ދައުލަތުން އެދުނީ ޔާމީންގެ މުއްދަތު ހަމަވެފައިވާ 2 ޕާސްޕޯޓު ހިފަހައްޓަން؛ އަމުރެއް ނުދިން

މަނީ ލޯންޑްރިން އާއި ރިޝްވަތުގެ ތުހުމަތު އަދިވެސް ކުރެވޭ ކުރީގެ ރައީސް އަބްދުﷲ ޔާމީން ފިއްލަވާފާނެ ކަމުގެ ހެކި ލިބިފައިވާ ކަމަށް ބުނެ، އެ މަނިކުފާނުގެ މުއްދަތު ހަމަވެފައިވާ ދެ ޕާސްޕޯޓު ހިފަހައްޓަން ދައުލަތުން އެދުމުން އެފަދަ އަމުރެއް ނެރެދެވެން ނެތް ކަމަށް ކްރިމިނަލް ކޯޓުން މިއަދު ހުކުމް ކޮށްފި އެވެ.

ވީ ކިހިނެއް؟ - ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން ޔާމީންގެ މައްޗަށް ކުރާ މަނީ ލޯންޑްރިން އާއި ރިޝްވަތު ގަބޫލުކުރުމުގެ ދައުވާގެ ޝަރީއަތް އެއްކޮށް ނިމެންދެން، ޔާމީންގެ ޕާސްޕޯޓު ހިފެހެއްޓުމުގެ އަމުރަކަށް ދައުލަތުން ވަނީ އެދިފަ އެވެ. 

އެކަމާ ގުޅިގެން ދެ ފަރާތުން ވާހަކަދެއްކުމަށް މިއަދު ހެނދުނު ކްރިމިނަލް ކޯޓުގައި ވަނީ އަޑުއެހުމެއް ބާއްވައިފަ އެވެ. އެ އަޑުއެހުމުގައި ދައުލަތުގެ ވަކީލު އާމިނަތު ޝާމާ ނަސީރު ވިދާޅުވީ ޔާމީން ފުރުން މަނާކުރުމުގެ އަމުރަކަށް ދައުލަތުން އެދުނީ، ޖިނާއީ އިޖުރާއަތުގެ ގާނޫނުގެ 75 ވަނަ މާއްދާގެ (ރ) ގައި ބުނާ ކަންކަން ފުރިހަމަވާތީ ކަމަށެވެ. އެ މާއްދާގައި ބުނާ ކަންތައްތަކީ:

ޔާމީން ފިއްލަވާފާނެ ކަމުގެ ހެކި ލިބިފައިވާ ކަމަށް، ސުޕްރީމް ކޯޓުގެ ގަޒިއްޔާއަކާ ހަވާލާދެއްވައި، ވަކީލު ވިދާޅުވި ސަބަބުތަކަކީ:

ތަފްސީލް - ޔާމީންގެ ވަކީލު އަބްދުﷲ ޝިޔާޒް ވިދާޅުވީ ޔާމީން ރާއްޖޭން ބޭރަށް ވަޑައިގަންނަވަން އެއްވެސް މަސައްކަތެއް ކުރައްވާފައި ނުވާ ކަމަށާއި، އަދި ކޯޓަށް ހާޒިރުވެވަޑައިގަންނަވަން މިހާތަނަށް ކުރި އެއްވެސް އަމުރަކާ ވެސް ހިލާފުވެވަޑައިގެންފައި ނުވާ ކަމަށެވެ. އެހެންކަމުން، އެ ކަންކަމަށް ފަނޑިޔާރު ރިއާޔަތްކޮށްދެއްވަން އެދިވަޑައިގަތެވެ.

ޔާމީން އަތުގައި މިވަގުތު "ވެލިޑް" ޕާސްޕޯޓެއް ނެތް ކަމަށާއި އެ ހާލަތުގައި ޕާސްޕޯޓު ހިފެހެއްޓުމުގެ އަމުރެއް ނެރެވިދާނެތޯ ވެސް ދިފާއީ ވަކީލު ސުވާލު އުފެއްދެވި އެވެ.

