ބޭންކް އޮފް މޯލްޑިވްސް (ބީއެމްއެލް)ގެ އިންޓަނެޓް އަދި މޮބައިލް ބޭންކިންގެ ހިދުމަތް މީހަކު ބޭނުންކުރަނީ. (ފޮޓޯ/ބީއެމްއެލް)
ކިޔުއާރު ކޯޑުން ފައިސާ ދެއްކޭނީ ގިނަވެގެން 750ރ.ގެ މުއާމަލާތްތަކުގައި
ބޭންކް އޮފް މޯލްޑިވްސް (ބީއެމްއެލް)ގެ މޯބައިލް ބޭންކިން އެޕްލިކޭޝަނުގައި ހިމެނޭ ކިޔުއާރު ކޯޑް ފީޗާ ބޭނުންކޮށްގެން ކުރެވޭނީ ގިނަވެގެން 750ރ.ގެ މުއާމަލާތްތައް ކަމަށް އެ ބޭންކުން މިއަދު ކަނޑައަޅައިފި އެވެ.
މައްސަލައިގެ ފެށުން - ބޭންކުގެ ކަސްޓަމަރުންގެ އެކައުންޓުން ވަގު މުއާމަލާތްތަކެއް ހިންގާފައިވާ ކަމަށް ބުނެ ކަސްޓަމަރުންގެ ފާޑުކިޔުން ބޭންކަށް ވަނީ އަމާޒުވެފަ އެވެ. އޭގެ ތެރޭގައި، ރާއްޖޭގައި ހިންގާފައިވާ މުއާމަލާތްތަކާއި ރާއްޖޭން ބޭރުގެ ވެބްސައިޓުތަކުން ހިންގާފައިވާ މުއާމަލާތްތައް ވެސް ހިމެނެ އެވެ.
ތަފްސީލް - ބީއެމްއެލް އިން މިއަދު ބުނީ، ބޭންކުގެ މޮބައިލް ވޮލެޓު މެދުވެރިކޮށް ކިޔުއާރު ކޯޑު ބޭނުންކޮށްގެން ކުރެވޭ މުއާމަލާތްތަކަށް މިއަދުން ފެށިގެން ބަދަލު ގެނެސްފައިވާ ކަމަށެވެ. އެގޮތުން:
-
ކިޔުއާރު ކޯޑު ބޭނުންކޮށްގެން އެއް ފަހަރާ އެންމެ ގިނަވެގެން ކުރެވޭނީ 750ރ.ގެ މުއާމަލާތް
-
ދުވާލެއްގެ މައްޗަށް ކޮންމެ ކަސްޓަމަރަކަށް ވެސް އެ ފީޗާ މެދުވެރިކޮށް ކުރެވެނީ 10 މުއާމަލާތް
ބޭންކުން ބުނީ އެ ލިމިޓަށް ވުރެ އިތުރަށް ބޭނުންވާ ކަސްޓަމަރުންނަށް ކާޑު ބޭނުންކޮށްގެން މުއާމަލާތް ކުރެވޭނެ ކަމަށެވެ.
ގުޅުން ހުރި ކަމެއް - ބޭންކުން އިއްޔެ ބުނީ ބައެއް ކަސްޓަމަރުންގެ ކާޑުގެ މައުލޫމާތު އާންމުވެފައިވާ ކަމަށާއި އެކަން ހިނގާފައިވަނީ ބައިނަލްއަގުވާމީ މާޗަންޓުންގެ ފަރާތުން ކަމަށެވެ. އަދި މައުލޫމާތު ލީކުވެފައިވާ ކާޑުތައް ބްލޮކުކޮށް، އެއްވެސް އަގެއް ނުނަގައި އާ ކާޑު ހައްދައިދޭނެ ކަމަށް ވެސް އެ ބޭންކުން ބުންޏެވެ.