އިލެކްޝަންސް ކޮމިޝަންގެ ކުރީގެ ނައިބު ރައީސް ހަބީބު: އޭނާގެ އެޗްއާރުސީއެމްގެ މެންބަރުކަމަށް އައްޔަން ކުރަން މަޖިލީހުން މިއަދު ވަނީ ފާސްކޮށްފައި (ފައިލް ފޮޓޯ/ ރައީސް އޮފީސް)
ހަބީބު އެޗްއާރުސީއެމްއަށް އައްޔަން ކުރަން މަޖިލީހުން ރުހުން ދީފި
އިލެކްޝަންސް ކޮމިޝަންގެ ކުރީގެ ނައިބު ރައީސް އިސްމާއިލް ހަބީބު، ހިއުމަން ރައިޓްސް ކޮމިޝަން (އެޗްއާރުސީއެމް)ގެ ހުސްވެފައިވާ މެންބަރަކަށް އައްޔަން ކުރުމަށް ރައްޔިތުންގެ މަޖިލީހުން މިއަދު ރުހުން ދީފި އެވެ.
ވީ ކިހިނެއް؟ - އެޗްއާރުސީއެމްގެ މެންބަރުކަން ހުސްވީ، ކުރިން އެ ކޮމިޝަންގެ ނައިބު ރައީސްގެ މަގާމުގައި ހުންނެވި ޑރ. އަހްމަދު އަދުހަމް އަބްދުﷲ މިދިޔަ އޮކްޓޯބަރު މަހު އެ މަގާމުން އިސްތިއުފާ ދެއްވުމާ ގުޅިގެންނެވެ. އެއާ އެކު، އޭނާ އެމަގާމަށް އައްޔަން ކުރުމަށް ރައީސް ފޮނުއްވީ މި މަހުގެ 15ގަ އެވެ.
ތަފްސީލު - އެ މައްސަލަ ދިރާސާ ކުރި މަޖިލީހުގެ ހިއުމަން ރައިޓްސް ކޮމިޓީން އިއްޔެ ވަނީ ހަބީބުއާ އިންޓަވިއުކޮށް، ރުހުން ދޭން ފެންނަ ކަމަށް ފާސްކޮށްފަ އެވެ.
މިއަދުގެ މަޖިލިސް ޖަލްސާގައި ކޮމިޓީ ރިޕޯޓަށް ވޯޓަށް އެހުމުން، ހަބީބު އެ މަގާމަށް އައްޔަން ކުރުމަށް ރުހުން ލިބުނީ 74 މެންބަރުންގެ ތާއީދާއެކު އެވެ. ނުފެންނަ ކަމަށް ވޯޓު ދެއްވީ އެމްޑީޕީގެ ތިން މެންބަރުންނެވެެ. އެއީ:
-
ކެންދޫ ދާއިރާގެ މެންބަރު މައުރޫފް ޒާކިރު
-
މަރަދޫ ދާއިރާގެ މެންބަރު އަހްމަދު ދީދީ
-
ކެޔޮދޫ ދާއިރާގެ މެންބަރު މުހައްމަދު ނިއުޝާދު
އެމްޑީޕީގެ މެންބަރުންގެ ތެރެއިން ހަބީބު އެ މަގާމަށް އައްޔަން ކުރައްވަން ފެންނަ ކަމަށް ވޯޓު ދެއްވީ، ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދާއި ހަނިމާދޫ ދައިރާގެ މެންބަރު އަބްދުލްގަފޫރު މޫސާ (ގަޕޯ) އެކަންޏެވެ. އެހެން ބައެއް މެންބަރުން ތަޅުމުގައި ތިއްބެވި ނަމަވެސް ވޯޓުގައި ބައިވެރިއެއް ނުވެ އެވެ.
ހަބީބު:
-
އީސީގެ މެންބަރުކަން ދެ ދައުރު އަދާ ކުރުމަށް ފަހު، އެ ކޮމިޝަނުން ހަބީބު ވަކިވެވަޑައިގެންނެވީ މިދިޔަ މާޗު މަސް ތެރޭގައި؛ އެ ކޮމިޝަންގެ ގާނޫނު ބުނާ ގޮތުން މެންބަރަކަށް ގިނަވެގެން ފުރިހަމަ ކުރެވޭނީ ގިނަ ވެގެން ފަސް އަހަރުގެ ދެ ދައުރު
-
ކޮމިޝަންގެ މެންބަރު ކަމަށް ހަބީބު އެންމެ ފުރަތަމަ އައްޔަންކޮށްފައި ވަނީ މިދިޔަ 13 މާޗުގައި
-
އޭގެ ފަހުން ދެ ވަނަ ފަހަރަށް ކޮމިޝަންގެ މެންބަރު ކަމަށް ހަބީބު އައްޔަންކޮށްފައި ވަނީ 13 މާޗު 2019ގައި
ފަސް މަންޒަރު - އެޗްއާރުސީއެމްގެ މެމްބަރުންގެ ގޮތުގައި މިހާރު ތިއްބަވަނީ:
-
ކޮމިޝަންގެ ރައީސް މަރިޔަމް މުނާ
-
މުއުމިނާ ވަހީދު
-
އާމިނަތު ޝިފާއަތު އަބްދުއްރައްޒާގު
-
ސަމާއު އަހްމަދު ނަޖީބު