ރައީސް ސޯލިހު އެ ޖެއްސެވީ ދިވެހި ރައްޔިތުންގެ މޫނުމަތީގައި

ކުރީގެ ނައިބު ރައީސް އަހުމަދު އަދީބު މިހާރު އެ ހުންނެވީ މިނިވަންވެވަޑައިގެންފަ އެވެ. 

ރާއްޖޭގެ ތާރީހުގައި ވެސް މިހާތަނަށް ފަޅާއެރި އެންމެ ބޮޑު ހިޔާނާތުގެ މައި މުގޫ، އެންމެ އަށް އަހަރުގެ ތެރޭގައި މިނިވަންވެ، މުޖުތަމައުގެ ތެރެއަށް ނުކުންނެވޭނެ ގޮތް ވީ، ރައީސް އިބްރާހިމް މުހައްމަދު ސޯލިހު، އިއްޔެ ދިވެހިންގެ މޫނުމަތީގައި ޖެއްސެވި އެތިފަހަރާ އެކުގަ އެވެ؛ އަދީބަށާއި އޭނާއާ އެކު ދިވެހި ރައްޔިތުންގެ 1.4 ބިލިއަން ރުފިޔާއަށް ވުރެ ގިނަ ފައިސާ ފޭރިގަތް އަނެއް ބައިވެރިވާ އަބްދުﷲ ޒިޔަތަށް މައާފު ދެއްވީ އެވެ.

ހިތްހެޔޮ ރައީސެއްގެ ގޮތުގައި ގިނަ ބަޔަކު ދުށް ރައީސް ސޯލިހުގެ ނަންފުޅު ހަރާބުވީ އެވެ. އަމާނާތްތެރިއެއްގެ ގޮތުގައި ދައްކަވަން މަސައްކަތްކުރެއްވި ރައީސެއްގެ ޝަހުސިއްޔަތު ކިލަނބުކޮށްލެއްވީ އެވެ. 

ރައީސް ސޯލިހު ތާރީހަށް، އަމިއްލަފުޅަށް އެ ވެންނެވީ، ދިވެހި ރައްޔިތުންގެ ފައިސާ ފޭރުމަކީ މައްސަލައެއް ނޫން ކަން ގަބޫލުކުރެއްވި ރައީސެއްގެ ގޮތުގަ އެވެ.

މިއީ ކުށްވެރިންނަށް މައާފު ދެއްވުމުގެ ބާރު ރައީސުލްޖުމްހޫރިއްޔާއަށް ލިބިވަޑައިގަތަސް، އެ ބާރު ނަހަމަ ގޮތުގައި ބޭނުންކުރެއްވުމުގެ ނަމޫނާ މިސާލެކެވެ.

އަދީބާއި ޒިޔަތު ކުރެއްވި ވައްކަމަކީ، ނުވަތަ އެއަށް ވުރެ ގޯސްކޮށް ސިފަކުރާ ނަމަ ފޭރުމަކީ ދުނިޔޭގައި އެހާ ތަނަށް ވެސް، އަދި މިހާތަނަށް ވެސް ނުހިންގާ ވަރުގެ ކުށުގެ އަމަލެކެވެ. އެއީ އެއްވެސް ގައުމެއްގައި އެ ގައުމުގެ އާމްދަނީއަށް ވަންނަން ޖެހޭ އެއްޗެއް އެ ހުރި ގޮތަށް ފޭރިގެންފައެއް ނުވެ އެވެ. އާންމު ކޮރަޕްޝަނަކީ، ދިވެހިންގެ ބަހުން ނަމަ، ކަޓު ނެގުމެވެ. އެމްއެމްޕީއާރުސީގެ ހިޔާނަތް މުޅި ދުނިޔެއަށް ވެސް އާ ކަމަކަށް ވަނީ، ދައުލަތަށް ވަން އާމްދަނީ ވެސް އަމިއްލައަށް ބޭނުންކުރުމެވެ. އޭގެ އިތުރުން އެ ރަށްރަށާއި ފަޅުތައް ކުއްޔަށް ދީގެން ފަހަތުން ހިންގެވި ކަޓް ނެގުން ވެސް ހަމަ އޮތީ އެވެ.

