ސިޔާސީ މަގާމުތަކުގެ ތަފްސީލް ހާމަނުކޮށް ނުހިފެހެއްޓޭނެ ކަަމަށް އައިކޮމް އިން ނިންމައިފި

ސަރުކާރުގެ ސިޔާސީ މަގާމުތަކާ ގުޅޭ ތަފްސީލަކީ ހިފެއްހޭޓޭނެ ކަމެއް ނޫން ކަމަށާއި އެއީ ހާމަ ކުރަން ޖެހޭ މައުލޫމާތެއްގެ ގޮތުގައި އިންފޮމޭޝަން ކޮމީޝަނަރު އޮފީހުން (އައިކޮމް) މިއަދު ނިންމައިފި އެވެ.

ވީ ކިހިނެއް؟ - މައުލޫމާތު ހޯދުމާއި ލިބިގަތުމުގެ ހައްގުގެ ގާނޫނުގެ ދަށުން މި ސަރުކާރުގެ ސިޔާސީ މަގާމުތަކަށް އައްޔަން ކުރި ބޭފުޅުންގެ މުސާރަތައް ހިމެނޭހެން އެ މަގާމުތަކުގެ ތަފްސީލުތައް ހޯދުމަށް 'ދައުރު'ން މިދިޔަ ޑިސެމްބަރު މަހު، ރައީސް އޮފީހުގައި އެދި ގާނޫނުގައި ބުނާ މުއްދަތު ފަހަނައަޅާ ގޮސް، މުއްދަތު އިތުރުކޮށްގެން ވެސް އެ މައުލޫމާތު އެ އޮފީހުން ދީފައެއް ނުވެ އެވެ.

އެހެންވެ، އެކަމުގެ ޝަކުވާ 'ދައުރު'ގެ ފަރާތުން އައިކޮމްއަށް ހުށަހެޅުމުން އެ މައްސަލައިގެ ފުރަތަމަ އަޑުއެހުން މިއަދު ވަނީ ބާއްވާފަ އެވެ. 

ތަފްސީލު - އެ އަޑުއެހުމުގައި އިންފޮމޭޝަން ކޮމިޝަނަރު އާހިދު ރަޝީދު ވިދާޅުވީ ހޯދަން އެދިފައިވާ މައުލޫމާތަކީ ގާނޫނުގެ ދަށުން ނުދީ ހިފެހެއްޓުމަށް ބަޔާންކުރާ އިސްތިސްނާ ހާލަތައް ފެތޭ މައުލޫމާތުތަކެއް ނޫން ކަމަށެވެ. އެހެންވެ އާހިދު ނިންމެވީ:

'ދައުރު'ން ހޯދަން އެދުނު މައުލޫމާތުތަކުގެ ތެރޭގައި ހިމެނެނީ 17 ނޮވެމްބަރު 2023އިން 17 ޑިސެމްބަރު 2023ގެ ނިޔަލަށް ސަރުކާރުގެ ސިޔާސީ މަގާމުތަކަށް އައްޔަންކޮށްފައިވާ ބޭފުޅުންގެ ނަމާއި އެމީހުން މަގާމާއި މުސާރަ/އިނާޔަތްތައް ހޯދުމަށެވެ. އޭގެ ތެރޭގައި ހޯދަން އެދުނީ:

ރައިސް އޮފީހުން މީގެ ކުރިން އެ އެފީހުގެ ސައިޓުގައި އާންމު ކުރަމުން އައި ސިޔާސީ މަގާމުތަކަށް އައްޔަން ކުރާ ފަރާތްތަކުގެ މައުލޫމާތު ވެސް މިހާރު އަޕްޑޭޓެއް ކުރަމަކުން ނުދެ އެވެ. ސަބަބެއް ކަމަށް އެ އޮފީހުން ބުނެފައި ވަނީ "ޓެކްނިކަލް މައްސަލައަކުން" ކަމަށެވެ.

ފާހަގަކޮށްލެވޭ ކަމެއް - މީގެ ކުރިން ތިން ފަހަރެއްގެ މަތިން މި އަޑުއެހުން ތާވަލް ކުރުމުން އެ އަޑުއެހުމުގައި ރައީސް އޮފީހުން ބައިވެރިވެފައެއް ނުވެ އެވެ. އެހެންވެ އަޑުއެހުންތައް ކުރިއަށް ނުގެންދެވި މައްސަލަ އޮތީ މަޑު ޖެހިފަ އެވެ.

އާހިދު މިއަދު ވިދާޅުވި ގޮތުގައި ކޮންމެ ފަހަރަކު ވެސް ރައިސް އޮފީހުން އަންގަމުން ދަނީ އަޑުއެހުމުގައި ބައިވެރިވެވެން ނެތް ކަމަށެވެ. އެހެންވެ، ކޮންމެ ފަހަރަކު ވެސް ދުވަސް ބަދަލުކޮށް، އަލުން ތާވަލް ކުރަމުން ދިޔައީ ކަމަށް އޭނާ ވިދާޅުވި އެވެ.

ޝަކުވާ ހުށަހެޅިތާ މިއަދަށް 30 ދުވަސްވެފައިވާތީވެ ގާނޫނުގެ ދަށުން 30 ދުވަހުގައި މައްސަލަ ނިންމަން ޖެހޭތީ ދެން އިތުރަށް ލަސް ކުރެވެން ނެތުމުން، އާހިދު މިއަދު މި ނިންމުން ނިންމާފައި ވަނީ ރައީސް އޮފީހުގެ ގައިރު ހާޒިރުގަ އެވެ.

މިއަދުގެ އަޑުއެހުމުގައި ކޮމިޝަނަރު ވަނީ މުލިއާގެ މަރާމާތައް ދިޔަ ހަރަދު ވެސް ތިން ދުވަސް ތެރޭ ދިނުމަށް ރައީސް އޮފީހަށް އަންގާފަ އެވެ.