އެމްޑީޕީގެ މާލެ ރައީސް ކަމަށް އާޒިމް އާއި ފަލާހުގެ ކުރިމަތިލުމެއް

އަންނަ މަހު ބާއްވާ އެމްޑީޕީގެ ގައުމީ މަޖިލީހުގެ ބައި-އިލެކްޝަންގައި މާލޭގެ ރައީސް ކަމަށް، މާލޭގެ މޭޔަރު އަދަމް އާޒިމް އާއި މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު ކުރިމަތިލައްވައިފި އެވެ.

ވީ ކިހިނެއް؟ - މި މަހުގެ 1 ވަނަ ދުވަހު އެމްޑީޕީން ދާއިރާތަކުގެ ބައި-އިލެކްޝަންއަށް ކުރިމަތިލުމަށް ހުޅުވާލި މުއްދަތު މިދިޔަ އާދިއްތަ ދުވަހަށް ވަނީ ހަމަވެފަ އެވެ. އެ ޕާޓީން މިހާރު ވަނީ ކުރިމަތިލި ކެންޑިޑޭޓުންގެ ނަންތައް އިއުލާންކޮށްފަ އެވެ.

ތަފްސީލު - ޖުމްލަ 20 ދާއިރާގެ ރައީސް ކަމަށް 50އެއްހާ ކެންޑިޑޭޓުން ވާދަ ކުރާ މި ބައި-އިލެކްޝަންގައި އެންމެ ވާދަވެރިވާނެ ކަމަށް ބެލެވޭ މަގާމަކަށް އޮތީ މާލެ ރައީސް ކަމުގެ މަގާމެވެ. ކެންޑިޑޭޓުންގެ ލިސްޓުގައިވާ ގޮތުން އެ ދާއިރާއަށް ކުރިމަތިލާފައިވަނީ އާޒިމް އާއި ފަލާހު އެވެ.

އެމްޑީޕީގެ މާލެ ރައީސް ކަމުގެ މަގާމު ހުސްވީ ކުރިން އެ މަގާމުގައި ހުންނެވި، ކުރީގެ މާލޭ މޭޔަރު ޝިފާ މުހައްމަދު އެ ޕާޓީން ވަކިވެވަޑައިގަތުމާ ގުޅިގެންނެވެ.

ސިޓީތަކުގެ ތެރެއިން ދެން އިންތިހާބު ބާއްވަނީ ތިނަދޫގެ ރައީސް ކަމުގެ މަގާމަށެވެ. އެ މަގާމަށް ކުރިމަތިލާފައި ވަނީ، ތިނަދޫ އުތުރު ދާއިރާގެ ކުރީގެ މަޖިލިސް މެންބަރު އަބްދުލް މުގުނީ އާއި މިދިޔަ ސަރުކާރުގައި އެޗްޑީސީގެ ޑެޕިއުޓީ މޭނޭޖިން ޑިރެކްޓަރުގެ މަގާމުގައި ހުންނެވި އަހްމަދު ގައިސް އެވެ.

ފަސް މަންޒަރު - ގައުމީ މަޖިލީހުގެ ބައި-އިލެކްޝަން މި ބާއްވަނީ، މިދިޔަ އަހަރު ތެރޭ އެ ޕާޓީގެ ކުރީގެ ރައީސް މުހައްމަދު ނަޝީދު އުފެއްދެވި ޑިމޮކްރެޓްސްއަށް ސޮއިކުރުމުން ގައުމީ މަޖިލީހުން ހުސްވެފައިވާ ގޮނޑިތަކަށާއި ރައްޔިތުންގެ މަޖިލީހުގައި މިހާރު ހިމެނޭ އާ ހަ ދާއިރާގެ ރައީސުން އިންތިހާބު ކުރުމަށެވެ.