްވެރިންގެ ބައްދަލުވުމެއްގައި ހާމަކޮށްފައިވާ ގޮތުގައި:

ފަސްމަންޒަރު - ބައްސާމާއި އެފްއޭއެމްގެ ކުރީގެ ވެރިންގެ މައްޗަށް ތުހުމަތު ކުރެވޭ ހިޔާނާތުގެ ބޮޑެތި މައްސަލަތަކެއް އެންޓި ކޮރަޕްޝަން ކޮމިޝަނާއި ފުލުހުން ދަނީ ތަހުގީގު ކުރަމުންނެވެ. އެއް މައްސަލައެއްގައި ބައްސާމްގެ މައްޗަށް ދައުވާކޮށް އެ ޝަރީއަތް ކްރިމިނަލް ކޯޓުގައި އެބަ ހިނގަ އެވެ.

އެފްއޭއެމުން ހިންގާފައިވާ އެކި މުއާމަލާތްތަކުގައި ފައިސާ ނުލިބޭ ގިނަ މައްސަލަތަކެއް ސިވިލް ކޯޓަށް ވެސް ހުށަހަޅާފައިވެ އެވެ. ގިނަ މައްސަލަތަކެއް އެ ކޯޓުގައި ހިނގަމުންދާއިރު، ފައިސާ ދެއްކުމަށް ގިނަ މައްސަލަތަކެއްގައި ހުކުމް ކޮށްފައި ވެސް ވެ އެވެ.