100 ކިލޯ ޑްރަގް މައްސަލަ: އިތުރު ބޮޑަކު އެއްވެސް ޝަރުތެއް ނެތި ދޫކޮށްލައިފި

ފުލުހުން ހިންގި ބޮޑު އޮޕަރޭޝަނެއްގައި އަތުލައިގަތް 100 ކިލޯގެ މަސްތުވާތަކެއްޗާ ގުޅިގެން ހައްޔަރުކޮށް ބަންދުކުރި އެކަކު، އެއްވެސް ޝަރުތެއް ނެތި ބަންދުން ދޫކޮށްލައިފި އެވެ.

ވީ ކިހިނެއް؟ - މި މަހުގެ 13 ގައި މަސްތުވާތަކެތި އަތުލައިގަތީ ރާއްޖެއަށް ކަނޑުމަގުން އެ ތަކެތި އެތެރެކުރަން އުޅޭ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ޑްރަގް އެންފޯސްމަންޓް ޑިޕާޓްމަންޓާއި ޑްރަގް އިންޓެލިޖެންސް ޔުނިޓާއި މެރިން ޕޮލިސް ގުޅިގެން ހިންގި އޮޕަރޭޝަނެއްގަ އެވެ.

އެ މައްސަލައިގައި ފުލުހުން 10 މީހަކު ހައްޔަރުކުރި އެވެ. ނަމަވެސް އެ ނެޓްވޯކުގެ ބޮޑުން ކަމަށް ފުލުހުން ތުހުމަތުކުރާ ދެ މީހަކު ކޯޓުން ވަނީ ދޫކޮށްލައިފަ އެވެ. 

ތަފްސީލް - އެ މައްސަލައިގައި ހިމެނޭ މީހުންގެ ތެރެއިން މިއަދު ކްރިމިނަލް ކޯޓުން ދޫކޮށްލީ، ގއ. ދެއްވަދޫ، ދޭލިޔާގޭ މިދުހަތު އިބްރާހީމް، 26، އެވެ. މަސްތުވާތަކެތި އެތެރެކުރުމުގައި މިދުހަތު އިސްކޮށް އުޅުނުކަމަށް ފުލުހުން ތުހުމަތުކުރެ އެވެ. ފުލުހުން އެދުނީ އޭނާ 15 ދުވަހަށް ބަންދުކޮށްދިނުމަށެވެ.

ނަމަވެސް މިދުހަތު އިބްރާހީމް ދޫކޮށްލަން ކްރިމިނަލް ކޯޓުން މިއަދު ނެރުނު އަމުރުގައި ބުނީ:

ކްރިމިނަލް ކޯޓުން މިއަދު ނެރުނު އަމުރުގައި ބުނީ މިދުހަތުގެ މައްޗަށް ފުލުހުން ކުރާ ރާއްޖެއަށް މަސްތުވާތަކެތި އެތެރެކުރުމާއި މަސްތުވާތަކެތި ޓްރެފިކް ކުރުމުގެ ކުށަކީ ސީރިއަސް ތުހުމަތުތަކެއް ކަމަށެވެ. އަދި އޭނާއާ ދެކޮޅަށް ހެކީގެ ގޮތުގައި ފުލުހުން އިންޓެލިޖެންސް ރިޕޯޓެއް ހުށަހެޅި ކަމަށެވެ.

އެ މައްސަލަ ބެއްލެވި ގާޒީ ސޮފްއަތު ހަބީބު ވިދާޅުވީ ހަމައެކަނި އިންޓެލިޖެންސް ރިޕޯޓު ނުވަތަ ފުލުހުންނަށް ލިބޭ މައުލޫމާތަކީ ކޮންމެސް ވަރެއްގެ ހެކީގެ ގޮތުގައި ނުބެލޭނެ ކަމަށެވެ.

އިންޓެލިޖެންސް ރިޕޯޓުގައި އޮތީ ކީކޭ؟

ފުލުހުން ބުނީ އެ ރިޕޯޓާ ގުޅިގެން، މިދުހަތާއި މި މައްސަލައިގައި ދެން ތުހުމަތުކުރެވޭ މީހުންގެ ހާޒިރުގައި ފުލުހުން އދ. ބޮޑުކާށިހުރާ ބަލައިފާސްކުރިއިރު، އެ ރަށުން ފެނުނު ހަތް ގޯނީގައި މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި ބޮޑު 107 ރަބަރު ޕެކެޓު ފެނިފައިވާ ކަމަށެވެ.

