ކަރެކްޝަންސްއިން ބަލަހައްޓަމުން އަންނަ މާފުށީ ޖަލު (ފައިލް ފޮޓޯ/ ޕީއެސްއެމް)
ކަރެކްޝަންސްގެ އޮފިސަރުންގެ ބަންދު ޖަހައިފި؛ 11 މީހަކު ޝަރީއަތް ނިމެންދެން ބަންދު
ޖަލަށް މަސްތުވާތަކެއްޗާއި ފޯނު ފަދަ މަނާ ތަކެތި ވެއްދި މައްސަލައިގައި ހައްޔަރު ކުރި ކަރެކްޝަންސްގެ 13 އޮފިސަރުންގެ ބަންދުގެ މުއްދަތު ކޯޓުން ޖަހައިފި އެވެ.
ވީ ކިހިނެއް؟ - މިދިޔަ ބުރާސްފަތި ދުވަހުގެ ރޭ ފުލުހުން ވަނީ، ކަރެކްޝަންސްގެ އޮފިސަރުންތަކެއްގެ އަމިއްލަ އެކައުންޓަށް ބޮޑެތި އަދަދުތަކުން ފައިސާ ވަދެފައިވާ މައްސަލައެއް ފެންމަތިވެ، އެކަން ތަހުގީގު ކުރަން ފަށާފަ އެވެ. ފުލުހުން ތުހުމަތު ކުރާ ގޮތުގައި އެ ފައިސާ އަކީ ޖަލަށް މަނާ ތަކެތި ވައްދަައިގެން ހޯދި ފައިސާ އެވެ.
ގާތްގަނޑަކަށް 73 މިލިއަން ރުފިޔާ މިދިޔަ އަހަރުން ފެށިގެން އެ މީހުންގެ އެކައުންޓުތަކަށް ވަދެފައިވާއިރު، މި މައްސަލައާ ގުޅިގެން 13 އޮފިސަރުން ހައްޔަރުކޮށްފައިވެ އެވެ.
ތަފްސީލު - ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ:
-
ހައްޔަރު ކުރި މީހުންގެ ތެރެއިން 11 މީހެއް ޝަރީއަތް ނިމެންދެން ބަންދުކުރުމަށް ކޯޓުން އަމުރުކޮށްފައިވޭ
-
ދެން ތިބި ދެ މީހުންގެ ބަންދަށް ފަސް ދުވަސް ޖަހާފައިވޭ
ފާހަގަކޮށްލެވޭ ކަމެއް - މި މައްސަލައިގައި 13 މީހުން ހައްޔަރުކޮށް، ބަންދުގެ މުއްދަތު ޖަހާފައި ވާއިރު، މި އޮޕަރޭޝަންއާ ގުޅިގެން ބުރާސްފަތި ދުވަހުގެ ރޭ ފުލުހުން ހާމަކޮށްފައިވާ ގޮތުގައި މިކަމުގައި ކަރެކްޝަންސްގެ 18 އޮފިސަރަކަށް ތުހުމަތު ކުރެ އެވެ. އެއީ ޖޫނިއާ ލެވެލްގެ އޮފިސަރުން ކަމަށް ފުލުހުން ބުނެފައިވެ އެވެ.
ކޮމެންޓް (1)
ކިއްލި