100 ކިލޯގެ ޑްރަގް މައްސަލައިގައި ބަންދުގައި ތިބި މީހުން. (ފޮޓޯ/ ޕޮލިސް)
ސަފާރީގައި ޑްރަގު ބަލާދިޔަ ކަމުގެ ހެކި ހުށަހަޅައިފި
އދ. ބޮޑުކާށިހުރާ ކިޔާ ފަޅުރަށެއްގައި ފޮރުވާފައި ހުއްޓާ ފުލުހުން ހޯދި 100 ކިލޯގެ ޑްރަގުގެ މައްސަލައިގައި ހައްޔަރުކުރި ދެ މީހަކު މަސްތުވާތަކެތި ބަލައި ސަފާރީގައި ދަތުރުކުރިކަމުގެ ހެކި ފުލުހުން ކޯޓަށް ހުށަހަޅައިފި އެވެ.
އެނގުން މުހިންމު - ރާއްޖެއަށް ކަނޑުމަގުން މަސްތުވާތަކެތި އެތެރެ ކުރަން އުޅޭ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން މިދިޔަ މަހުގެ 13ގައި ހިންގި އެ އޮޕަރޭޝަންގައި ފުރަތަމަ 10 މީހުން ހައްޔަރުކުރި އެވެ. ނަމަވެސް، މިހާރު ބަންދުގައި ތިބީ ފަސް މީހުންނެވެ.
ތަފްސީލް - އެ މައްސަލައިގައި މިހާރު ބަންދުގައި ތިބި މީހުންނަކީ:
-
ޖުމާން މުސްތަފާ (19އ.): ނ. ވެލިދޫ، ބީޗްހެވެން
-
މުހައްމަދު އަހްމަދު (34އ): ލ. ކަލައިދޫ، ޖަނަވަރީމާގެ
-
މުހައްމަދު ހުސައިން (61އ): ދ. ބަނޑިދޫ، ޕޮލަރިސް
-
އެމްޑީ ރަފީގުލް އިސްލާމް (35އ): ބަންގްލަދޭޝް
-
ޑީއެމް މޮބިން (24އ): ބަންގްލަދޭޝް
އެ މީހުންގެ ބަންދާ މެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރުކުރުމުން، އެމްޑީ ރަފީގުލް އިސްލާމްގެ ބަންދަށް ދިނީ ފަސް ދުވަހެވެ. ދެން ތިބި ހަތަރު މީހުންގެ ބަންދަށް 15 ދުވަސް ޖެހި އެވެ.
ބުނީ ކީކޭ؟ - ކްރިމިނަލް ކޯޓުގެ އަމުރުގައި ބުނީ ޖުމާން މުސްތަފާ އާއި މުހައްމަދު ހުސައިންއާ ދެކޮޅަށް ތުހުމަތުކުރެވޭ މިންވަރަށް ހެކި ލިބިފައިވާ ކަމަށެވެ. އެގޮތުން، މަސްތުވާތަކެތި ބަލާދިޔަ ސަފާރީގައި އެ މީހުން ދަތުރުކުރި ކަމަށް ބުނާ ފަރާތްތަކެއްގެ ބަޔާންތަކާއި ކޯލް ޑީޓެއިލްސް ލިބިފައިވާ ކަމަށް އަމުރުގައި ބުންޏެވެ.
ޖުމާން މުސްތަފާގެ އިތުރުން، އެ ސަފާރީގައި ޑީއެމް މޮބިން ވެސް ދަތުރުކުރި ކަމުގެ ހެކި ފުލުހުން ވަނީ ހުށަހަޅައިފަ އެވެ.
އިތުރަށް ކިޔާލަން -