ރަޝިޔާގެ ހަމަލާތަކުގައި ޔޫކްރެއިން ދެ ވަނަ ދުވަހަކަށް

އިނގިރޭސިވިލާތުގެ މަތިންދާ ބޯޓުތަކާއި އިނގިރޭސިވިލާތުގައި ރަޖިސްޓްރީކޮށްފައިވާ މަތިންދާ ބޯޓްތައް ރަޝިޔާގެ ވައިގެ ބަނދަރެއްގައި ޖެއްސުމާއި ރަޝިޔާގެ ވައިގެ ސަރަހައްދުން އުދުހުން މަނާކޮށްފި.

އޭގެ ފަހުން ބްރިޓިޝް އެއާވޭސްގެ ވެރިފަރާތް، އައިއޭޖީ އިން ބުނީ، އެ އެއާލައިންގެ ފްލައިޓްތައް މޮސްކޯއަށް ހުއްޓާލާފައިވާ ކަމަށް. އަދި އޭގެ ކުރިން އިނގިރޭސި ބޮޑުވަޒީރު ބޮރިސް ޖޯންސަންގެ އަމުރަށް ރަޝިޔާ ބޯޓުތައް އިނގިރޭސިވިލާތަށް ދިއުން ވަނީ މަނާކޮށްފައި.

ޔޫކްރެއިންގައި ތިބި ދިވެހި ދަރިވަރުންގެ ތެރެއިން އެ ގައުމުން ބޭރު ނުވެވި ތިބި ދަރިވަރުން ހަންގޭރީ މަގުން ރާއްޖެ ގެނައުމުގެ މަސައްކަތް ކުރަމުން އަންނަ ކަމަށް ފޮރިން މިނިސްޓްރީން މިއަދު ވަނީ ބުނެފައި.

ރަޝިޔާއިން ޔޫކްރެއިންއަށް އަރައިގަތްތާ ދެ ވަނަ ދުވަހަށް މިއަދު އިރުއެރި އިރު،  އެ ގައުމުގެ އެކި ހިސާބުތަކުގައި ދެކޮޅުން ގެންދަނީ ހަމަލާތައް ބަދަލުކުރަމުން.

ރަޝިޔާގެ މި އުދުވާނާ ދެކޮޅަށް އިގުތިސާދީ އަދި މާލީ ބޮޑެތި ފިޔަވަޅުތަކެއް ޔޫރަޕާއި އެމެރިކާ އިން ގެންދަނީ އަޅަމުން. އެގޮތުން އިނގިރޭސި ވިލާތުން އިއްޔެ އިއުލާންކުރި ފިޔަވަޅުތަކުގެ ތެރޭގައި ރަޝިޔާގެ އެތައް ބޭންކެއްގެ މިލްކިއްޔާތު ހިފެހެއްޓުމާއި މާލީ އެއްވެސް މުއާމާލާތްތަކެއް އެ ބޭންކްތަކާއި ނުކުރުމުގެ އިތުރުން ސިޔާސީ މީހުންނާއި ބައެއް ވިޔަފާރިވެރިންނާ ދެކޮޅަށް ފިޔަވަޅު އެޅުން ވެސް ހިމެނޭ.

ޔޫރަޕިއަން ޔޫނިއަނުން ސިފަކުރާ ގޮތުގައި މިއީ ދެ ވަނަ ބޮޑު ހަނގުރާމައަށް ފަހު ޔޫރަޕްގެ މިނިވަން ގައުމަކަށް އެހެން ގައުމަކުން އަރައިގަތް ފުރަތަމަ ފަހަރު. އަދި މި އުދުވާނުގައި ރަޝިޔާއަށް ގެއްލުމެއް ނުވާނެ ކަމަށް ހީކުރިޔަ ދީގެންނުވާނެ ކަމަށް ވެސް ޔޫރަޕުން ބުނޭ.

އީޔޫން ރޭ ނިންމި ދަތިކުރުމުގެ އެހެން ފިޔަވަޅުތަކުގެ ތެރޭގައި ތެލުގެ އުފެއްދުންތަކަށް ބޭނުންވާ ޓެކްނޮލޮޖީގެ އެއްވެސް ކަހަލަ މުއާމާލާތެއް ރަޝިޔާއާ ނުކުރުން ވެސް ހިމެނޭ. ރަޝިޔާއަކީ ތެލާއި ގޭހުގެ މައްޗަށް އިގުތިސާދު ބިނާވެފައިވާ ގައުމަކަށް ވަތީ، ކުރިއަށް އޮތް ތަނުގައި އެ ދާއިރާއަށް ބޭނންވާ ސާމާނު ޔޫރަޕުން ނުލިބުމަކީ، ރަޝިޔާއަށް ކުރިމަތިވާނެ ވަރަށް ބޮޑު ގެއްލުމަކަށް ވާނެ.

