ރައްޔިތުންގެ މަޖިލީހުގެ ޖަލްސާއެއްގައި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް. (ފޮޓޯ/ މަޖިލިސް)
މައްސަލަ ބޭރުކުރީ އަމީން އާއްމުގެ ލަފައާ ހިލާފަށް، އިތުރު ކަމަކަށް ދެން އެއްބާރުލުމެއް ނުދޭނަން: އަސްލަމް
ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމުގެ ގަރާރު ބޭރުކޮށްލުމަށް މިއަދުގެ ޖަލްސާގެ ރިޔާސަތު ބެލެހެއްޓެވި ވިލުފުށީ ދާއިރާގެ މެމްބަރު ހަސަން އަފީފް ނިންމެވީ މަޖިލީހުގެ އަމީން އާއްމު ދެއްވި ލަފައާ ހިލާފަށް ކަމަަށާއި، މަޖިލީހުގެ އިތުރު މަސައްކަތަކަށް އެމްޑީޕީން ދެން އެއްބާރުލުން ނުދޭނެ ކަމަށް އެ ޕާޓީގެ ޕާލިމެންޓްރީ ގްރޫޕު (ޕީޖީ)ގެ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ވީ ކިހިނެއް؟ - ސުޕްރީމް ކޯޓުން މިދިޔަ ބުރާސްފަތި ދުވަހު އިއްވި ހުކުމާ އެކު، މިއަދުގެ މަޖިލިސް ޖަލްސާގެ އެޖެންޑާގައި އޮތީ ނަޝީދުގެ މަގާމުން ވަކިކުރަން އެމްޑީޕީގެ 49 މެންބަރުން ސޮއިކުރައްވައި ހުށަހެޅި ގަރާރު މަޖިލީހުގެ ތަޅުމަށް ހުށަހެޅުމެވެ.
މަޖިލީހުގެ ނައިބު ރައީސް ނެތި ވެސް ނަޝީދު މަގާމުން ވަކިކުރުމުގެ ގަރާރު ކުރިއަށް ގެންދެވޭނެ ކަމަށް ސުޕްރީމް ކޯޓުން ކަނޑައަޅާފައި ވާއިރު، މިއަދުގެ ޖަލްސާއަށް ވެސް ނައިބު ރައީސް އީވާ އަބްދުﷲ ވަނީ ސަލާމް ވިދާޅުވެފަ އެވެ. އެހެންވެ، މިއަދުގެ ޖަލްސާގެ ރިޔާސަތު ބެލެހެއްޓެވީ ވިލިފުށީ ދާއިރާގެ ޑިމޮކްރެޓްސްގެ މެންބަރު ހަސަން އަފީފް އެވެ.
-
ނަޝީދު ނިސްބަތްވެވަޑައިގަންނަވާ ޑިމޮކްރެޓްސް ތަމްސީލުކުރައްވާ އަފީފް ނިންމެވީ އެ ޕާޓީގެ ޕީޖީން ނިޒާމީ މައްސަލަ ނަގައި އެދުނު ގޮތަށް، އެމްޑީޕީން ގަރާރު ހުށަހަޅާފައި ވަނީ ގަވާއިދާ ހިލާފަށް ކަމަށް؛ އެ ގަރާރު އަލުން ހުށަހެޅުމަށް ވެސް އެންގެވި
-
ގަރާރު އަލުން ހުށަހެޅުމަށް މިއަދު 11:30އަށް އެ ގަރާރާ ގުޅޭ އިތުރު ޖަލްސާއެއް ތާވަލުކުރި؛ އެ ޖަލްސާގެ ރިޔާސަތު ބެލެހެއްޓެވި އީވާ ނިންމެވީ ނަޝީދު ވަކިކުރުމުގެ ގަރާރާ މެދު މިއަދު ހެނދުނު ބޭއްވި ޖަލްސާގައި ގޮތެއް ނިންމާފައިވާ ކަމަށާއި، އެހެންވެ އެ ގަރާރު އިތުރަށް ކުރިއަށް ނުގެންދެވޭނެ ކަމަށް
ބުނީ ކީކޭ؟ - މި މައްސަލައާ ގުޅިގެން މަޖިލީހުގެ އިދާރާގެ ގޯތިތެރޭގައި ނޫސްވެރިންނާ ވާހަކަދައްކަވަމުން ރިޔާސަތު ބެލެހެއްޓެވި މެމްބަރުންގެ އަމަލުތައް އަސްލަމް ސިފަކުރެއްވީ މަޖިލީހުގެ ގަވާއިދާއި ގާނޫނުއަސާސީ "މުގުރާލުމުގެ" ގޮތުގަ އެވެ. އޭނާ ވިދާޅުވީ ސުޕްރީމް ކޯޓުގެ ހުކުމާ ދެކޮޅަށް ވެސް އެބޭ ފުޅުން ބޭނުންފުޅުވަނީ "ގަދަބާރުން" ނަޝީދު ރިޔާސަތުގައި ބެހެއްޓެވުމަށް ކަމަށެވެ.