މިއީ ކުޑަކުޑަ ކުށްތަކެއް ނޫންކަން، ނުވަތަ ރައީސަށް އެހާ ފަސޭހައިން މައާފު ދެއްވޭނެ ކުށެއް ވެސް ނޫންކަން، ޕްރޮސެކިއުޓަ ޖެނެރަލް ހުސެން ޝަމީމް، 14 ޖުލައި 2020ގައި ދެއްކެވި ވާހަކައިން އެކަނި ފުދެ އެވެ. އަދީބުގެ މައްޗަށް އޭރު އުފުލި ހިޔާނާތުގެ ހުރިހާ ދައުވާއެއް ކްރިމިނަލް ކޯޓުން ބޭރުކޮށް އޭނާ މިނިވަންކުރުމުން، ވަގުތުން ބޭއްވި ނޫސްވެރިންގެ ބައްދަލުވުމުގައި ޕީޖީ ވިދާޅުވީ، އަޅުގަނޑުގެ ސިފަކުރުމުން ނަމަ، 'ދިވެހި ރައްޔިތުން އަދި ހާސްވާނެ ކަމެއް ނެތެވެ، 800 އަހަރުގެ ހުކުމެއް އަންނަ ވަރުގެ ހެކި ވެސް އަދީބާ ދެކޮޅަށް އެބަ ހުއްޓެވެ'، މިހެންނެވެ.

ޝަމީމްގެ އަސްލު ވާހަކައަށް ޖެހިލަމާ ހިނގާށެވެ:

"އަދީބުގެ އިއުތިރާފު ބަޔާނާ ނުލައި ކުރިއަށް ގެންގޮސްގެން ކުރާނެ 150 އަށް ވުރެ ގިނަ ދައުވާ އެބަ ހުއްޓޭ. މިއީ ޑޮކިއުމެންޓްރީ އެވިޑެންސްގެ ވާހަކަ. އެ ދައުވާތައް ސާބިތުކޮށް ދެވިއްޖެއްޔާ 800 އަހަރުގެ ހުކުމް އަންނަ ވަރުގެ ލިޔެ ކިޔުން އަޅުގަނޑުމެންގެ އަތުގައި އެބަހުރި."

ކްރިމިނަލް ކޯޓުން އަދީބުގެ ދައުވާތައް ބޭރުކުރި އިރު، ދައުލަތާ އެކު އޭނާ އޮތީ އިއުތިރާފްގެ އެއްބަސްވުމެއް ހައްދަވައިފަ އެވެ. ކުށްތަކަށް އެއްބަސްވުމުން އަންނާނެ ހުކުމް ކުޑަކުރުމުގެ އެއްބަސްވުމެކެވެ. އެންމެ ފަހުން އޭނާއަށް އައީ 20 އަހަރުގެ ޖަލު ހުކުމެކެވެ. ރައީސަށް ލިބިވަޑައިގަންނަވާ ބާރުތަކުގެ ތެރޭގައި ހުކުމެއްގެ ތިން ބައިކުޅަ އެއްބައި ފުރިހަމަވެފައިވާ މީހުންނަށް މައާފު ދެއްވިދާނެ އެވެ. އަދީބު 2015ގައި ހައްޔަރުކުރި ގޮތަށް ބަންދުގައި ހުންނަވާތާ އަށް އަހަރު ވެއްޖެ އެވެ. އެހެންކަމުން މައާފު ދިނުމުގައި ގާނޫނީ ހުރަހެއް ނެތް ކަމަށް ބަލަމާ ހިނގާށެވެ.

އެކަމަކު ރައީސުލްޖުމްހޫރިއްޔާގެ ކޮންމެ އަމަލެއް ގާނޫނެއްގެ ތެރެއިން ބަނދެފައި އޮންނާކަށް ނުޖެހެ އެވެ. އޭގައި އެތިކްސް އާއި މޯރަލް އަގުތަކެއް ވެސް އެހާމެ ބޮޑުކޮށް އޮވެ އެވެ. އެއީ ލިއެފައި ނެތް ސިފަތަކެއް ނަމަވެސް، ރައީސެއްގެ ނަމުގެ ބަރުދަން ބަލާ ނަމަ، އެންމެ ބޮޑަށް ނެގޭނީ ވެސް އެ ސިފަތަކެވެ.

އަދީބާއި ޒިޔަތަށް ރައީސް ސޯލިހު މައާފު ދެއްވި ހަބަރާ އެކު، އެމަނިކުފާނުގެ ވަރަށް ގާތް ބޭފުޅަކަށް އަޅުގަނޑު މެސެޖްކުރީމެވެ؛ އަދީބުގެ މައްސަލާގައި ރައީސް މި ޖެހީ ކޮން ސަކަރާތެއް ހެއްޔެވެ؟ އޭނާގެ ފުރަތަމަ ޖަވާބަކީ 'ނޭނގެ އެވެ." ދެން ލިއުއްވީ 'ބަލާއެއް' ކަމަށެވެ.

އަޅުގަނޑު ބުނީ "ނަންފުޅު ހުތުރުވީ އިނގޭ އެވެ'، 'ދެން އެޔަކުން، ތާރީހުން ނުނައްޓާނެ' ކަމަށެވެ.