ކޯޓުން ބުނީ ފުލުހުންގެ އޮޕަރޭޝަންގައި ގިނަ އަދަދެއްގެ މަސްތުވާތަކެތި ފެނުނުކަމާ މެދު އެއްވެސް މީހަކު ޝައްކު ނުއުފައްދާ ކަމަށެވެ.

"މިދުހަތު އިބްރާހީމްގެ ބަހަކީ ވެސް ފެނުނު މަސްތުވާތަކެއްޗާ އޭނާއާ އެއްވެސް ގުޅުމެއް ނެތް ކަމެވެ." އަމުރުގައިވެ އެވެ.

އިންޓެލިޖެންސް ރިޕޯޓުގެ އިތުރުން ސީނަށް ދިޔަ ފުލުހެއްގެ ބަޔާނާއި ބޮޑުކާށިހުރާ ބަލައިފާސްކުރުމާ ގުޅޭގޮތުން ބަޔާން ދިން މީހެއްގެ ބަޔާން ވެސް ހެކީގެ ގޮތުގައި ކޯޓަށް ހުށަހެޅި އެވެ. ނަމަވެސް ގާޒީ ވިދާޅުވީ އެ ދެ ބަޔާނުގައި ވެސް މިދުހަތު ކުށުގެ އަމަލުގައި އެއްވެސް މިންވަރަކަށް ބައިވެރިވިކަމަށް ބުނެފައި ނުވާކަމަށެވެ.

މިދުހަތުގެ ކުޑަކަމުދާ ތަކެތި މަސްތުވާތަކެއްޗަށް ޕޮޒިޓިވްވި ނަމަވެސް، އެއީ ކުރެވޭ ތުހުމަތާ ތަފާތުކަމެއް ކަމަށް ގާޒީ ވިދާޅުވި އެވެ.

ގާޒީ ވިދާޅުވީ މިދުހަތުގެ މައްޗަށް ކުރާ ތުހުމަތާ އޭނާއާ ގުޅުވޭ ހަމައެކަނި ކަމަކަށް އޮތީ، މި މައްސަލައިގައި ދެން ތުހުމަތުކުރެވޭ މީހަކާއެކު، މިދުހަތުގެ ނަން މަތީގައި ރަސްޖިސްޓްރީކޮށްފައިވާ ސައިކަލެއްގައި ގޮސް، ރައިވެރި ހިނގުން ގޯޅިއަށް ފައިބާ މަންޒަރު ފެންނަ ސީސީޓީވީ ފުޓޭޖެއް ކަމަށެވެ. އެ ފުޓޭޖުގައި މިދުހަތާއެކު ސައިކަލުގައި ދިޔަ މީހާ ވެސް ކޯޓުން ވަނީ ދޫކޮށްލައިފަ އެވެ. އޭނާއަކީ ވެސް ނެޓްވޯކުގެ ބޮޑެއް ކަމަށް ފުލުހުން ތުހުމަތު ކުރާ މީހެކެވެ.

ކޯޓުން ބުނީ މައްސަލައިގައި ދެން ބަންދުގައި ތިބި މީހުންނާ ދެކޮޅަށް ފުލުހުން އިތުރު ހެކި ހުށަހެޅި ނަމަވެސް، މިދުހަތާ ދެކޮޅަށް ހުށަހަޅާފައި ވަނީ ހަމައެކަނި އެ ފުޓޭޖު ކަމަށެވެ. ނަމަވެސް އެ ފުޓޭޖުގެ ވަގުތަކީ، މަސްތުވާތަކެތީގެ މައްސަލަ ހިނގުމުގެ މާ ކުރީގެ ފުޓޭޖެއްކަން ކޯޓުން ފާހަގަކުރި އެވެ.

ކޯޓުން އިތުރަށް ފާހަގަކުރި ކަންކަން:

"މިކަންކަން މިހެން ހުރުމުގެ ސަބަބުން، މިދުހަތު އިބްރާހީމްއަށް ތުހުމަތުކުރާ ކަންކަމުގައި އޭނާ ޖިނާއީ ހަރަކާތެއް ހިންގާކަން ސަބަބުވެރި މިންގަނޑަކުން ބަލާއިރު، ޝަރީއަތަށް ބުރަނުވެވެއެވެ." އަމުރުގައިވެ އެވެ.

މިދުހަތު އިބްރާހީމް އަކީ މީގެކުރިން ވެސް ޖިނާއީ ބޮޑެތި މައްސަލަތަކުގެ ހައްޔަރު/ބަންދު ރެކޯޑު ގިނަ ފަރާތެއްކަން އަމުރުގައި ފާހަގަކުރި އެވެ. ނަމަވެސް މިހާރު ކޯޓަށް ހުށަހަޅާފައި އޮތް މައްސަލައިގައި އޭނާ ކުށެއް ކުރި ކަމަށް ބެލެވޭނީ ފުލުހުންގެ ފަރާތުން ޝަރީއަތުގެ މަޖިލީހަށް ހުށަހަޅާ ހެކި ގަރީނާތަކުގެ މައްޗަށް ކަމަށް ގާޒީ ވިދާޅުވި އެވެ.

"ފުލުހުން ހުށަހަޅާ ހެކި ގަރީނާތަކުގައި ތުހުމަތެއް ކުރެވޭ މިންވަރަށް ހެކި ގަރީނާ ނެތްނަމަ ޝަރީއަތަށް އޭނާ ބަންދުނުކުރެވޭނެ" އަމުރުގައިވެ އެވެ.

މި މައްސަލައިގައި ގާތްގަނޑަކަށް 100 ކިލޯ މަސްތުވާތަކެތި ފެނިފައިވާއިރު، އެއީ އާންމުކޮށް ޓްރެފިކް ކުރާ ވަރަށް ވުރެ އެތައް ގުނައެއް ބޮޑު އަދަދެއްކަން ކޯޓުން ވެސް ފާހަގަކުރި އެވެ.

ފުލުހުން ހުށަހަޅާފައިވާ ލިޔުންތަކަށް ރިއާޔަތްކޮށް ކޯޓު އަމުރުގައި ބުނީ:

"ދިވެހިރާއްޖޭގެ ޖިނާއީ އަދުލުގެ ނިޒާމުގައި، މީހެއްގެ މައްޗަށް ކިތަންމެ ވަރުގަދަ ތުހުމަތެއް ކުރެވުނަސް، އެމީހަކާ ދެކޮޅަށް ހެކި ގަރީނާ ނެތް ނަމަ އެމީހަކު ބަންދުގައި ނުބެހެއްޓޭނެ އެވެ. އެއީ މިދުހަތު އިބްރާހީމަށް ވެސް ލިބިގެންވާ ހައްގެކެވެ." އަމުރުގައިވެ އެވެ.

ކްރިމިނަލް ކޯޓުން މިއަދު ބުނީ ޖިނާއީ މައްސަލަތަކުގައި މީހަކު ބަންދުގައި ބަހައްޓަން އެދެނީ ދައުލަތުން ނުވަތަ ގާނޫނު ތަންފީޒުކުރާ އިދާރާއިން ކަމަށެވެ. ޝަރީއަތުން ކުރާ ކަމަކީ އެ ހެކިތައް މިނެކިރައި، ގާނޫނާއި ގަވާއިދަށް ރިއާޔަތްކޮށް ބަންދުގައި ބަހައްޓަން ފެނޭތޯ ނުވަތަ ނޫންތޯ ކަނޑައެޅުން ކަމަށެވެ.

"ހެކި ގަރީނާ ނެތްނަމަ، ބަންދުގައި ބެހެއްޓުމަކީ ފަނޑިޔާރަށް ލިބިގެންވާ ބާރެއް ނޫނެވެ." އަމުރުގައިވެ އެވެ.

އެ އަމުރުގައި ބުނީ މިފަދަ މައްސަލަތަކުގައި ތުހުމަތުވާ މީހުން ދޫވުމުން، އާންމު މުޖުތަމައުގެ ކަންބޮޑުވުން ގިނަ ފަހަރަށް އަމާޒުވަނީ ކޯޓުތަކަށް ކަމަށެވެ. އެހެންކަމުން މީހަކު ބަންދުން ދޫވާނެ ހާލަތްތައް ވެސް އެ އަމުރުގައި ބަޔާންކޮށްފައިވެ އެވެ. އެއީ؛

އިތުރަށް ކިޔާލަން -

100 ކިލޯ ޑްރަގް: ބަންދުކުރި 8 މީހުންގެ ވަނަވަރު އާންމުކޮށްފި