ދައުލަތުން ހުށަހެޅި ފޯމުގައި ހިމަނާފައި ވަނީ މުއްދަތު ހަމަވެފައިވާ "އިންވެލިޑް" ޕާސްޕޯޓަކާއި އިމިގްރޭޝަންގެ ބެލުމުގެ ދަށުގައި އޮންނަ ޕާސްޕޯޓެއް ކަމަށާއި އެ ދެ ޕާސްޕޯޓު ހިފަހައްޓައިގެން ނުކުންނާނެ ގާނޫނީ ނަތީޖާއެއް ވެސް ނެތް ކަމަށް ވަކީލު ވިދާޅުވި އެވެ.

ޔާމީނަކީ ރާއްޖޭން ފިލައިގެން ބޭރުގައި ދިރިއުޅެވޭނެ މާލީ ތަނަވަސްކަމާއި "ކަނެކްޝަންސް" ހުރި ބޭފުޅެއް ކަމަށް ބުނެ ދައުލަތުން ވަނީ އެ މަނިކުފާނުގެ ބޭންކު ސްޓޭޓްމަންޓުތައް ވެސް ހުށަހަޅައިފަ އެވެ. ދައުލަތުގެ އެ ވާހަކައަށް ރައްދު ދެއްވައި ވަކީލް ޝިޔާޒް ވިދާޅުވީ، އެކައުންޓުގައި ފައިސާ ހުރި ކޮންމެ މީހަކީ ފިލައިގެން ދާން އުޅޭ މީހެއް ކަމަށް ބަލަންޏާ ރާއްޖޭގައި ތިބީ މުޅިން ވެސް ފިލައިގެން އުޅޭނެ މީހުން ކަމަށެވެ.

ހަމަ އެއާ އެކު، އަދީބަކީ ޔާމީންގެ ބައިވެރިއެއް ނޫން ކަމަށާއި އަދީބު ޓަގު ބޯޓެއްގައި ފިއްލެވީ ވެސް ޕާސްޕޯޓު ބޭނުންކުރައްވައިގެން ނޫން ކަމަށް ވަކީލު ވިދާޅުވި އެވެ.

"[ޔާމީނަކީ] ފިލައިގެން ދާނެ ނުވަތަ ކޯޓަށް ހާޒިރުވާން ފަސް ޖެހޭނެ ފަރާތެއް ނޫން. ކޯޓުން ހަމަ ކިޔާ ކޮންމެ ގަޑިއަކަށް މިހާތަނަށް އޮތީ ހާޒިރުވެފައި. ކޯޓުން ފޮނުވި އެއްވެސް ޗިޓަކަށް ހާޒިރު ނުވެ އޮތް ފަރާތެއް ނޫން އަދި ފިލައިގެން އުޅެފައިވާ ފަރާތެއް ވެސް ނޫން،" ވަކީލު ވިދާޅުވި އެވެ.

އެހެންކަމުން، ޝަރީއަތް ނިމެންދެން ޔާމީންގެ ޕާސްޕޯޓު ހިފަހައްޓަން އަމުރެއް ނެރެން ޖެހޭ ގާނޫނީ އެއްވެސް އަސާސެއް ނެތް ކަމަށާއި، އެކަމުން ހާސިލްވާނެ ގާނޫނީ ނަތީޖާއެއް ނެތް ކަމަށް ވެސް ވަކީލު ވިދާޅުވި އެވެ.

ޔާމީންގެ ދިފާއީ ވަކީލުން ފާހަގަކުރެއްވި ކަންތައްތަކާ ގުޅިގެން ދައުލަތުގެ ވަކީލު ޝާމާ ވިދާޅުވީ ޔާމީނަކީ މިހާރު މިނިވަނެއް ކަމަށާއި އެހެންކަމުން ކޮންމެ ވަގުތެއްގައި ވެސް ޕާސްޕޯޓު އާކުރެއްވޭނެ ކަމަށެވެ.

