މަގޫދޫ އެއާޕޯޓްގެ މަސައްކަތް ހުއްޓާލާކަށް ނާންގާ: އެމްޓީސީސީ

ފ. މަގޫދޫގައި، ސަރުކާރާއި ރައްޔިތުން ބައިވެރިވާ ކޮންސްޓްރަކްޝަން ކޮމްޕެނީ، އެމްޓީސީސީއާ ހަވާލުކޮށްގެން ތަރައްގީ ކުރާ އެއާޕޯޓްގެ މަސައްކަތް ހުއްޓާލަން ސަރުކާރުގެ ރަސްމީ އެއްވެސް ފަރާތަކުން އަންގާފައި ނުވާ ކަމަށް އެމްޓީސީސީގެ ސީއީއޯ އަބްދުﷲ ޒިޔާދު ވިދާޅުވެއްޖެ އެވެ.

ވީ ކިހިނެއް؟ - މަގޫދޫގައި ތަރައްގީކުރާ އެއާޕޯޓްގެ މަސައްކަތް ނިމެން ކައިރިވެފައިވަނިކޮށް އެރަށާ ވަރަށް ގާތުގައި އޮންނަ ނިލަންދޫގައި ވެސް އެއާޕޯޓެއް އަޅަން ރައީސް މުހައްމަދު މުއިއްޒުގެ ސަރުކާރުން ވަނީ ނިންމައިފަ އެވެ. އަދި މަގޫދޫގެ އެއާޕޯޓްގެ މަސައްކަތް ކުރިއަށް ނުގެންގޮސް، ނިލަންދޫގައި އެއާޕޯޓް އަޅާތީ މަގޫދޫ މީހުން ވަނީ ކަންބޮޑުވުން ފާޅުކޮށްފަ އެވެ. އަދި އެ މީހުން އަޑުއުފުލި ގޮތުގައި، މަގޫދުއާ ޖެހިގެން އޮންނަ ނިލަންދޫގައި އެއާޕޯޓެއް އަޅަނީ، ރައީސް މުއިއްްޒުގެ އެއްބަނޑު ކޮއްކޮށް އެ ދާއިރާއަށް ކުރިމަތި ލައްވާތީ އެވެ.

ތަފްސީލު - މަގޫދޫ އެއާޕޯޓް މަޝްރޫއު ހުއްޓާލަފާނެ ކަމުގެ ބިރު އޮވެގެން އެ ރަށު މީހުން ރޭ ވަނީ ސުލްހަވެރި އިހުތިޖާޖެއް ވެސް ކޮށްފަ އެވެ.

މީގެ އިތުރުން އެއާޕޯޓް މަސައްކަތް ކުރާ ސަރަހައްދުގައި ރޭ އެ ރަށު ރައްޔިތުން ވަނީ ހޮޅިން ގޭޓެއް ހަދައިފަ އެވެ. އެގޮތަށް ކަންތައް ކުރީ މަސައްކަތްކުރާ ސައިޓުގައި ހުރި ވެހިކަލްތައް ރަށުން ގެންދަން އުޅޭތީ ވެހިކަލްތައް ގެންދެވޭނީ ރައްޔިތުންގެ ހުއްދައާ އެކު ކަމަށް އިހުތިޖާޖުގައި ބައިވެރިވި ރައްޔިތުން ނިންމުމުން ކަމަށް މަގޫދޫ ކައުންސިލްގެ ރައީސް އަބްދުﷲ ވަހީދު މިއަދު 'ދައުރު' އަށް ވިދާޅުވި އެވެ.

މަގޫދޫ އެއާޕޯޓް ހުއްޓާލަފާނެތޯ ނުވަތަ އެފަދަ އެންގުމެއް ކަމާބެހޭ މިނިސްޓްރީ އިން ވިޔަސް އަންގާފައިވޭތޯ 'ދައުރު' އިން ސުވާލު ކުރުމުން އެމްޓީސީސީގެ ސީއީއޯ ޒިޔާދު ވިދާޅުވީ މަގޫދޫ އެއާޕޯޓްގެ މަސައްކަތް ހުއްޓާލާފާނެތޯ ސުވާލު އުފައްދަން ފަށާފައިވާ އަޑުތައް އިވިވަޑައިގަތުމުން  ހައިރާންކަންލިބިވަޑައިގެންނެވި ކަމަށެވެ.

"އެ މަސައްކަތް އަދި ވެސް އަޅުގަނޑުމެންގެ ޕްރޮޖެކްޓް ލިސްޓުގައި އެބައޮތް. ރަސްމީ އެއްވެސް ފަރާތަކުން ނާންގާ މަސައްކަތް ހުއްޓާލުމަކަށް،" އޭނާ ވިދާޅުވި އެވެ.

ކޮންޓްރެކްޓަރުގެ ހައިސިއްޔަތުން، މިކަމުގައި އިތުރު ކޮމެންޓެއް ކުރައްވަން ޒިޔާދު އުޒުރުވެރިވެ ވަޑައިގެންނެވި އެވެ. އަދި މި ޕްރޮޖެކްޓާ މެދު އެކި ގޮތްގޮތަށް ވާހަކަތައް ދެކެވޭތީ އެއާޕޯޓް މަސައްކަތުގެ އެއްވެސް އަޕްޑޭޓޭއް ހިއްސާ ކުރައްވަން ވެސް އުޒުރުވެރިވެ ވަޑައިގެންނެވި އެވެ.

އޭނާ ވިދާޅުވީ އެންމެ ރަނގަޅު މައުލޫމާތު ދެއްވޭނީ ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އަށް ކަމަށެވެ.

އެ ޕްރޮޖެކްޓު ހުއްޓާލީތޯ ނުވަތަ އަދިވެސް ކުރިއަށް ގެންދާނީތޯ ސާފުކުރަން މިނިސްޓަރު މުއްތޮލިބަށް ގުޅުމުންނާއި މެސެޖަށް ޖަވާބު ނުދެއްވާތީ މިނިސްޓްރީގެ ބަހެއް ލިބޭ ގޮތެއް ނުވެ އެވެ.

ގުޅުން ހުރި - މަގޫދޫ ކައުންސިލްގެ ރައީސް، ވަހީދު މިއަދު ވިދާޅުވީ އެ ރަށު އެއާޕޯޓްގެ އަމަލީ މަސައްކަތްތައް ހުއްޓާލާފައި އޮންނަތާ ދެތިން ދުވަސްވެފައިވާ ކަމަށެވެ.