ދެ ދައުރު ހަމަކުރުމަށް ފަހު، އީސީން ހަބީބު ވަކިވެވަޑައިގެންފި

ހިދުމަތުގައި 21 އަހަރު ހޭދަ ކުރެއްވުމަށް ފަހު، އަދި  އިލެކްޝަންސް ކޮމިޝަންގެ މެންބަރެއްގެ ގޮތުގައި ދެ ދައުރު ފުރިހަމަ ކުރެއްވުމަށް ފަހު އެ ކޮމިޝަންގެ ނާއިބު ރައީސް އިސްމާއިލް ހަބީބު އެ ކޮމިޝަނުން ވަކިވެވަޑައިގެންފި އެވެ.

ވީ ކިހިނެއް؟ - ކޮމިޝަންގެ ތަރުޖަމާނުކަމުގެ މަގާމުގައި ވެސް ހުންނެވި ހަބީބު އެ މަގާމުން ރޭ ވަކިވަޑައިގެންނެވީ، އޭނާ ފުއްރުވަމުން ގެންދެވި މެންބަރު ކަމުގެ ދެ ދައުރު ހަމަަވެގެންނެވެ. މިއީ، ހަބީބު ކޮމިޝަންގައި ފުރުއްވި ދެ ވަނަ ދައުރެވެ.

ތަފްސީލު - ކޮމިޝަންގެ މެންބަރު ކަމަށް ހަބީބު އެންމެ ފުރަތަމަ އައްޔަންކޮށްފައި ވަނީ، 13 މާޗް 2014ގަ އެވެ. އޭގެ ފަހުން ދެވަނަ ފަހަރަށް ކޮމިޝަންގެ މެންބަރު ކަމަށް ހަބީބު އައްޔަންކޮށްފައި ވަނީ، 13 މާޗް 2019ގަ އެވެ. ގާނޫނުގައިވާ ގޮތުން ކޮމިޝަންގެ މެންބަރު ކަމުގެ ދައުރަކީ ފަސް އަހަރުގެ މުއްތަކެވެ. އަދި އެކަމަށް ފުރިހަމަ ކުރެވޭނީ ގިނަ ވެގެން ދެ ދައުރެވެ.

ހަބީބު އެންމެ ފުރަތަމަ އޭރުގެ އިންތިހާބުތަކާ ބެހޭ އޮފީހުގައި 2003ގައި ހިދުމަތް ކުރަން ފެއްޓެވީ ނުރަސްމީ ތައުލީމާ ބައިގާ މަސައްކަތް ކުރައްވި އިރު، ވީއްލި މުވައްޒަފެއްގެ ގޮތުގަ އެވެ. އަދި 2007 އިން ފެށިގެން އޭނާ ހުންނެވީ އެގްޒެކްޓިވް ޑިރެކްޓަރެއްގެ މަގާމުގަ އެވެ.

ހަބީބު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ރައްޔިތުންނަށް ހިދުމަތްކުރަން ލިބުނު 21 އަހަރަކީ "ދެމިހުންނާނެ ތަޖުރިބާ"އެއް ކަމަށެވެ. އަދި މި މުއްދަތުގައި ކޮމިޝަންގެ މެންބަރުންނާއި މުވައްޒަފުންނާއި މުއައްސަސާތަކުން އަދި ނޫސްވެރިންނާއި ސިޔާސީ ޕާޓީތަކުން އޭނާއަށް ދެއްވި އެއްބާރުލުމަށް ޝުކުރު އަދާކުރެއްވި އެވެ.

 ނޫސްވެރިންގެ މެދުގައި ހަބީބު ފާހަގަވެފައި ވަނީ، މައުލޫމާތު ހޯދުމަށް ފަސޭހަ ބޭފުޅެއްގެ ގޮތުގަ އެވެ.

އެނގުން މުހުންމު - ހަބީބުގެ ބަދަލުގައި ކޮމިޝަންގެ މެންބަރުކަމަށް އައްޔަން ކުރުމަށްޓަކައި ރުހުން ހޯދުމަށް މަޖިލީހަށް މިހާރު ވަނީ ނަންތައް ފޮނުވާފަ އެވެ. އޭގެ ތެރެއިން، ރައީސް މުހައްމަދު މުއިއްޒުގެ އެދިވަޑައިގެންފައި ވަނީ ކޮމިޝަންގެ ސެކެޓްރީ ޖެނެރަލް ހަސަން ޒަކަރިއްޔާ ހަމަޖެއްސުމަށެވެ.