ދައުލަތުން ގަބޫލުކުރަނީ އަމުރެއް ނެތި ވެސް މި ހާލަތުގައި ޕޯސްޓްމޯޓަމް ހެދޭނެ ކަމަށް

ފުލުހުންގެ ބެލުމުގެ ދަށުގައި ހުއްޓާ މަރުވި އަބްދުﷲ ރަޝީދުގެ ޕޯސްޓްމޯޓަމް ހަދަން މި ހާލަތުގައި ކޯޓު އަމުރެއް ބޭނުން ނުވާނެ ކަމަށާއި އެއީ ގާނޫނާއި ގަވައިދުގެ ދަށުން ފުލުހުންނަށް ލިބިދީފައި އޮތް ބާރެއް ކަމަށް ދައުލަތުން މިއަދު ސިވިލް ކޯޓުގައި ބުނެފި އެވެ.

އެއާ އެކު، މި މައްސަލައަށް ތަދައްހުލްވި ޕްރޮސެކިއުޓާ ޖެނެރަލް (ޕީޖީ)ގެ އޮފީހުން އެދުނީ އޭނާގެ ހަށިގަނޑު އަންނަ ހޯމަދުވަހު ރާއްޖެއިން ބޭރަށް ފޮނުވަން ބޭނުންވާތީ އޭގެ ކުރިން މައްސަލައިގައި ގޮތެއް ނިންމައި ދިނުމަށެވެ.

މައްސަލަ ބައްލަވާ ގާޒީ ހަސަން ފަހީމް އިބްރާހިމް ވިދާޅުވީ މިފަދަ މައްސަލަތަކުގައި ގޮތެއް ކަނޑައެޅުން އޮންނަނީ ގިނަވެގެން 14 ދުވަހުގެ ތެރޭގައި ކަމަށެވެ. ނަމަވެސް ހޯމަ ދުވަހުގެ ކުރިން ގޮތެއް ކަނޑައަޅަން މަސައްކަތްކޮށްދެއްވާނެ ކަމަށް ވިދާޅުވި އެވެ.

މައްސަލައިގެ ފެށުން - ފުލުހުންގެ ޑްރަގު އެންފޯސްމަންޓް ޑިޕާޓްމަންޓް (ޑީއީޑީ)ން ގދ. އަތޮޅުގައި ހިންގި ޑްރަގުގެ ބޮޑު އޮޕަރޭޝަނެއްގައި އަބްދުﷲ، 43، ސުވޯން/ގދ. ހޯނޑެއްދޫ، ހިމެނޭ ގޮތަށް ތިން މީހަކު މިދިޔަ އަންގާރަ ދުވަހުގެ މެންދުރު ފަހު ތިނެއް ޖަހާކަންހާއިރު އެ ރަށުން ހައްޔަރުކުރި އެވެ. އެ މީހުން ގޮވައިގެން އެ ރަށުން ފުރައިގެން އެހެން ތަނަކަށް ގެންދަން އުޅެނިކޮށް، އަބްދުﷲ މަރުވީ އެރަށު ބަދަރުގައި ލޯންޗު އޮއްވައި، ލޯންޗުމަތީގައި ކަމަށްވެ އެވެ. އެގޮތުން:

ވީ ކިހިނެއް؟ - އާއިލާގެ ނުރުހުމުގައި އަބްދުﷲގެ ޕޯސްޓްމޯޓަމް ހަދަން ނިންމާފައިވާތީ، އެކަމާ ގުޅިގެން އޭނާގެ މަންމަ މަރްޔަމް އަހްމަދު، މާރަގަ/ގދ. ހޯނޑެއްދޫ ވަނީ ސިވިލް ކޯޓަށް މައްސަލައެއް ހުށަހަޅައިފަ އެވެ. މިއަދު އޮތީ އެ މައްސަލައިގެ ފުރަތަމަ އަޑުއެހުމެވެ. މަންމަގެ ފަރާތުން އެދުނީ:

ތަފްސީލު - އަބްދުﷲގެ އާއިލާގެ ފަރާތުން މި މައްސަލައިގައި ވަކާލާތު ކުރެއްވި ވަކީލް މުހައްމަދު ރާގިބު ވިދާޅުވީ ޕޯސްޓްމޯޓަމް ހަދަން އާއިލާ އިން ދެކޮޅުހަދަނީ މައިގަނޑު ހަތަރު ސަބަބެއް އޮތުމުން ކަމަށެވެ. އެއީ: 