"އެއްބަސްވަމެވެ،" އޭނާ ލިއުއްވި އެވެ.

ވެރިކަން ނިންމަވާފައި ގެއަށް ވަޑައިގަންނަވާ އިރު ދިވެހި ރައްޔިތުން ރުޅިއެރުވުމަށް ވުރެ ރީތި ގޮތެއް ރައީސް ސޯލިހަށް ފެނިވަޑައިނުގަތީ ހެއްޔެވެ؟

ދިވެހި ރައްޔިތުންގެ ހައްގުން 1.4 ބިލިއަން ރުފިޔާއަށް ވުރެ ބޮޑު ހިޔާނާތެއް ހިންގުމުގެ އެންމެ އިސް ދެ ބައިވެރިން، އެންމެ އަށް އަހަރުގެ ތެރޭގައި މިނިވަންކުރައްވައިގެން، ވެރިކަމުގެ ފަހު ހަތަރު ދުވަހު، ރައްޔިތުންގެ މޫނުމަތީގައި އެތިފަހަރެއް ޖެއްސެވުމަށް ވުރެ ރަނގަޅު ހަދިޔާއެއް އަތްޕުޅުގައި ނެތީ ހެއްޔެވެ؟

އެމްއެމްޕީއާރުސީގެ ހިޔާނާތުގައި ރައްޔިތުންނަށް އިންސާފު ހޯއްދަވައިދެއްވުމުގެ ވައުދާ އެކު ވެރިކަމަށް ވަޑައިގެން، އެކަން ނުކުރެއްވުނު ތަނުގައި، އޭގެ މައި ދެ ހިޔާނާތްތެރިންނާ މެދު ރައީސްގެ ހިތްޕުޅުގައި ހަމްދަރުދީ އުފެއްދީ ކޮން ސަބަބެއް/ސަބަބުތަކެއް އޮވެގެން ހެއްޔެވެ؟

އެތައް ސުވާލެކެވެ. އެތައް ހިޔާލެކެވެ. އެތައް އިހުސާސްއެކެވެ.

ނަމަވެސް ރައީސް ސޯލިހުގެ ހިތްޕުޅުގައި، މި މައްސަލާގައި، ރައްޔިތުންނާ މެދު ލޯތްބެއް ނެތެވެ. އެއާ އެކު، އެމްއެމްޕީއާރުސީގެ ހިޔާނާތަކީ ރައްޔިތުންގެ ހައްގެއް ސީދާ ފޭރިގަތުން ކަމަށް ދެކޭ ދިވެހިންނަށް މި ވަގުތު ރައީސް ސޯލިހަށް ވުރެ ބޮޑު ދުޝްމަނެއް ވެސް ނުހުންނާނެ އެވެ.

ރިިޔާސީ އިންތިހާބުން ބަލިވެވަޑައިގަތަސް، ވަރަށް ގިނަ ބައެއްގެ ހިތުގައި ރައީސް ސޯލިހާ މެދު އޮތީ ލޯތްބެވެ. އެމަނިކުފާނުގެ މަޑުމައިތިރިކަމާއި ހިތްތިރިކަމާއި ސިޔާސީ ރުޅި ދެއްކެވުން ނެތުމަކީ، ބަލައިގަތް ސިފަތަކެކެވެ.

ނަމަވެސް އިއްޔެއާ ހަމައަށެވެ.

މިއަދު އެއްބަސްވާން ޖެހެނީ ރައީސް ސޯލިހަކީ ހިޔާނާތާ ދެކޮޅު ބޭފުޅެއް ނޫން ކަމަށެވެ. ހިޔާނާތުން ދައުލަތް ސަލާމަތްކުރަން މަސައްކަތްކުރެއްވި ބޭފުޅެއް ވެސް ނޫން ކަމަށެވެ. އޭގެ ބަދަލުގައި އެއްބަސްވާން މިޖެހެނީ، ރައްޔިތުންގެ މަޖިލިހުގެ މެމްބަރުންނަށް އަދީބުގެ ރިޝްވަތުގެ ދާ ފަތުރާލާފައި އޮތް އިރު، އެމްޑީޕީގެ ތެރޭގައި އެ ފައިސާ އަނބުރަން އޭރު ހިންނަވަރު ދާއިރާގެ މެމްބަރު އިބޫ ބޭނުންކުރެއްވިކަމުގެ އަޑުތައް ރަނގަޅުވުމުގެ ފުރުސަތު އޮތް ކަމަށެވެ.

