މަގޫދޫ އެއާޕޯޓް ހުއްޓާލީ ސިޔާސީ މަންފާއަށް ކަމަށް ބުނެ މަޖިލީހަށް ކުއްލި މައްސަލައެއް

ސިޔާސީ މަންފާއަށް ފ. ނިލަންދޫގައި އެއާޕޯޓު އެޅުމަށްޓަކައި ފ. މަގޫދޫ އެއާޕޯޓުގެ މަސައްކަތް ހުއްޓާލާފައިވާ ކަމަށް ބުނެ، އެ ނިންމުން މުރާޖައާ ކުރުމަށް ސަރުކާރަށް ގޮވާލާ ކުއްލި މައްސަލައެއް މަޖިލީހަށް ވައްދައިފި އެވެ.

ވީ ކިހިނެއް؟ - މަގޫދޫ އެއާޕޯޓުގެ ބޮޑުބައެއް ނިމިފައިވަނިކޮށް މަޝްރޫއު ހުއްޓާލާފައިވަނީ ރައީސް މުހައްމަދު މުއިއްޒުގެ ބާރުތައް ގާނޫނާއި ހިލާފަށް ބޭނުންކޮށް އަމިއްލަ އާއިލީ އަދި ސިޔާސީ މަންފާއަށް ކަމަށް ފެންނަން އޮތް ކަމަށް ބުނެ މިއަދުގެ ޖަލްސާގައި ކުއްލި މައްސަލަ ހުށަހެޅުއްވީ އެމްޑީޕީގެ ބިލެއްދޫ ދާއިރާގެ މެމްބަރު އަހުމަދު ހަލީމެވެ.

އެ މައްސަލައިގައި ބަހުސްކުރަން ފާސްވެފައިވަނީ 22 މެމްބަރުންގެ ވޯޓުންނެވެ. މައްސަލަ ބަލައިނުގަންނަން ވޯޓު ދެއްވީ 4 މެމްބަރުންނެވެ.

އެނގުން މުހިއްމު - ރައީސް މުހައްމަދު މުއިއްޒު ވަނީ މަގޫދޫއާ ޖެހިގެން ގާތްގަނޑަކަށް 10 މިނެޓުން ދެވެން އޮންނަ ނިލަންދޫގައި އެއާޕޯޓެއް އަޅަން އިއުލާނު ކުރައްވާފަ އެވެ. މިދިޔަ ހަފްތާގައި އެ މަޝްރޫއަށް ބިން ހިއްކުމުގެ މަސައްކަތް ވެސް ވަނީ ފަށާފަ އެވެ.

ކުރިއަށް އޮތް މަޖިލިސް އިންތިިހާބުގައި ވެރިކަންކުރާ މައި ޕާޓީ ޕީއެންސީގެ ފަރާތުން ނިލަންދޫ ދާއިރާއަށް ވާދަކުރައްވަނީ ރައީސް މުއިއްޒުގެ އެއްބަނޑު ކޮއްކޯފުޅު ފާތިމަތު ސައުދާ އެވެ. ނިލަންދޫ އެއާޕޯޓުގެ މަޝްރޫއުގައި ސޮއި ކުރުމާ އެކުވެސް، އެއީ ރައީސްގެ ކޮއްކޯފުޅަށް މަޖިލިސް ގޮނޑި ކާމިޔާބު ކޮށްދިނުމަށް ސަރުކާރުން ނިންމި ނިންމުމެއް ކަމަށް މީހުން ތުހުމަތު ކުރަން ފެށި އެވެ.

އެ މަޝްރޫއަށް ބިން ހިއްކަން ފެށުމާއެކު މަގޫދޫ އެއާޕޯޓުގެ އަމަލީ މަސައްކަތް ވަނީ ހުއްޓިފަ އެވެ. އެކަމާ ހިތްހަމަނުޖެހި މަގޫދޫގެ ރައްޔިތުން ވަނީ އިހުތިޖާޖަށް ވެސް ނުކުމެފަ އެވެ.

ތަފްސީލް - މަގޫދޫ އެއާޕޯޓް ހުއްޓާލުމާ ގުޅިގެން އަހުމަދު ހަލީމް ހުށަހެޅުއްވި ކުއްލި މައްސަލާގައި ފާހަގަކޮށްފައިވާ ގޮތުގައި:

އެހެންކަމުން، ތަރައްގީ އާއި މާލިއްޔަތާއި ގުދުރަތީ ވަސީލަތްތައް ރައީސް އާއި އެމަނިކުފާނުގެ އާއިލާގެ ސިޔާސީ މަންފާއަށް ބޭނުން ކުރަމުންދާ ދިޔުން ސަރުކާރުގެ ސަމާލުކަމަށް ގެނެސް، އެ ކުއްލި މައްސަލާގައި ގޮވާލާފައިވަނީ:

މި މައްސަލާގައި މިއަދުގެ މަޖިލީހުގައި މެމްބަރުން ދަނީ ބަހުސް ކުރަމުންނެވެ. އެ މައްސަލާގައި ބަހުސްކުރަން ބޭނުންވާ ހުރިހާ މެމްބަރުންނަށް ފުރުސަތު ލިބެންދެން ބަހުސްގެ ވަގުތު އިތުރުކުރަން ވަނީ ފާސްވެފަ އެވެ.