ޖަލަށް ޑްރަގް ވައްދައިގެން ކަރެކްޝަންސްގެ 18 އޮފިސަރުންގެ އެކައުންޓަށް 73 މިލިއަން

ޖަލުގައި ގައިދީންނަށް ފޯނާއި މަސްތުވާތަކެތި ފޯރުކޮށްދިނުމަށް އެހީތެރިވެދިން ކަރެކްޝަންސްގެ 18 އޮފިސަރުންގެ އެކައުންޓަށް 73 މިލިއަން ރުފިޔާ ޖަމާކޮށްފައިވާ މައްސަލައެއް ބަލަން ފަށާފައިވާ ކަމަށް ހޯމް މިނިސްޓްރީން މިރޭ ބުނެފި އެވެ.

ވީ ކިިހިނެއް؟ - ހޯމް މިނިސްޓްރީން އިސްކަންދަރު ކޮށީގައި މިހާރު ބާއްވަމުން އަންނަ ނޫސްވެރިންގެ ބައްދަލުވުމުގައި ބުނި ގޮތުގައި، އެ މައްްސަލައިގެ އޮޕަރޭޝަންތައް ފެށީ އިންޓެލިޖެންސަށް ލިބުނު މައުލޫމާތަކާ ގުޅިގެންނެވެ. މިހާތަނަށް ބެލިބެލުމުން އެ މައްސަލާގައި ހިމެނޭ ހަ މީހަކު މިދިޔަ އަހަރު ވަޒީފާއިން ވަކިވެފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވި އެވެ.

ތަފްސީލް - ނޫސްވެރިންގެ ބައްދަލުވުމުގައި ބުނި ގޮތުގައި:

އިހުސާން ވިދާޅުވީ އެކަމުގައި ޝާމިލުވާ މީހުން ހައްޔަރުކުރުމުގެ އޮޕަރޭޝަނެއް މިރޭ ފުލުހުން ފަށާފައިވާ ކަމަށެވެ. އެގޮތުން، މިހާތަނަށް އަށް އޮފިސަރަކު ހައްޔަރުކޮށްފައިވާ ކަަމަށް އޭނާ ވިދާޅުވި އެވެ.

އެ އޮޕަރޭޝަނަކީ މިވަގުތު ކުރިއަށްދާ އޮޕަރޭޝަނަކަށްވުމުން، ތަހުގީގު ކުރިއަށްދާ މިންވަރަކުން އިތުރު މައުލޫމާތު ހާމަކުރައްވާނެ ކަމަށް މިނިސްޓަރު ވިދާޅުވި އެވެ. އިހުސާން ވިދާޅުވީ ފައިސާ ޖަމާވި މީހުންގެ އިތުރުން ފައިސާ ޖަމާކުރުމުގެ ހަރަކާތްތެރިވި މީހުންނާ މެދު ވެސް ފިޔަވަޅު އަޅާނެ ކަމަށެވެ.

"މިއަދުގެ ސަރުކާރުގައި ޔުނީފޯމު އެޅި އެއްވެސް އޮފިސަރަކު އެ ބައެއްގެ ގާނޫނު ތަންފީޒުކުރުމުގެ ޒިންމާގެ ތެރޭގައި ފައިސާ ނަގައި ފައިސާއަށްޓަކައި އެ މީހާގެ ޔުނީފޯމު ވިއްކާލައިފި ނަމަ، އެފަދަ އަމަލެއް އަޅުގަނޑުމެން އެއްވެސް ވަރަަކަށް ޓޮލަރޭޓެއް ނުކުރާނަން،" އެ އަމަލު ކުށްވެރިކުރައްވައި އިހުސާން ވިދާޅުވި އެވެ.

މިނިސްޓަރު ވިދާޅުވީ، ޔުނީފޯމު އެޅި އޮފިސަރުންނަށް ރައްޔިތުން ކުރަނީ އާދަޔާ ހިލާފު އިތުބާރެއް ކަމަށާއި އެ އިތުބާރު ގެއްލޭ ގޮތަށް ބައެއް މުވައްޒަފުން އަމަލު ބެހެއްޓުމަކީ ވަރަށް ހިތްދަތިވާ ކަމެއް ކަމަށެވެ. މަގާމާ ހަވާލުވުމަށް ފަހު ވެސް، އެފަދަ އެއްވެސް އަމަލަކަށް އަރައިނުގަތުމަށް ދިވެހި ސަލާމަތީ ހިދުމަތްތަކާ ބެހޭ ހުރިހާ މުވައްޒަފުންނަށް ތަކުރާރުކޮށް ނަސޭހަތްތެރިވެވަޑައިގެންފައިވާނެކަން ވެސް އިހުސާން ފާހަގަކުރެއްވި އެވެ.

އޭނާ ވިދާޅުވީ މި ސަރުކާރުގައި ވެސް އަދި މީގެ ކުރީ ސަރުކާރުގައި ވެސް އެފަދަ އަމަލުތައް ކޮށްފައިވާ ޔުނީފޯމު އެޅި މުވައްޒަފުންގެ މައްސަލަތައް ހާއްސަ އިސްކަމެއްދީގެން ތަހުގީގުކުރާނެ ކަމަށެވެ.