ސޯލިހް މާފު ދެއްވުމުން އަދީބު ރާއްޖެއިން ފުރާވަޑައިގެންފި

އެމްއެމްޕީއާރުސީގެ ބޮޑު ހިޔާނާތް ހިންގުމުގައި އިސްކޮށް އުޅުއްވި ކުރީގެ ނައިބު ރައީސް އަހްމަދު އަދީބަށް ކުރީގެ ރައީސް އިބްރާހިމް މުހައްމަދު ސޯލިހް ދެއްވި މައާފާ އެކު އޭނާ ރާއްޖެ އިން ފުރާވަޑައިގެންފައިވާކަން 'ދައުރު' އަށް އެނގިއްޖެ އެވެ.

ވީ ކިހިނެއް؟ - ސޯލިހްގެ ފަސް އަހަރުގެ ވެރިކަން ނިމެން އެންމެ ފަސް ދުވަހަށް ވެފައި ވަނިކޮށް އަދީބަށް މައާފު ދެއްވައި މިނިވަންކުރެއްވީ މިދިޔަ ހޯމަ ދުވަހު އެވެ.

ތަފްސީލު - އިތުބާރު ހުރި މަސްދަރަކުން 'ދައުރު'އަށް މިރޭ ކަށަވަރުކޮށްދިން ގޮތުގައި އަދީބު މިހާރު ވަނީ ރާއްޖެ ދޫކޮށް ވަޑައިގެންފަ އެވެ.

އަދީބު ފުރާވަޑައިގެންނެވީ ކޮން އިރަކު، ކޮން ގައުމަކަށް ކަމެއް އަދި ކަށަވަރެއް ނޫނެވެ. އޭނާ ފުރާވަޑައިގެންނެވިއިރު، ސޯލިހްގެ ދައުރު ނިމި، އާ ރައީސް ޑރ. މުހައްމަދު މުއިއްޒު އިއްޔެ ވަނީ ވެރިކަމާ ހަވާލުވެވަޑައިގެންފަ އެވެ.

އެމްއެމްޕީއާރުސީގެ ހިޔާނާތުގެ މައްސަލައިގައި ދައުލަތާ އެކު ހެދި އިއުތިރާފް އެއްބަސްވުމެއްގެ ދަށުން އަދީބު 20 އަހަރަށް ޖަލަށް ލުމަށް ވަނީ ހުކުމް ކޮށްފަ އެވެ.

ގުޅުންހުރި - އެ ހިޔާނާތާ ގުޅިގެން އެ ކުންފުނީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ މައްޗަށް އިއްވި 32 އަހަރުގެ ޖަލު ހުކުމް ވެސް ސޯލިހް ވަނީ މިދިޔަ ހޯމަ ދުވަހު މައާފްކޮށްދެއްވާފަ އެވެ.

އެ ދެ ބޭފުޅުންނާ އެކު ހެދި އިއުތިރާފް އެއްބަސްވުމާ އެކު، ހުކުމް ތަންފީޒު ކުރައްވަމުން ގެންދެވީ ވެސް ގޭ ބަންދުގައި ތިއްބަވައިގެންނެވެ.

ފަސްމަންޒަރު - ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި އެމްއެމްޕީއާރުސީގެ ހިޔާނާތުގެ ތެރެއިން ރާއްޖޭގެ ރަށްތަކާއި ފަޅުތައް ކުއްޔަށް ދީގެން ދައުލަތަށް ލިބެން ޖެހޭ 3.2 ބިލިއަަނަށް ވުރެ ގިނަ ރުފިޔާ އަމިއްލަ ފަރާތްތަކުގެ އެކައުންޓުތަކަށް ވައްދައި އެކި ބޭނުންތަކަށް ބޭނުންކުރި އެވެ.

ސޯލިހް 2018ގައި ވެރިކަމަށް ވަޑައިގަތީ އެ ހިޔާނާތް ތަހުގީގުކޮށް ގެއްލުނު ފައިސާ ހޯދުމުގެ ވައުދަކާ އެކު އެވެ. ނަމަވެސް އެމަނިކުފާނުގެ ވެރިކަމުގެ ފަސް އަހަރު ނިމިގެންދިޔަ އިރު އެއިން އެންމެ ރުފިޔާއެއް ވެސް ދައުލަތަށް ހޯދިފައެއް ނުވެ އެވެ.

އެ ވައުދު ނުފުއްދި، އެކަމުގައި އިސްކޮށް ތިބި މީހުންނަށް ސޯލިހް މައާފް ދެއްވުމާ ގުޅިގެން ބައެއް ސިޔާސީ ޕާޓީތަކާއި ޖަމިއްޔާތަކުން ވަނީ އެކަން ކުށްވެރިކޮށްފަ އެވެ. އަދި އާންމުންގެ ފާޑުކިޔުން ވެސް ސޯލިހަށް ވަނީ އަމާޒުވެފަ އެވެ.

ގުޅުންހުރި - މި ހިޔާނާތާ ގުޅޭ މައްސަލައެއްގައި ޔާމީންގެ މައްޗަށް ކޮށްފައިވާ 11 އަހަރުގެ ޖަލުގެ ހުކުމް ތަންފީޒު ކުރެއްވުމަށް އެމަނިކުފާނު މިދިޔަ ދެ އަހަރު ހުންނެވީ ޖަލުގަ އެވެ. ނަމަވެސް، ސޯލިހަށް ރިޔާސީ އިންތިހާބުގައި ލިބިވަޑައިގެންނެވި ނާކާމިޔާބީއާ އެކު، މިދިޔަ މަހުގެ 1ގައި ޔާމީން ވަނީ ގޭ ބަންދަށް ބަދަލުކޮށްފަ އެވެ. އެ ހުކުމް އޮތީ ހައި ކޯޓުގެ އިސްތިއުނާފް މަރުހަލާގަ އެވެ.