އަސްލަމް ވިދާޅުވީ:
-
މަޖިލީހުން އެޖެންޑާކުރާ މައްސަލައެއް ބޭރުކޮށްލުމުގެ އިހުތިޔާރެއް މަޖިލީހުގެ ރިޔާސަތުގައި އިންނަވާ ބޭފުޅަކަށް ނޯންނާނެ؛ އެހެން ބޭރުކުރަންޏާ މަޖިލީހުގައި ވޯޓަށް އަހަން ޖެހޭނެ
-
އެއީ މަޖިލީހުގެ ގަވާއިދުން ތަން ދޭ ކަމެއް ނޫން
"އެހެންވީމަ، އެ މައްސަލައެއް ބޭރެއް ނުވޭ. އެކަން އިދާރީ މޭޒުން ވެސް އިދާރީ ގޮތުން ގަބޫލުކުރެވޭތީ އަމީން އާއްމު އަލުން ޖަލްސާއެއް އެ ބޭއްވީ،" އަސްލަމް ވިދާޅުވި އެވެ.
އޭގެ ފަހުން ބޭއްވި ޖަލްސާ ވެސް އީވާ ކުރިއަށް ނުގެންދެވީ މަޖިލީހުގެ ގަވާއިދާ ހިލާފަށްކަން ފާހަގަކުރައްވަމުން އޭނާ ވަނީ އެ ކަމުން ހާމަވެގެންދިޔައީ މި މައްސަލާގައި އީވާގެ މަސްހަލަތު އޮންނަކަން ކަމަށް ވިދާޅުވެފަ އެވެ.
"އެއީ ދެބެެއިންގެ ދެދަރި ބޭބެއެއް މަޖިލީހުގެ ރައީސަކަށް މި ހުންނެވީ. މުހައްމަދު ނަޝީދުގެ އިތުބާރު ނެތް ކަމުގެ މައްސަލައަކަށް ވީމާ ކަނޑައެޅިގެން މަސްލަހަތު ފުށުއަރާ މައްސަލައެއްގައި ވަކި އަތަކަށް ބުރަވެ، މަސައްކަތް ކުރި ތަން އަޅުގަނޑުމެންނަށް މި ފެންނަނީ،" މި މައްސަަލަ އެޖެންޑާކުރާ ޖަލްސާގެ ރިޔާސަތު އީވާއަށް ނުބެލެހެއްޓޭނެ ކަމަށް ކަނޑައަޅައިދިނުމަށް މަޖިލީހުގެ އިދާރާއަށް މައްސަލަ ހުށަހެޅުމަށް ނިންމަވާފައިވާކަން ފާހަގަކުރައްވަމުން އަސްލަމް ވިދާޅުވި އެވެ.
