މަޖިލީހުގެ ރައީސާއި ނައިބު ރައީސް ވަކިކުރަން ހުށަހަޅައިފި

ރައްޔިތުންގެ މަޖިލީހުގެ ރައީސް މުހައްމަދު އަސްލަމް އާއި ނައިބު ރައީސް އަހުމަދު ސަލީމްގެ އިތުބާރު ނެތް ކަމުގެ މައްސަލަ، ވެރިކަން ކުރާ ޕީޕީއެމް-ޕީއެންސީގެ ޕާލިމެންޓްރީ ގްރޫޕުން ދެންމެއަކު މަޖިލީހަށް ވައްދައިފި އެވެ.

ވީ ކިހިނެއް؟ - މައި އިދިކޮޅު ޕާޓީ ކަމަށްވާ އެމްޑީޕީއަށް ނިސްބަތްވެވަޑައިގަންނަވާ ދެ ބޭފުޅުންގެ އިތުބާރު ނެތް ކަމުގެ މައްސަލަ މަޖިލީހަށް ވައްދާފައި ވަނީ ޖުމްލަ 23 މެމްބަރުންގެ ސޮޔާ އެކު އެވެ.

ތަފްސީލު - ހިތަދޫ އުތުރު ދާއިރާގެ މެމްބަރުކަން ކުރައްވާ އަސްލަމް އާއި ހޯރަފުށި ދާއިރާ ތަމްސީލުކުރައްވާ ސަލީމްގެ އިތުބާރު ނެތް މައްސަލަ މަޖިލީހަށް ވެއްދީ، ސަރުކާރުގެ ބައެއް ވަޒީރުންނަށް ރުހުން ނުދޭން އިދިކޮޅު އެމްޑީޕީ އާއި ޑިމޮކްރެޓްސްގެ ޕީޖީ ގްރޫޕުން ނިންމި ނިންމުމާ ގުޅުވައިގެންނެވެ.

މަޖިލީހުގެ ރައީސްގެ އިތުބާރު ނެތް ކަމުގެ މައްސަލައިގައި މަޖިލީހަށް ހުށަހެޅި ގަރާރުގައި ބުނެފައިވަނީ:

ވަޒީރުންނަށް ރުހުން ދިނުމުގެ މައްސަލައިގައި އަސްލަމް އަމަލުކުރެއްވީ މަޖިލީހުގެ ގަވާއިދާއި ގާނޫނުއަސާސީގެ 70 ވަނަ މާއްދާ އާއި 75 ވަނަ މާއްދާއާ ހިލާފަށް ކަމަށް ވެސް އެ ގަރާރުގައި ބަޔާންކޮށްފައިވެ އެވެ.

"އިސްވެ ބަޔާންކުރެވުނު ސަބަބުތަކަށް ރިއާޔަތްކޮށް، ހިތަދޫ އުތުރު ދާއިރާގެ އިއްޒަތްތެރި މެމްބަރު މުހައްމަދު އަސްލަމް ރައްޔިތުންގެ މަޖިލީހުގެ ރައީސްކަމުގެ މަގާމުގައި ދެމިހުރުމަށް ކުރަމުން އައި އިތުބާރު އަޅުގަނޑުމެންނަށް ގެއްލިފައިވާތީ، ރައްޔިތުންގެ މަޖިލީހުގެ ރައީސްކަމުގެ މަގާމުން ހިތަދޫ އުތުރު ދާއިރާގެ އިއްޒަތްތެރި މެމްބަރު މުހައްމަދު އަސްލަމް ވަކިކުރުމަށް އަޅުގަނޑުމެން ސޮއިކޮށް ހުށަހަޅަމެވެ،" ޕީޕީއެމްގެ ދެ މެމްބަރުންނާއި ޕީއެންސީގެ 14 މެމްބަރުންނާއި އެމްޑީއޭގެ ދެ މެމްބަރުންގެ އިތުރުން އަމިއްލަ ހަތަރު މެމްބަރުން ވެސް ސޮއިކުރައްވާފައިވާ އެ ގަރާރުގައިވެ އެވެ.

މަޖިލީހުގެ ނައިބު ރައީސް ސަލީމްގެ އިތުބާރު ނެތް ކަމުގެ މައްސަލަ ވެއްދީ، އެ މައްސަލައިގެ ގަރާރުގައިވާ ގޮތުން، ވަޒީރުންނަށް ރުހުން ދިނުމުގެ މައްސަލައިގައި މަޖިލީހުގެ ރައީސް ގަވާއިދާ ހިލާފަށް އަމަލުކުރެއްވިއިރު އެކަން ހުއްޓުވަން އޭނާ މަސައްކަތް ނުކުރެއްވުމުންނެވެ.

އެނގުން މުހިންމު - ރުހުން ދިނުމުގެ މައްސަލާގައި ވޯޓަށް އަހަން މިއަަދަށް ތާވަލުކޮށްފައި އޮތް ނަމަވެސް، އެމްޑީޕީ އާއި ޑިމޮކްރެޓްސްއިން ބައެއް ވަޒީރުންނަށް ރުހުން ނުދޭން ނިންމުމާ ގުޅިގެން، ސަރުކާރު ހިންގާ ޕީޕީއެމް-ޕީއެންސީގެ މެމްބަރުން މަޖިލީހުގެ ތަޅުމުގައި އިހުތިޖާޖު ކުރައްވަމުން ގެންދަވާތީ އަދިވެސް ވޯޓަށް އެހޭ ގޮތެއް ނުވެ އެވެ. 

ޖަލްސާ މެދުކަނޑާލުމަށް ފަހު އަލުން ފެށުމަށް ދެ ފަހަރެއްގެ މަތިން މަސައްކަތްކޮށް ވެސް އެކަން ކާމިޔާބުވާ ގޮތް ނުވެ، ހަމަނުޖެހުން ހިންގާ ހިސާބަށް ވަނީ ގޮސްފަ އެވެ. އެގޮތުން، އެއް މެމްބަރަކު އަނެއް މެމްބަރަކު ގަޔަށް އަތްލައި ބައެއް މެމްބަރުންނަށް އަނިޔާވެގެން ހޮސްޕިޓަލަށް ވެސް މިހާރު ވަނީ ގެންގޮސްފަ އެވެ.

މަޖިލީހުގައި: