ހައި ކޯޓުގައި ބޭއްވި އިސްތިއުނާފް އަޑުއެހުމުގެ ތެރެއިން އިބްރާހީމް ފައިހް ނިޒާމު، ރަށްދެބައިގެ/އައްޑޫ މަރަދޫފޭދޫ
ފައިހް އަކީ ޝަރީއަތް ނިމެންދެން ބަންދުކުރަން ޖެހޭ މީހެއް ކަމަށް ނިންމައިފި
ގްރޫޕު ހަދައިގެން މާލޭގައި ސިލްސިލާކޮށް ހިންގި މާރާމާރީތަކަކާ ގުޅިގެން ހައްޔަރުކޮށް ދައުވާ އުފުލާފައިވާ އިބްރާހީމް ފައިހް ނިޒާމްގެ ޝަރީއަތް ދިގުލާފައިވާތީ ޝަރީއަތް ނިމެންދެން ބަންދުކުރުން އިންސާފުވެރި ނުވާނެ ކަމަށް ބުނެ، 45 ދުވަހަށް ބަންދުގައި ބަހައްޓަން ކްރިމިނަލް ކޯޓުން ކުރި އަމުރު، ހައި ކޯޓުން މިއަދު ބާތިލުކޮށްފި އެވެ.
މައްސަލައިގެ ފެށުން - މާލޭގައި ސިލްސިލާކޮށް މާރާމާރީތަކެއް ހިންގަމުން ދަނިކޮށް، އެ ކަމުގެ ތުހުމަތުގައި އިބްރާހީމް ފައިހް ނިޒާމު، ރަށްދެބައިގެ/އައްޑޫ މަރަދޫފޭދޫ، ހޯދަން އެންމެ ފުރަތަމަ އިއުލާންކުރީ މިދިޔަ ފެބްރުއަރީ 15އިގަ އެވެ. ފައިހް ފޮރުވައިގެން އުޅުނު ކަމުގެ ތުހުމަތުގައި ފަސް މީހަކު ހައްޔަރުކުރި ފަހުން، އޭނާ ވަނީ މާޗު މަހުގެ ތެރޭގައި އަމިއްލައަށް ފުލުހުންނާ ހަވާލު ވެފަ އެވެ.
ޖެހިގެން އައި އޭޕްރީލު މަސް ތެރޭ އޭނާގެ މައްޗަށް ތިން ދައުވާއެއް އުފުލި އެވެ. އެއީ:
-
ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާ
-
ގައިގާ އަތްލުން
-
ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްތުގައި ހުރަސް އެޅުން
މި މައްސަލާގައި ޝަރީއަތް ފެށުމަށް މިދިޔަ މޭ މަހުގެ ތެރޭގައި ބޭއްވި އަޑުއެހުމުގައި މައްސަލަ ބައްލަވާ ގާޒީ އިސްމާއިލް ޝަފީއު ވަނީ، ފައިހު އަކީ މީގެ ކުރިން ވެސް ފިލައިގެން އުޅެފައިވާ މީހަކަށް ވާތީ އާއި މައްސަލައިގެ ބާވަތުން މުޖުތަމައުއަށް ނުރައްކާވުމުގެ ފުރުސަތު އޮތުމުން، ޝަރީއަތް ނިމެންދެން ބަންދުކުރަން އަމުރުކުރައްވާފަ އެވެ. އެކަމަކު އޭގެ ފަހުން ޝަރީއަތްތައް ކުރިއަށް ނުގެންދެވި ގިނަ ދުވަސްތަކެއް ވުމުން އޭނާ ދޫކޮށްލީ މިދިޔަ މަހުގެ 6 ގައެވެ.
ދޫކޮށްލާފައި ހުއްޓައި އަލުން މިދިޔަ މަހުގެ 6ގައި ފައިހް ހައްޔަރުކޮށް، މިހާރު ބަންދުގައި ބަހައްޓާފައިވަނީ:
-
އޭރު ހިނގައި ދިޔަ ސިލްސިލާ މަރާމާރީތަކުގެ ތެރެއިން މާފަންނު ކްރާސާ ފިހާރާގައި ހަމަލާދީގެން މަރުވި މުހައްމަދު އަހުމަދު ދީދީ (ނައުއްޓެ)، 30،ގެ މަރުގެ މައްސަލައިގެ ތުހުމަތަށް؛ އޭނާ މަރުވެފައި ވަނީ މިދިޔަ 27 ފެބްރުއަރީގައި އައިޖީއެމްއެޗްގައި ފަރުވާ ދެމުން ދަނިކޮށް
-
ފައިހު އަލުން ހައްޔަރުކޮށް، މިދިޔަ މަހުގެ 7ގައި ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމަށް ފަހު ވެސް ފުލުހުން އެދުނީ ޝަރީއަތް ނިމެންދެން ބަންދުގައި ބެހެއްޓުމަށް
-
ނަމަވެސް، ބަންދުގެ މުއްދަތު ޖެހި ގާޒީ އަލީ ނަދީމް އަމުރުކުރެއްވީ އޭނާ 45 ދުވަހު ބަންދުގައި ބެހެއްޓުމަށް؛ ސަބަބަކަށް ބުނީ މައްސަލައިގެ ތަހުގީގު އަށް މަސްދުވަހަށް ވުރެ ދިގުވެފައިވާތީއާ، އަދިވެސް މި ތަހުގީގު ދިގުލައިގެން ދިއުމުގެ ފުރުސަތު އޮތުމުން ކަމަށް
-
ފައިހްގެ ބަންދަށް ޖެހި 45 ދުވަސް މިމަހުގެ 22އަށް ހަމަވާނެ
މި އަމުރާމެދު ހިތްހަމަނުޖެހިގެން ހައި ކޯޓުގައި ޕްރޮސެކިއުޓަ ޖެނަރަލް ޕީޖީ އޮފީހުން މިިދިޔަ މަހުގެ 16ގައި ކުރި އިސްތިއުނާފްގައި ބުނީ، ކްރިމިނަލް ކޯޓުން ފައިހް ޝަރީއަތް ނިމެންދެން ބަންދުނުކުރެވޭނެ ކަމަށް ނިންމީ ޝަރުއީ އަދި ގާނޫނީ އުސޫލުތަކާ ހިލާފަށް ކަމަށެވެ.
ބުނީ ކީކޭ؟ - ކްރިމިނަލް ކޯޓުގެ އެ އަމުރު ބާތިލުކޮށް ހައި ކޯޓުން މިއަދު ނެރެފައިވާ ވަގުތީ އަމުރުގައި ވަނީ، މިއަދުން ފެށިގެން ކުރިއަށް އޮތް ހަތް ދުވަސްތެރޭ، ފައިހުގެ ތަހުގީގީ އަދި ޝަރީއަތުގެ މަރުހަލާ ނިމެންދެން ބަންދުގައި ބަހައްޓާ ދިނުމަށް އެދި ފުލުހުން ހުށަހަޅައިފިނަމަ، ކްރިމިނަލް ކޯޓުން އެ އަމުރު ނެރެދިނުމަށް އަންގާފަ އެވެ.
ހައި ކޯޓުގެ އަމުރުގައި ބުނީ:
-
މަރުގެ ކުށުގައި ތުހުމަތުކުރެވޭ މީހެއް ބަންދުކުރުމުގައި ރިއާޔަތްކުރަންޖެހެނީ މައިގަނޑު ދެކަމަކަށް؛ އެއީ އެ ކުށް އެމީހެއްގެ މައްޗަށް ތުހުމަތުކުރެވޭތޯ އަދި ޝަރީއަތުން ހުކުމެއް ކުރުމުގެ ކުރިން މީހަކު ބަންދުގައި ބެހެއްޓިދާނެ ހާލަތުތައް ވުޖޫދުވޭތޯ
-
މި މައްސަލާގައި އެ ދެ ޝަރުތު ފުރިހަމަވާއިރު، ތަހުގީގު މަރުހަލާ އާއި ޝަރީއަތުގެ މަރުހަލާ ނިމެންދެން އެމީހަކު ބަންދުގައި ބެހެއްޓުމަށް އަމުރު ކުރުން ނޫން އެހެން އިހްތިޔާރެއް ފަނޑިޔާރަށް ލިބިގެން ނުވޭ
-
މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެކަމަށް ބަލައި އަދި ހެކި ފޮރުވުމަށް ނުވަތަ ހެކިބަސް ދޭންހުރި މީހަކަށް ނުފޫޒެއް ފޯރުވުމަށް މަސައްކަތްކޮށްފާނެކަމަށް ބަލައި، ތަހުގީގުގެ މަރުހަލާ އާއި ޝަރީއަތުގެ މަރުހަލާ ނިމެންދެން ބަންދުގައި ބެހެއްޓުމަށް ގާނޫނުއަސާސީން ފަނޑިޔާރަށް މަގުފަހިކޮށްދީފައިވޭ
-
ކްރިމިނަލް ކޯޓުގެ އަމުރު ޝަރުއީ އަދި ގާނޫނީ އުސޫލުތަކާ ހިލާފު
މައްސަލައިގެ ހުލާސާ
ފައިހްގެ މައްޗަށް ކުރާ ދައުވާގެ ހުލާސާގައި ބުނަނީ، މިދިޔަ ފެބްރުއަރީ 24ގެ ރޭގަނޑު 9:31 ހާއިރު މުރަނގަމަގުގައި ހުންނަ 'ކްރާސާ ފިހާރަ' ތެރެއަށް ބަޔަކު މީހުން ވަދެ އެ ފިހާރަ ތެރޭގައި ހުރި މުހައްމަދު އަހުމަދު ދީދީ އަށް ތޫނު ހަތިޔާރުން ހަމަލާދީ ޒަހަމުކޮށްލާފައިވާ ކަމަށެވެ.
އޭނާއަށް ލިބުނު އަނިޔާތަކަށް އައިޖީއެމްއެޗްގައި ފަރުވާދެމުން ދަނިކޮށް މަރުވެފައި ވާތީ އެ މަރުގެ ތުހުމަތަށް ކޯޓު އަމުރެއްގެ ދަށުން މިދިޔަ 6 ނޮވްމެބަރުގައި ހަ މީހަކު ހައްޔަރުކޮށްފައިވާ ކަމަށް ދައުވާގެ ހުލާސާގައި ވެއެވެ. އެ ދުވަހު ހައްޔަރުކުރި މީހުންގެ ތެރޭގައި ފައިހު ހިމެނެ އެވެ.
އެންމެ ފުރަތަމަ ހަައްޔަރު ކުރުމަށް ފަހު ފައިހުގެ މައްޗަށް އުފުލި ތިން ދައުވާގެ މައްސަލާގެ ޝަރީއަތް ފެށުމަށް މިދިޔަ މޭ މަހުގެ ތެރޭގައި ބޭއްވި އަޑުއެހުމަށް ފަހު މިހާތަނަށް ތާވަލުކުރި އެއްވެސް އަޑުއެހުމެއް ކުރިއަށް ގެންދެވިފައެއް ނުވެ އެވެ. އެ އަޑުއެހުންތައް ކުރިއަށް ގެންދެވިފައި ނުވަނީ ފައިހުއާ ދެކޮޅަށް ދައުލަތުން ހުށަހަޅާފައިވާ ހެކިން ހާޒިރު ނުކުރެވިގެން ނެވެ.
-
އިތުރަށް ކިޔާލަން - ހެކިން ހާޒިރުނުކުރެވިގެން ފައިހްގެ މައްސަލަ ތާށިވެފައި