އަބްދުﷲގެ މަންމަ، މަރިޔަމް އާއި އޭނާގެ އަންހެނުން ހިމެނޭ ގޮތަށް އާއިލާގެ 11 މެންބަރަކު ހާޒިރުވެ ތިބި އެ އަޑުއެހުމުގައި އެ އާއިލާގެ ފަރާތުން ރާގިބު އެދިވަޑައިގަތީ ޕޯސްޓްމޯޓަމް ހެދުން ހުއްޓުވައި ވީހާވެސް އަވަހަކަށް އަބްދުﷲގެ ޖަނާޒާގެ ކަންކަން ހަމަޖައްސަން އޭނާގެ ހަށިގަނޑު އާއިލާއާ ހަވާލުކުރަން ފުލުހުންނަށް އަންގައި އަމުރެއް ނެރެދިނުމަށެވެ.

މި މައްސަލަ ރައްދުވާ ފުލުހުންގެ ފަރާތުން ވަކާލާތުކުރެއްވީ ބަންޑާރަނައިބު އޮފީހުގެ ވަކީލެކެވެ. އެ އޮފީހުގެ ސްޓޭޓް އެޓާނީ އިބްރާހިމް ޝިނާން އަހްމަދު ވިދާޅުވީ އެ މަރާ ގުޅިގެން އެންއައިސީން އިސްނަގައިގެން ފުލުހުންނާ ގުޅިގެން ޖިނާއީ ތަހުގީގެއް ކުރަމުން އަންނަ ކަމަށެވެ. އަދި ޕޯސްޓްމޯޓަމް ހަދަން ނިންމީ އެންއައިސީން ކަމަށާއި އެ ކޮމިޝަންގެ އެދުމުގެ މަތިން، ހަމަޖެހިފައިވާ އިޖުރާއަތުގެ ތެރެއިން އެކަން ކުރަމުން އަންނަކަން އޭނާ ފާހަގަކުރެއްވި އެވެ.

ޕޯސްޓްމޯޓަމް ހެދުން މުހިންމުވާ ސަބަބެއްގެ ގޮތުގައި އޭނާ ވިދާޅުވީ:

"މިފަދަ އަމުރެއް ނެރެފި ނަމަަ، ޖިނާއީ ތަހުގީގަށް ވަރަށް ބޮޑަށް ހުރަސް އެޅިގެންދާނެ... އެފަދަ އަމުރެއް ނެރެދޭވެނެ ތަނެއް [ހާލަތެއް] އޮތް ކަމަށް ދިވެހި ފުލުހުންގެ ހިދުމަތުން ގަބޫލެއް ނުކުރަން،" އަބްދުﷲގެ ހަށިގަނޑު އާއިލާއާ ހަވާލުކޮށްދޭން އާއިލާއިން އެދުނު އަމުރާ ގުޅޭ ގޮތުން ޝިނާން ވިދާޅުވި އެވެ.

އާއިލާގެ ފަރާތުން ފުލުހުންނަށް ރައްދުވާ ގޮތަށް ހުށަހެޅި މި މައްސަލައިގެ ތެރެއަށް ޕީޖީ އޮފީހުން ވަނީ ތަދައްހުލްވެ، މިއަދުގެ އަޑުއެހުމުގައި އެންއައިސީ އާއި ފުލުހުންނަށް ބާރު ލިބޭ ގޮތަށް ވާހަކަ ދައްކައިފަ އެވެ.

އާއިލާގެ ވަކީލުން ދިފާއަކަށް ނެގި ފުލުހުންގެ ގާނޫނުގެ 97 ވަނަ މާއްދާ މާނަކުރާ ގޮތާއި ޖިނާއީ އިޖުރާއަތުގެ ގާނޫނާއި އެ ގާނޫނުގެ ދަށުން ހަދާފައިވާ، 'މަރުގެ މައްސަލަތައް ތަހުގީގު ކުރުމަށް ޕޯސްޓްމޯޓަމް ހެދުމުގައި އަމަލުކުރާނެ އިޖުރާއަތުތަކުގެ ގަވައިދު'ގެ ދަށުން ކޯޓު އަމުރެއް ނެތި ވެސް ޕޯސްޓްމޯޓަމް ހެދުމުގެ ބާރު ފުލުހުންނަށް މި ހާލަތުގައި އޮންނާނެ ކަމަށް ޕީޖީ އޮފީހުގެ ވަކީލުން ވިދާޅުވި އެވެ.