އެނގުން މުހިއްމު - އަސްލަމް އެ އިންޓަވިއު ދެއްވި ފަހުން އެމްޑީޕީން ވަނީ އަފީފްގެ އިތުރުން އީވާ ވެސް މެމްބަރުންގެ އިމްތިޔާޒްތަކަށް އަރައިގަތް ކަމަށް ބުނެ މަޖިލީހަށް މައްސަލަ ހުށަހަޅާފަ އެވެ.
އީވާ އާއި އަފީފް މަޖިލީހުގެ މެމްބަރުންގެ އިމްތިޔާޒުތަކަށް އަރައިގެންފައިވާ ކަމަށް، މަޖިލީހުގެ އިމްތިޔާޒާއި ސުލޫކް ކޮމިޓީން ދެންމެއަކު ވަނީ ނިންމާފަ އެވެ. އަދި އީވާ އާއި އަފީފް ހިމެނިވަޑައިގަންނަވާހެން ޑިމޮކްރެޓްސްގެ އެއްވެސް މެމްބަރަކަށް، ނަޝީދު ވަކިކުރުމުގެ މައްސަލަ ކުރިއަށް ގެންދާ ޖަލްސާގެ ރިޔާސަތު ނުބެލެހެއްޓޭނެ ކަމަށް ވެސް ކޮމިޓީން ވަނީ ނިންމާފަ އެވެ.
-
އިތުރަށް ކިޔާލަން - އީވާ އާއި އަފީފް މެމްބަރުންގެ އިމްތިޔާޒުތަކަށް އަރައިގަތް ކަމަށް ނިންމައިފި
މި މައްސަލަ ކުރިއަށް ނުގެންގޮސް މަޖިލީހުގައި އިތުރު މަސައްކަތެއް ކުރިއަށް ގެންދިއުމަށް އެ ޕާޓީން އެއްބާރުލުން ނުލިބޭނެ ކަމަށް މީގެ ކުރިން ދެއްކެވި ވާހަކަވެސް އަސްލަމް ތަކުރާރުކުރެއްވި އެވެ. އޭނާ ވިދާޅުވީ އިންތިހާބީ ރައީސް ޑރ. މުހައްމަދު މުއިއްޒު ހުވާކުރައްވާ ޖަލްސާގެ ރިޔާސަތު ނަޝީދު ބަލަހައްޓަވާ ނަމަ، އެ ޖަލްސާއަށާއި އޭގެ ފަހުން އެކުލަވާލާ ކެބިނެޓަށް ރުހުންދިނުމުގައި ވެސް އެއްބާރުލުން ނުދެއްވާނެ ކަމަށެވެ.
އެނގުން މުހިއްމު - ނަޝީދުގެ އިތުބާރު ނެތް ކަމުގެ މައްސަލައިގައި ވޯޓަށް ނާހައި އެ މަނިކުފާނު ރިޔާސަތު ބަލަހައްޓަވާ ގޮތަށް އިންތިހާބީ ރައީސް ހުވާކުރައްވާ ޖަލްސާ ބާއްވައިފި ނަމަ، އެ ހުވާކުރެއްވުން ބަލައިނުގަންނާނެ ކަމަށް އެމްޑީޕީން މީގެ ކުރިން ބުނި ނަމަވެސް، އެ ޕާޓީން ވަނީ އެ ޖަލްސާއަށް ހުރަސްނާޅާނެ ކަމަށް ވެސް ބުނެފަ އެވެ. އެގޮތުން، މިދިޔަ މަހު ބޭއްވި ނޫސްވެރިންގެ ބައްދަލުވުމެއްގައި އަސްލަމް ވަނީ ނަޝީދުގެ ރިޔާސަތުގައި މުއިއްޒު ހުވާ ކުރެއްވުމުގެ ޖަލްސާ ބާއްވާ ނަމަ، އެމްޑީޕީގެ މެމްބަރުން އެ ޖަލްސާއަށް ވަޑައިނުގެންނެވުމުގެ ފުރުސަތު އޮތް މޭރުމަކުން ވާހަކަ ދައްކަވައިފަ އެވެ.