ބޭންކު އެކައުންޓުތަކުން ވަގު މުއާމަލާތްކުރާ މައްސަލަ މަޖިލިސް ކޮމެޓީއަށް ހުށަހަޅައިފި

ބޭންކް އޮފް މޯލްޑިވްސް (ބީއެމްއެލް)ގެ ބައެއް އެކައުންޓުތަކުގެ ވެރިންނަށް ނޭނގި އެ މީހުންގެ އެކައުންޓުތަކުން ވަގަށް މުއާމަލާތްތައް ކުރާ ކަމަށް ބުނެ ސޯޝަލް މީޑިއާގައި ކަންބޮޑުވުން ފާޅުކުރަމުން ދަނިކޮށް އެ މައްސަލަ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަޒް (އެސްއޯއީ) ކޮމެޓީއަށް މިއަދު ހުށަހަޅައިފި އެވެ.

ވީ ކިހިނެއް؟ - މޯލްޑިވްސް ނޭޝަނަލް ޕާޓީ (އެމްއެންޕީ)ގެ ފަރާތުން އެ މައްސަލަ މަޖިލީހުގެ ކޮމެޓީއަށް ހުށަހެޅުއްވީ އެ ޕާޓީގެ ޕާލިމެންޓްރީ ގްރޫޕުގެ ލީޑަރު، ތިމަރަފުށީ ދާއިރާގެ މެމްބަރު އަބްދުﷲ ރިޔާޒެވެ.

ބުނީ ކީކޭ؟ - ރިޔާޒު ހުށަހެޅުއްވި މައްސަލައިގައި އޭނާ ވިދާޅުވީ ބީއެމްއެލްގެ އެކައުންޓުތަކުން ފައިސާ މަދުވާ މައްސަލައިގައި އެކައުންޓުތަކުގެ ވެރިފަރާތްތަކުން އުދާސް ފާޅުކޮށް، ޝަކުވާ އުފުލި ކަމުގައި ވިޔަސް، ބީއެމްއެލް އާއި ގާނޫނު ތަންފީޒުކުރާ އިދާރާ އާއި ބޭންކިންގެ ދާއިރާގެ ބެލެނިވެރި ފަރާތް ކަމަށްވާ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިހާތަނަށް ޒިންމާދާރުކަމާ އެކު ބަހެއް ބުނެފައި ނުވާ ކަމަށެވެ.

އެ މައްސަލައިގައި ރިޔާޒު އެދިވަޑައިގެންފައި ވަނީ މި ކަމަށް އަވަސް ހައްލެއް ހޯދުމަށް ކޮމިޓީން މި މައްސަލަ ބަލައި އެހީތެރިވެދިނުމަށެވެ.

މީގެ އިތުުރުން، ރިޔާޒުގެ ސިޓީގައި ފާހަގަކުރައްވާފައިވާ ގޮތުގައި:

ގުޅުން ހުރި ކަމެއް - މީހެއްގެ އިންޓަނެޓް ބޭންކިން މައުލޫމާތު ހޯދައިގެން ބީއެމްއެލްގެ މޯބައިލް ބޭންކިން އެޕްލިކޭޝަންގައި ހިމެނޭ ކިޔުއާރު ކޯޑް ފީޗާ ބޭނުންކޮށްގެން 200،000ރ.ގެ މުދާ ގަތް މައްސަލައެއްގައި ދެ މީހަކު ހައްޔަރުކޮށްފައިވާ ކަމަށް ފުލުހުން އިއްޔެ ވަނީ ބުނެފަ އެވެ.  

އެނގުން މުހިއްމު - ބީއެމްއެލްގެ އެކައުންޓުތަކުން ފައިސާ ގެއްލޭ މައްސަލަ އާއި އެކައުންޓުތަކުގެ ވެރިފަރާތްތަކުން ނުކުރާ މުއާމަލާތްތަކެއް އެކައުންޓުން ކޮށްފައި ހުންނަ ކަމަށް ބުނެ ޝަކުވާ ކުރާ މައްސަލާގައި ބޭންކުގެ އިހުމާލުން އެފަދަ އެއްވެސް ކަމެއް ނުވާނެ ކަމަށް ބުނެފަ އެވެ. އަދި މޯބައިލް ބޭންކިން އެޕްލިކޭޝަނުގައި ހިމެނޭ ކިޔުއާރު ކޯޑް ފީޗާ ބޭނުންކޮށްގެން ގިނަވެގެން 750ރ.ގެ މުއާމަލާތްތައް އަދި ދުވާލެއްގެ މައްޗަށް 10 މުއާމަލާތް ކުރެވޭ ގޮތަށް އިއްޔެ ވަނީ ލިމިޓު ވެސް ކޮށްފަ އެވެ.

އިތުރަށް ކިޔާލަން -