އީވާ އާއި އަފީފް މެމްބަރުންގެ އިމްތިޔާޒުތަކަށް އަރައިގަތް ކަމަށް ނިންމައިފި

މަޖިލީހުގެ ނައިބު ރައީސް އީވާ އަބްދުﷲ އާއި ވިލުފުށީ ދާއިރާގެ މެމްބަރު ހަސަން އަފީފް މަޖިލީހުގެ މެމްބަރުންގެ އިމްތިޔާޒުތަކަށް އަރައިގެންފައިވާ ކަމަށް، މަޖިލީހުގެ އިމްތިޔާޒާއި ސުލޫކް ކޮމިޓީން ދެންމެއަކު ނިންމައިފި އެވެ. އަދި އީވާ އާއި އަފީފް ހިމެނިވަޑައިގަންނަވާހެން ޑިމޮކްރެޓްސްގެ އެއްވެސް މެމްބަރަކަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަކިކުރުމުގެ މައްސަލަ ކުރިއަށް ގެންދާ ޖަލްސާގެ ރިޔާސަތު ނުބެލެހެއްޓޭނެ ކަމަށް ވެސް ކޮމިޓީން ވަނީ ނިންމާފަ އެވެ.

ވީ ކިހިނެއް؟ - މި ގޮތަށް ފާސްކުރީ އިމްތިޔާޒާއި ސްލޫކީ ކޮމިޓީން މި މައްސަލާގައި މީގެ ކުޑައިރުކޮޅެއް ކުރިން ބޭއްވި ކުއްލި ބައްދަލުވުމުގައި ބައިވެރިވެވަޑައިގެންނެވި ހަތް މެމްބަރުންގެ އިއްތިފާގުންނެވެ.

ތަފްސީލް - އެ ބައްދަލުވުމުގައި ދެ ހުށަހެޅުމެއް ހުށަހަޅައި ފާސްކޮށްފައިވެ އެވެ. އެއީ:

އޭގެ ތެރެއިން ނަޝީދުގެ އިތުބާރު ނެތް ކަމުގެ މައްސަލަ ކުރިއަށްދާއިރު އަފީފް އާއި އީވާއަށް މަޖިލީހުގެ ރިޔާސަތު ނުބެލެހެއްޓޭނެ ކަމަށް ކަނޑައެޅުމަކީ ސްލޫކީ ކޮމިޓީއަށް ނިންމޭނެ ނިންމުމެއް ނޫން ކަމަށް ވާތީ، އެ ހުށަހެޅުން ފާސްކޮށް، މަޖިލީހުގެ އާންމު ކޮމިޓީއަށް ފޮނުވަން ނިންމައި ކޮމިޓީ ބައްދަލުވުން ވަނީ ނިންމާލާފަ އެވެ.

އެ ހުށަހެޅުމާ މެދު ވީހާ ވެސް އަވަހަކަށް ގޮތެއް ނިންމައިދިނުމަށް އާންމު ކޮމިޓީއަށް ލަފާ އެރުވުމަށް ވެސް މިއަދުގެ ކޮމިޓީގައި ވަނީ ނިންމާފަ އެވެ.

އެނގުން މުހިންމު - ސުޕްރީމް ކޯޓުން މިދިޔަ ބުރާސްފަތި ދުވަހު ނިންމި ނިންމުމާ އެކު، ނަޝީދު މަގާމުން ވަކިކުރުމުގެ ގަރާރު މައްސަލަ ކުރިއަށް ގެންދަން މިއަދު ހެނދުނު 9 ޖެހިއިރު ބޭއްވި ޖަލްސާގެ ރިޔާސަތުގައި އިންނެވި ޑިމޮކްރެޓްސްގެ މެމްބަރު އަފީފް ނިންމެވީ އެ ގަރާރު ހުށަހަޅާފައިވަނީ ގަވާއިދާ ހިލާފަށް ކަމަށެވެ. އެހެންވެ އަލުން ހުށަހެޅުމަށް އަންގައި ޖަލްސާ ނިންމާލާފައިވެ އެވެ.

އެއަށް ފަހު، އެ މައްސަލާގައި މިއަދު 11:30ގައި ވެސް ޖަލްސާއެއް ބާއްވާފައި ވާއިރު، އެ ޖަލްސާގެ ރިޔާސަތުގައި އިންނެވި އީވާ ވެސް ނިންމެވީ އެއީ ގަވާއިދާ ހިލާފަށް ހުށަހަޅާފައިވާ ގަރާރެއް ކަމަށް ހެނދުނުގެ ޖަލްސާގައި ނިންމާފައިވާތީ އެ މައްސަލަ އިތުރަށް ކުރިއަށް ނުގެންދެވޭނެ ކަމަށެވެ.