އިލެކްޝަންސް ކޮމިޝަންގެ ކުރީގެ ނައިބު ރައީސް ހަބީބު : އޭނާގެ ނަން އެޗްއާރުސީއެމްއަށް އައްޔަން ކުރަން ރުހުން ހޯދުމަށް ރައީސް މުއިއްޒު މިއަދު ވަނީ މަޖިލީހަށް ފޮނުއްވާފައި (ފައިލް ފޮޓޯ/ ރައީސް އޮފީސް)
އެޗްއާރުސީއެމްގެ މެންބަރަކަށް ހަބީބުގެ ނަން ފޮނުވައިފި
ހިއުމަން ރައިޓްސް ކޮމިޝަން (އެޗްއާރުސީއެމް)ގެ މެންބަރު ކަމަށް އައްޔަން ކުރުމަށްޓަކައި ރުހުން ހޯދުމަށް، އިލެކްޝަންސް ކޮމިޝަން (އީސީ)ގެ ކުރީގެ ނައިބު ރައީސް އިސްމާއިލް ހަބީބުގެ ނަން މަޖިލީހަށް މިއަދު ފޮނުވައިފި އެވެ.
ވީ ކިހިނެއް؟ - އެޗްއާރުސީއެމްގެ މެންބަރުކަން ހުސްވީ، ކުރިން އެ ކޮމިޝަންގެ ނައިބު ރައީސްގެ މަގާމުގައި ހުންނެވި ޑރ. އަހްމަދު އަދުހަމް އަބްދުﷲ މިދިޔަ އޮކްޓޯބަރު މަހު އެ މަގާމުން އިސްތިއުފާ ދެއްވުމާ ގުޅިގެންނެވެ.
މިއަދު ބޭއްވި މަޖިލީހުގެ ޖަލްސާގައި އަމީންއާންމު ފާތިމަތު ނިޔުޝާ ވަނީ، އެ މަގާމަށް ހަބީބު އައްޔަން ކުރުމަށް ރައީސް މުހައްމަދު މުއިއްޒު ފޮނުއްވި ސިޓީ އިއްވާފަ އެވެ.
ތަފްސީލު - ރައީސްގެ ސިޓީގައިވާ ގޮތުން، ކޮމިޝަންގެ ގާނޫނުގެ ފަސް ވަނަ މާއްދާގައިވާ ގޮތުގެ މަތިން މެންބަރު ކަމަށް ކުރިމަތިލުމަށް ހުޅުވާލުމުން، އެ ކަމަށް ކުރިމަތިލި ފަރާތަތަކުގެ ތެރެއިން ހަބީބަކީ މި މަގާމަށް އައްޔަން ކުރަން އެމަނިކުފާނަށް ފެންނަ ބޭފުޅާ ކަމަށެވެ. އަދި މިކަމަށް ކުރިމަތިލެއްވި ބޭފުޅުންގެ ތެރެއިން އެހެން ބޭފުޅުންގެ ނަންތައް ވެސް އެ ސިޓީއާ އެކު ރައީސް ވަނީ ފޮނުއްވާފަ އެވެ.
މި މައްސަލަ ދިރާސާ ކުރަން، މަޖިލީހުގެ ހިއުމަން ރައިޓްސް ޖެންޑާ ކޮމިޓީއަށް މިހާރު ވަނީ ފޮނުވާފަ އެވެ.
ހަބީބު:
-
އީސީގެ މެންބަރުކަން ދެ ދައުރު އަދާ ކުރުމަށް ފަހު، އެ ކޮމިޝަނުން ހަބީބު ވަކިވެވަޑައިގެންނެވީ މިދިޔަ މާޗު މަސް ތެރޭގައި؛ އެ ކޮމިޝަންގެ ގާނޫނު ބުނާ ގޮތުން މެންބަރަކަށް ގިނަ ވެގެން ފުރިހަމަ ކުރެވޭނީ ގިނަ ވެގެން ފަސް އަހަރުގެ ދެ ދައުރު
-
ކޮމިޝަންގެ މެންބަރު ކަމަށް ހަބީބު އެންމެ ފުރަތަމަ އައްޔަންކޮށްފައި ވަނީ 13 މާޗު 2014ގައި
-
އޭގެ ފަހުން ދެވަނަ ފަހަރަށް ކޮމިޝަންގެ މެންބަރު ކަމަށް ހަބީބު އައްޔަންކޮށްފައި ވަނީ 13 މާޗު 2019ގައި
ފަސް މަންޒަރު - އެޗްއާރުސީއެމްގެ މެމްބަރުންގެ ގޮތުގައި މިހާރު ތިއްބަވަނީ:
-
ކޮމިޝަންގެ ރައީސް މަރިޔަމް މުނާ
-
މުއުމިނާ ވަހީދު
-
އާމިނަތު ޝިފާއަތު އަބްދުއްރައްޒާގު
-
ސަމާއު އަހްމަދު ނަޖީބު