ބީއެމްއެލްގެ ކާޑެއް ބޭނުންކޮށްގެން އޮންލައިން ޓްރާންސެކްޝަނެއް ހަދަނީ - ފޮޓޯ/ބީއެމްއެލް
މީހެއްގެ އެކައުންޓުން ވަގަށް 200،000ރ.ގެ މުދާ ގަތް ދެ މީހަކު ހައްޔަރު ކޮށްފި
މީހެއްގެ އިންޓަނެޓް ބޭންކިން މައުލޫމާތު ހޯދައިގަނެ، ބޭންކް އޮފް މޯލްޑިވްސް (ބީއެމްއެލް)ގެ މޯބައިލް ބޭންކިން އެޕްލިކޭޝަންގައި ހިމެނޭ ކިޔުއާރު ކޯޑް ފީޗާ ބޭނުންކޮށްގެން 200،000ރ.ގެ މުދާ ގަތް މައްސަލައެއްގައި ދެ މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.
ވީ ކިހިނެއް؟ - ފުލުހުން މިރޭ މީޑިއާއަށް ފޮނުވި މެސެޖެއްގައި ވާގޮތުން:
-
އެ މައްސަލައިގައި ހައްޔަރުކޮށްފައިވަނީ ދިވެހި ދެ ފިރިހެނުން؛ އެއީ 25 އަހަރުގެ މީހަކާއި 27 އަހަރުގެ މީހެއް
-
ދެ މީހުން ވެސް ހައްޔަރުކުރީ މިދިޔަ ހޮނިހިރު ދުވަހު
-
ދެ މީހުންގެ ބަންދަށް ކްރިމިނަލް ކޯޓުން ވަނީ 15 ދުވަހުގެ މުއްދަތު ޖަހާފައި
ފުލުހުން ބުނި ގޮތުގައި އެ އިދާރާގެ އިކޮނޮމިކް ކްރައިމް ޑިޕާޓްމަންޓުން އަންނަނީ އެ މައްސަލަ ތަހުގީގުކުރަމުންނެވެ.
އެނގުން މުހިއްމު - ފުލުހުން މިރޭ މިކަން ހާމަކުރި އިރު، ބީއެމްއެލްއިން މިއަދު ވަނީ އެ ބޭންކުގެ މޯބައިލް ބޭންކިން އެޕްލިކޭޝަނުގައި ހިމެނޭ ކިޔުއާރު ކޯޑް ފީޗާ ބޭނުންކޮށްގެން ކުރެވޭނީ ގިނަވެގެން 750ރ.ގެ މުއާމަލާތްތައް ކަމަށް ކަނޑައަޅާފަ އެވެ.
ބީއެމްއެލްގައިވާ އެކައުންޓުން ވަގު މުއާމަލާތްތަކެއް ހިންގާފައިވާ ކަމަށް ބުނެ ކަސްޓަމަރުންގެ ފާޑުކިޔުން ވަނީ އަމާޒުވެފަ އެވެ.
ބޭންކުން އިއްޔެ ބުނީ ބައެއް ކަސްޓަމަރުންގެ ކާޑުގެ މައުލޫމާތު އާންމުވެފައިވާ ކަމަށާއި އެކަން ހިނގާފައިވަނީ ބައިނަލްއަގުވާމީ މާޗަންޓުންގެ ފަރާތުން ކަމަށެވެ. އަދި މައުލޫމާތު ލީކުވެފައިވާ ކާޑުތައް ބްލޮކުކޮށް، ހިލޭ އާ ކާޑު ހައްދައިދޭނެ ކަމަށް ވެސް އެ ބޭންކުން ބުންޏެވެ.