ފުލުހުންގެ ގާނޫނުގެ 97 ވަނަ މާއްދާގައިވާ ގޮތުން، ޕޯސްޓްމޯޓަމް ހަދަން ކޯޓު އަމުރެއް ބޭނުންވެ އެވެ. އެ މާއްދާގައި ބުނެފައި ވަނީ:

އާއިލާގެ ފަރާތުން ވަކާލާތު ކުރެއްވި ރާގިބާއި ވަކީލް މުހައްމަދު ޝަހުނީމް ވެސް އެ ނުކުތާ ނެންގެވި އެވެ.

ޝަހުނީމް ވިދާޅުވި ގޮތުގައި މި ހާލަތުގައި ޕޯސްޓްމޯޓަމް ހަދާ ނަމަ، ހަދަން ޖެހޭނީ ކޯޓު އަމުރެއްގެ ދަށުންނެވެ. 

ޕީޖީ އޮފީހުގެ ވަކީލް ފަރަހަނާޒް މުހައްމަދު ހަވާލާދެއްވީ ޖިނާއީ އިޖުރާއަތުގެ ގާނޫނުގެ 1-75 އާއި އެ މާއްދާގެ (ރ) އަށެވެ. އެ މާއްދާތަކުގައި ބުނަނީ:

މިދިޔަ މެއި މަހު ގެޒެޓް ކުރި އެ ގަވައިދުގެ ހަތަރު ވަނަ މާއްދާގައި ހަ ބާވަތެއްގެ މަރުގެ މައްސަލަތަކުގައި ޕޯސްޓްމޯޓަމް ހެދުމުގެ އިހްތިޔާރު ފުލުހުންނަށް ދީފައިވެ އެވެ.

ފަރަހަނާޒް ވިދާޅުވީ އެ ހަ ބާވަތުގެ ތެރޭގައި އިހުމާލުގެ އަމަލަކުން މީހަކު މަރުވެފައިވާ ކަމަށް ތުހުމަތުކުރެވޭ މައްސަލަތައް ވެސް ހިމެނޭ އިރު، ކޯޓު އަމުރެއް ނެތި ވެސް ގަވައިދުން ބާރު ލިބިގެން ފުލުހުންނަށް ޕޯސްޓްމޯޓަމް ހެދޭނެ ކަމަށެވެ.

ފަރަހަނާޒް އިތުރަށް ވިދާޅުވީ:

"އެހެންކަމުން ދައުލަތުން ދެކެނީ، އެފަދަ އަމުރެއް [އާއިލާއާ ހަށިގަނޑު ހަވާލުކުރުން] ނެރެދިނުމަކީ އަދުލު އިންސާފަށް ހުރަސް އެޅިގެންދާނެ ކަމެއް ކަމަށް. އަދި އެފަދަ އަމުރެއް ނެރެދެވޭނެ ތަނެއް ވެސް ނެތް ކަމަށް،" ފަރަހަނާޒް ވިދާޅުވި އެެވެ.

ޝަހުނީމް ވިދާޅުވީ އަބްދުﷲ މަރުވެފައިވަނީ ފުލުހުންގެ އިހުމާލުން ކަމަށް އާއިލާއިން ބުނަނީ، އެއީ ފުލުހުން އަދާކުރަން ޖެހޭ ޒިންމާއެއް އަދާނުކޮށްގެން އޭނާ މަރުވެފައިވާތީ އެކަމަށް ރިއާޔަތްކޮށް ކަމަށެވެ. އަދި ފަރަހަނާޒް ހަވާލާދެއްވި ޖިނާއީ އިޖުރާއަތުގެ މާއްދާގައި ފުލުހުންނަށް އެ ބާރު ލިބެނީ މަރާ ގުޅޭ ގޮތުން ސުވާލު އުފެދޭ ހާލަތުގައި ކަމަށް އޭނާ ފާހަގަކުރެއްވި އެވެ.

"ދައުލަތުން އެ ބުނާ ހާލަތެއް ނެތް. އޭނާ މަރުވީ، ހާމަ ތަނެއްގައި ގިނަ ބަޔަކު ތިބި ތަނެއްގައި. އާއިލާ އިން ނުބުނޭ އޭނާއަށް އަނިޔާކުރި ކަމަށް. އެހެން ބުނާ ނަމަ، ރަނގަޅު ޕޯސްޓްމޯޓަމް ހަދަން ނުވަތަ މަރާ މެދު ސުވާލު އުފައްދާ ނަމަ. އެކަމަކު އެ ހާލަތެއް ނެތް،" ޝަހުނީމް ވިދާޅުވި އެވެ.

