އެލްޖީއޭ އިން ކައުންސިލަށް ފޮނުވީ ރައީސް އޮފީހުން ޑްރާފްޓް ކުރި ސިޓީއެއް، މައްސަލަ ބަލާނެ: އެމްޑީޕީ

ނ. ކެނދިކުޅުދޫ ރަށު ކައުންސިލުން ރައީސް މުހައްމަދު މުއިއްޒުއަށް ކިޔާފައި ނެރުނު ބަޔާން ބާތިލްކުރަން އަންގައި ލޯކަލް ގަވަމަންޓް އޮތޯރިޓީ (އެލްޖީއޭ) އިން ނ. ކެނދިކުޅުދޫ ކައުންސިލަށް ފޮނުވި ސިޓީއަކީ ރައީސް އޮފީހުން ޑްރާފްޓްކުރި ސިޓީއެއް ކަމަށް އެމްޑީޕީން ތުހުމަތުކޮށްފި އެވެ.

މައްސަލައިގެ ފެށުން - ރައީސް މި ފަހުން ކެނދިކުޅުދުއަށް ވަޑައިގެން ދައުލަތުގެ ވަސީލަތްތަކުގެ ބޭނުން ނަހަމަ ގޮތުގައި ހިއްޕަވައި ރަަސްމީ ދަތުރުފުޅުގެ ނަމުގައި ކެމްޕޭނު ހަރަކާތްތައް ހިންގަވާ ކަމަށް ބުނެ ކެނދިކުޅުދޫ ކައުންސިލުން ބަޔާން ނެރުނީ މިދިއަ އާދިއްތަ ދުވަހުގެ ރެ އެވެ. އޭގެ އަނެއް ދުވަހު އެ ބަޔާން ބާތިލުކުރަން އެންގުމުން އެލްޖީއޭއަށް ވަރަށް ބޮޑަށް ފާޑުކިޔުން އަމާޒުވި އެވެ.

އެ މައްސަލަ ހޫނުވެފައި ވަނިކޮށް ރައީސް ދ. މީދުއަށް ވަޑައިގެން ބޭއްވި ޖަލްސާއެއްގައި ވާހަކަފުޅު ދައްކަވަމުން ރޭ ވިދާޅުވެފައިވަނީ، ކައުންސިލްތަކަށް ފިޔަވަޅު އަޅައި، ކައުންސިލްތަކަށް ހުރަސް ކުރިމަތިކޮށް، ދަތިކުރުމަކީ އެމަނިކުފާނުގެ ސިޔާސަތެއް ނޫން ކަމަށެވެ. އަދި އެފަދަ ކަމަކަށް ތާއީދު ވެސް ނުކުރައްވާނެ ކަމަށް ވިދާޅުވި އެވެ.

ވީ ކިހިނެއް؟ - ރައީސް އެހެން ވިދާޅުވި ކަމަށް އޮތް ހަބަރެއް ރީޕޯސްޓް ކުރައްވާ، އެމްޑީޕީގެ ކުރީގެ ޑެޕިއުޓީ ޗެއާޕާސަން އަދި ހުޅުމާލޭ ދާއިރާގެ މެމްބަރު އަލީ ނިޔާޒް ތުހުމަތު ކުރެއްވީ، އެލްޖީއޭ އިން ފޮނުވި ސިޓީ ޑްރާފްޓް ކުރީ ރައީސް އޮފީހުން ކަމަށެވެ.

މިއަދު 'އެކްސް'ގައި އަލީ ނިޔާޒް ކުރެއްވި ޕޯސްޓުގައި އޭނާ ވިދާޅުވީ:

"މައްސަލަ މަޖްލިސްއަށް ވަނީ ލިބިފައި. އެކަން ކޮމިޓީއިން ބަލާނެ،" އަލީ ނިޔާޒް ވިދާޅުވި އެވެ.

ފާހަގަކޮށްލެވޭ - ރައީސް މުއިއްޒު މިހާރު ރަށްރަށަށް ކުރައްވާ ދަތުރުފުޅުތަކަށް ފާޑުކިޔާ ނ. ކެނދިކުޅުދޫ ކައުންސިލުން ނެރުނު ބަޔާން ބާތިލްކުރަން އެލްޖީއޭ އިން އެންގުމުން، އެ ކައުންސިލަރުން އަނގަމަތީގައި ޓޭޕް އަޅުއްވައިގެން އެކަމާ ދެކޮޅަށް އިހްތިޖާޖް ވެސް ކުރެއްވި އެވެ.