މި ސުވާލުގެ ޖަވަބަކީ ރަޝިޔާއާ މާ ގިނަ ދުވަހު ހަނގުރާމައެއް ކުރުމުގެ ބާރު އަސްކަރީ ގޮތުން ޔޫކްރެއިންގައި ނެތްކަން.

ދިފާއީ ދާއިރާގެ ތަޖުރިބާކާރެއް ކަމަށްވާ ޑރ. ޖެކް ވެޓްލިންކް ވިދާޅުވަނީ "ޔޫކްރެއިންގެ ރައްޔިތުން އެތިބީ ވަރަށް އުނދަގޫ ހާލަތެއްގައި" ކަމަށް.

ޔޫކްރެއިންގެ ސިފައިންގެ އަދަދަކީ 125،000. ރަޝިޔާއިން ޔޫކްރެއިންގެ ސަރަހައްދީ ރޮނގުތައް ކައިރީގައި މިހާރު ވެސް 200،000 އާ ގާތްކުރާ އަދަދަކަށް ރަޝިޔާ ސިފައިން އެބަ ތިބި.

ތަޖުރިބާކާރުން ބުނަނީ ޔޫކްރެއިންއަށް ރަޝިޔާއާ އެއްގޮތަކަށް ވެސް ވާދަނުކުރެވޭނީ ވައިގެ މަގުން ކަމަށް. ޔޫކްރެއިން އާއި ރަޝިޔާގެ ސަރަހައްދީ ރޮނގުތަކާ ކައިރީގައި ޔޫކްރެއިންގެ 105 ހަނުގާމަމަތީ މަތިންދާ ބޯޓު އޮތް އިރު ރަޝިޔާގެ އަދަދަކީ 300.

ވެޓްލިންކް ވިދާޅުވާ ގޮތުގައި ޔޫކްރެއިންގައި ނެތް އެންމެ މިޒަމާނީ ހަތިޔާރުން ރަޝިޔާގެ އަސްކަރީ ވަނީ ފުރިފައި. އެއަށް ޖަވާބު ދޭނެ އަސްކަރީ ރަނގަޅު ސަބަބުތަކެއް ޔޫކްރެއިންއަށް ލިބިފައެއް ނުވޭ. 

ހުރިހާ ކޮޅަކުން ޔޫކްރެއިންނަށް ރަޝިޔާއިން ކުއްލިއަކަށް އަރަމުން އެ ދަނީ، އަސްކަރީ ގޮތުން ވާދަކުރުމުގެ އެވަރުގެ ގާބިލްކަން ޔޫކްރެއިންގައި ނެތުމުން.

ރަޝިޔާ އިން ޔޫކްރެއިނަށް ދެމުން ގެންދާ ހަމަލާތަކުގައި ޔޫކްރެއިންގެ 70 އަސްކަރީ މަރުކަޒަކާއި 11 ވައިގެ މަރުކަޒެއް ހަލާކުކޮށްލައިފި ކަމަށް އޭއެފްޕީން ބުނެފި.

ޔޫކުރެއިންގައި ތިބި ދިވެހި ދަރިވަރުން އެ ގައުމުން ގެނައުމުގެ މަސައްކަތް ގައުމުތަކާ ގުޅިގެން ކުރަމުން އަންނަ ކަމަށް ރާއްޖޭގެ ފޮރިން މިނިސްޓްރީއިން ވަނީ ހާމަކޮށްފައި. ރަޝިޔާއިން ހަމަލާތައް ދިން ތިން ސިޓީގައި ތިބި ދިވެހި ދަރިވަރުންގެ ހާލު ރަނގަޅު ކަމަށް ފޮރިން މިނިސްޓްރީން ބުނޭ

ރަޝިޔާއަކީ އެއް ގައުމަކުން ރާއްޖެއަށް އެންމެ ގިނައިން ޓޫރިސްޓުން އަންނަ ގައުމަށްވާއިރު ޔޫކުރެއިން-ރަޝިޔާގެ ހަނގުރާމައިގެ ސަބަބުން ރާއްޖޭގެ ޓޫރިޒަމަށް ވަރަށް ބޮޑު ނޭދެވޭ އަސަރެއް ކުރުމުގެ ފުރުސަތު އެބަ އޮތް. ޔޫކުރެއިން އާއި ރަޝިޔާއަކީ ރާއްޖެއަށް މިހާރު އަންނަ ޓޫރިސްޓުންގެ %20. މި އަހަރު އެއް ގައުމަކުން އެންމެ ގިނަ ޓޫރިސްޓުން އައިސްފައި ވަނީ ރަޝިޔާއިން