"އަބްދުﷲ ރަޝީދު މަރުވެފައި ވަނީ ފަރުވާ ދިނުމަށް އެކަށީގެންވާ ވަގުތާއި އެ މާހައުލާއި ވަސީލަތްތައް ހުރެ، ފަރުވާއަށް ނުގެންދިޔުމުން."

އޭނާ ވިދާޅުވީ މިހާރު ވެސް ޑޮކްޓަރުގެ ރިޕޯޓުން އެނގޭ ގޮތުގައި އޭނާ މަރުވީ "ސަޑެން ކާޑިއެކް އެރެސްޓް" ނުވަތަ ކުއްލިއަކަށް ހިތް ހުއްޓިގެން ކަމަށެވެ. އަދި ހޮސްޕިޓަލަށް ގެންދިޔުމުގެ 30 މިނެޓް ކުރިން މަރުވެފައިވާކަން އެނގޭ ކަމަށް ވެސް އޭނާ ވިދާޅުވި އެވެ.

"އެހެންކަމުން ދެން އިތުރަށް ކޮން ކަމެއްތޯ ޕޯސްޓްމޯޓަމް އިން ސާފުވާނީ؟ ކޮން ހައިސިއްޔަތަކުންތޯ މިހާރު ވެސް އެއްވެސް އަމުރެއް ނެތި އޭނާގެ ހަށިގަނޑު މޯޗަރީގައި ބާއްވާފައި އެ އޮތީ؟" ޝަހުނީމް ސުވާލު އުފެއްދެވި އެވެ.

އޭނާ އިތުރަށް ވިދާޅުވީ:

ދެ ފަރާތުގެ ވާހަކަ އަޑު އެއްސެވުމަށް ފަހު، ގާޒީ ފަހީމް ވިދާޅުވީ ގާނޫނުގެ ދަށުން މިފަދަ މައްސަލަތަކުގައި ގޮތް ނިންމަން ޖެހޭނީ ގިނަވެގެން 14 ދުވަހުގެ ތެރޭގައި ކަމަށެވެ. އެހެންވެ، އޭގެ ކުރިން މައްސަލައިގައި ގޮތް ނިންމަވާނެ ކަމަށް އޭނާ ވިދާޅުވި އެވެ. އެހެން ވިދާޅުވުމުން ބަންޑާރަނައިބުގެ އޮފީހުގެ ވަކީލް ޝަނީން އެދިވަޑައިގަތީ ވީހާވެސް އަވަހަކަށް މިކަމުގައި ގޮތެއް ނިންމެވުމަށެވެ.

ޕީޖީގެ ވަކީލް ފަރަހަނާޒް ވިދާޅުވީ އަބްދުﷲގެ ޕޯސްޓްމޯޓަމް ހަދަން އަންނަ ހޯމަ ދުވަހު އޭނާގެ ހަށިގަނޑު ބޭރަށް ފޮނުވާލަން މަސައްކަތް ކުރަމުން އަންނަ ކަމަށެވެ. އެހެންވެ، އޭނާ އެދިވަޑައިގެންނެވީ އޭގެ ކުރިން ގޮތެއް ނިންމައިދިނުމަށެވެ.

ގާޒީ ފަހީމް ވިދާޅުވީ އޭގެ ކުރިން ގޮތެއް ނިންމޭތޯ މަސައްކަތްކުރައްވާނެ ކަމަށެވެ.

އަޑުއެހުމަށް ފަހު، 'ދައުރު'އާ ވާހަކަ ދައްކަމުން އާއިލާގެ މެންބަރުން ބުނީ ހޯމަ ދުވަހު ހަށިގަނޑު ބޭރަށް ފޮނުވާލާނެ ކަމަށް އާއިލާއަށް އަންގާފައި ނުވާ ކަމަށެވެ. އާއިލާއަށް އަދިވެސް އޭނާގެ މޫނު ދައްކާފައި ނުވާކަމުގެ ކަންބޮޑުވުން ވެސް ފާޅުކުރި އެވެ.

"ވަރަށް ބޮޑު ޝޮކެއް ލިބުނީ. އަޑުއެހުމުން މި އެނގުނީ ހޯމަ ދުވަހު ހަށިގަނޑު ގެންދާކަން،" އަބްދުﷲ ރަޝީދުގެ ކޮއްކޮ ނިޒާދާ މުހައްމަދު ބުންޏެވެ.

އަޑުއެހުމަށް ފަހު، ވަކީލުން ދެއްވި ނޫސްވެރިންގެ ބައްދަލުވުމުގައި ވެސް އާއިލާގެ އެ ކަންބޮޑުވުން ވަނީ ފާހަގަކޮށްފަ އެވެ.