ރެހެންދި އިމާރާތުގައި އަދީބު އުޅުއްވި އެޕާޓްމަންޓަށް މެމްބަރުންނާއި ފަނޑިޔާރުންނާއި ދައުލަތުގެ އެހެން ބައެއް ވެރިން އާންމުކޮށް ވަޑައިގަންނަވަ އެވެ. ޖީބަށް ނޭޅޭވަރުގެ ފައިސާ ބޮނޑިތައް ހިފައިގެން އެ އެޕާޓްމަންޓުން ބައެއް މީހުން ނުކުންނަނީ ދަބަހަށް އަޅައިގެންނެވެ.

ބިދޭސީންނަށް ރާއްޖެއިން ބިން މިލްކުކުރެވޭ ގޮތަށް ގާނޫނުއަސާސީއަށް 2015ގައި އިތުރުކުރި ބާބު ފާސްކުރަން، އެމްޑީޕީގެ އޭރުގެ ބައެއް މެމްބަރުންނަށް އަދީބު ފައިސާ ދެއްވިކަމުގެ އަޑުތައް ވަރަށް ބޮޑަށް އެރި އެވެ. އެފައިސާ ބަހަން ހަވާލުކުރީ އޭރު އެމްޑީޕީގެ ޕީޖީ ލީޑަރު އިބޫއަށޭ ކިޔައިގެން އެރި އަޑުތައް ވެސް ރައްޔިތުންނާ ހަމައަށް ފޯރި އެވެ.

އެމްއެމްޕީއާރުސީގެ ހިޔާނާތަކީ، ރައްޔިތުންނަށް އިންސާފެއް ލިބެން ނެތް، އެކަމަކު ރާއްޖެ ދުށް އެންމެ ބޮޑު ހިޔާނާތެވެ. ގެއްލުނު ފައިސާ، ގައުމީ ބޭންކް ބީއެމްއެލްގެ އަތުންނާއި، ރަށްރަށާއި ފަޅުތައް ގަތް ވިޔަފާރިވެރިންގެ އަތުން ނޫން ގޮތަކަށް ހޯދޭކަށް ވެސް ނެތެވެ. އެކަމަކު އެކަން ކުރެވޭ ވަރުގެ ހިތްވަރުހުރި ވެރިއެއް ރާއްޖެއަކުން ނުފެނެ އެވެ. ދެން ވެރިކަމާ ހަވާލުވާން އެ އުޅެނީ، އެ ހިޔާނާތް ހިންގި ޕާޓީ އެވެ. އެ ހިޔާނާތް ފުރަތަމަ ދުވަހުން ފެށިގެން ދިފާއުކުރެއްވި ބޭފުޅުން އަނެއްކާ އެ އަންނަނީ ސަރުކާރު ހިންގަވާށެވެ. ކުޑަމިނުން އެކަމަށް މިހާތަނަށް މައާފަށް ވެސް އެދިފައެއް ނުވެ އެވެ.

ކިއުންތެރިން ގަބޫލުކުރުން ހުއްޓެވެ؛ އަޅުގަނޑު ކަހަލަ މީހުން އުޅޭނެ އެވެ. އެކަމަކު ހަގީގަތާ އެއްގޮތަށް އެއްޗެއް ލިއުން ފިޔަވައި ކުރެވޭނެ ކަމެއް، އަޅުގަނޑުމެންގެ ނެތެވެ. ޕީޕީއެމްގެ އެ ވެރިކަމުގައި ލިއުނު ލިއުންތައް ދެކެ ރުޅިއައި ބޭފުޅުންގެ އަތްޕުޅަށް ރާއްޖޭގެ ވެރިކަން އަރާ އެ ނިމެނީ އެވެ. އެ ހިޔާނާތަށް އިންސާފު ހޯއްދަވާ ދެއްވާނެ ކަމަށް ވައުދުވެވަޑައިގެންނެވި ރައީސް، ވެރިކަމުން ފައިބައި އެ ވަޑައިގަންނަވަނީ، 'މައި ދެ ވަގުން' މިނިވަންކުރައްވައިފަ އެވެ.

މިއީ ދިވެހިރާއްޖެ އޮތް ހާލަތެވެ. މިއީ ޒަމާނީ ޑިމޮކްރަސީގައި ރާއްޖެ ދަތުރުކުރާ މިސްރާބެވެ.

ރައްޔިތުންނަށް އޮތީ ބަލަން ތިބުމެވެ. މޫނުމަތީގައި އަޅާ ވިހެލިޔަސް، ތަދުނުވާ ކަމަށް ހަދައިގެންނެވެ. އެކަމަކު އަޅުގަނޑަށް ވީ ތަދު ދުވަހަކު ވެސް ފިލައިގެން ނުދާނެ އެވެ. 

އެ ވާހަކަ، އިހުތިރާމާ އެކު، ރައީސް ސޯލިހަށް ދަންނަވަމެވެ.