ރަޝިޔާ އިން ޔޫކްރެއިނާ ދެކޮޅަށް ފަށާފައިވާ އުދުވާން ކުށްވެރިކުރަން ޗައިނާ އިން ދެކޮޅު ހަދައިފި. އޭގެ ބަދަލުގައި ދެ ފަރާތުން ވެސް މައްސަލަ އިތުރަށް ގޯސްވިޔަ ނުދިނުމަށް ގޮވާލި. މައްސަލަ އިތުރަށް ގޯސްކޮށްފައި ވަނީ އެެމެރިކާ އިން ކަމަށް ޗައިނާ އިން ވަނީ ތުހުމަތު ކޮށްފައި.

ރަޝިޔާގެ ގޮދަނުގެ އުފެއްދުންތައް އެތެރެކުރަން ފަށާނެ ކަމަށް ޗައިނާގެ ކަސްޓަަމްސް އެޑްމިނިސްޓްރޭޝަނުން މިއަދު ވަނީ އިއުލާނު ކޮށްފައި. ޗައިނާ އާއި ރަޝިޔާގެ ލީޑަރުން މި މަހު ކުރީ ކޮޅު ބައްދަލު ކޮށްފައިވާއިރު، ޗައިނާ އިން ވަނީ ރަޝިޔާއެކޭ އެއްގޮތަށް ނޭޓޯ ފުޅާ ކުރުމާ ދެކޮޅު ކަމަށް ބުނެފައި.

ރަޝިޔާ އިން ޔޫކްރެއިނާ ދެކޮޅަށް ފަށާފައިވާ އުދުވާނުގައި މިހާތަނަށް ބެލަރޫސްގެ އަސްކަރިއްޔާ އިން ބައިވެރިވެފައި ނުވި ނަމަވެސް، ބޭނުންވެއްޖެ ނަމަ ބެލަރޫސްގެ ސިފައިން ބައިވެރިވެދާނެ ކަމަށް ބެލަރޫސްގެ ލީޑަރު އެލެގްޒެންޑްރާ ލުކަޝެންކޯ ވިދާޅުވެއްޖެ.

ރަޝިޔާ އިން މިއަދު ޔޫކްރެއިނަށް އެރުމުން ގޮދަނުގެ އަގު މައްޗަށް ހިނގައްޖެ އެވެ. އެއީ އެމެރިކާގައި އުފައްދާ ޒުވާރި އާއި ގޮދަނުގެ ޑިމާންޑް ބޮޑުވުމާ ގުޅިގެން. އަދި ސޯޔާ ބީންސްގެ އަގު ވެސް 2012 އަށް ފަހު ނުދާ ވަރަށް މައްޗަށް ވަނީ ގޮސްފައި.

ރަޝިޔާއިން ޔޫކްރެއިނާ ދެކޮޅަށް ފަށާފައިވާ އަސްކަރީ އުދުވާނާ ގުޅިގެން، ރަޝިޔާއާ އެކު އޮތް ހާރިޖީ ގުޅުންތައް ރަސްމީކޮށް ކަނޑާލާފައިވާ ކަމަށް ޔޫކްރެއިނުގެ ރައީސް ޒެލެންސްކީ ވިދާޅުވެއްޖެ.

 ޔޫކްރެއިނުގެ އިރުމަތީ ޑޮންބާސް ސަރަހައްދުގައި އަސްކަރީ އޮޕަރޭޝަނެއް ހިންގުމަށް ރަޝިޔާގެ ރައީސް ލަޑިމިއާ ޕޫޓިން އިއުލާނު ކުރެއްވީ މިއަދު ހެނދުނު ރާއްޖެ ގަޑިން 7:55 ގައި.

ރަޝިޔާ ސިފައިން ޔޫކްރެއިނަށް ދެމުން ގެންދާ ހަމަލާތަކުގައި މިހާތަނަށް ޔޫކްރެއިންގެ ހަތް މީހަކު މަރުވެއްޖެ ކަމަށް ޔޫކްރެއިންގެ ފުލުހުން ބުނެފި.

ޔޫކްރެއިންގެ ވެރިރަށް ކީވްގެ އިތުރުން ބޯޑަރު ކައިރީގައި އޮންނަ ކާކީވްއަށް ރަޝިއާގެ މިސައިލް ހަމަލާތަކެއް އަރާފައިވާ ކަމަށްވޭ. ކާކީވްގައި ދިވެހި ފަސް ދަރިވަރުން އެބަތިބި.

އިތުރަށް ކިޔާލަން -