"އެހެންކަމަށް ވާ ނަމަ ދައުލަތަށް ގަބޫލުކުރެވެނީ އިމިގްރޭޝަންގެ މައްޗަށް އަބްދުﷲ ޔާމީން އަބްދުލްގައްޔޫމް ރާއްޖޭން ފުރައިގެން ދިއުން މަނާކުރުމުގެ އަމުރެއް އަދިވެސް ނެރުއްވިދާނެ ކަމަށް،" ވަކީލު ވިދާޅުވި އެވެ.

ދައުލަތަށް ރައްދު ދެއްވައި، ޔާމީންގެ ދިފާއީ ވަކީލުކަން ކުރައްވާ ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު ވަނީ ޔާމީން ފުރުން މަނާކުރުމުގެ އަމުރެއް ދައުލަތުން ހޯދީ، ޔާމީންގެ މައްޗަށް ކުށް ސާބިތު ނުވާ ކަމަށް ސުޕްރީމް ކޯޓުން ހުކުމް ކުރި ދުވަހު ކަމަށާއި އެހެންކަމުން މިކަމުގައި "ނުބައި ނިޔަތެއް" އޮތްކަން ސާފުވާ ކަމަށެވެ.

"ކޮން ކަމެއްތޯ ނުވެގެން މި އުޅެނީ؟ ހަމަ ހަގީގަތުގައި ވެސް މީހަކު ކޯޓަށް ހާޒިރު ނުވެގެންތޯ؟ ނޫން،" ޖަމީލް ސުވާލު އުފެއްދެވި އެވެ.

ޖަމީލް ވެސް ވިދާޅުވީ ކޯޓަށް ހާޒިރުވާން ޔާމީނަށް އެންގި ކޮންމެ ވަގުތަކު ކޯޓަށް ހާޒިރުވެވަޑައިގެންފައިވާ ކަމަށެވެ. އެހެންކަމުން، ޔާމީންގެ ޕާސްޕޯޓު ހިފެހެއްޓުމުގެ އަމުރެއް ނެރުމުގެ ބޭނުމެއް ނެތް ކަމަށެވެ.

"ފިލައިގެން ދާން އެއްވެސް ކަމެއް ނުކުރައްވާ. އެފަދަ ނިޔަތެއް ވެސް ނެތް،" ޖަމީލް ވިދާޅުވި އެވެ.

ޔާމީންގެ ބަސް - ދިފާއީ ވަކީލުންގެ ވާހަކައަށް ފަހު ކޮޅަށްތެދުވެވަޑައިގެން ޔާމީން ވިދާޅުވީ، މިފަދަ އަމުރަކާ ގުޅިގެން ގޮތެއް ނިންމާއިރު، މީގެ ކުރިން އެ މަނިކުފާނު އަމަލުކުރައްވާފައިވާ ގޮތަށް ފަނޑިޔާރު ބައްލަވަން ވާނެ ކަމަށެވެ. އެގޮތުން ގއ. ވޮޑަމުލާ މައްސަލައިގައި 2019ގެ ކުރީކޮޅުން ފެށިގެން އެ އަހަރުގެ ނޮވެމްބަރު 28އާ ހަމައަށް ވެސް އެ މަނިކުފާނު ފުރައިގެން ނުވަތަ ފިލައިގެން ތަނަކަށް ވަޑައިގަންނަވަން ކުރި މަސައްކަތެއް ފެންނަން އެބަ އޮތްތޯ ޔާމީން ސުވާލު އުފެއްދެވި އެވެ.

"އެ އޮތީ ދިގު މުއްދަތެއްގައި އަޅުގަނޑު އަމަލުކުރި އުސޫލު ފެންނަން. އޭރު އަޅުގަނޑުގެ މައްޗަށް ހުކުމެއް ވެސް ނެތް. ހަމަ މިނިވަނެއްގެ ގޮތުގައި ހުރެގެން ކޯޓަށް ހާޒިރުވަމުން ދިޔައީ،" ޔާމީން ވިދާޅުވި އެވެ.

ގާޒީގެ ސުވާލު - ދިފާއުގެ ވާހަކަތަކާ ގުޅިގެން ކްރިމިނަލް ކޯޓުގެ އިސް ގާޒީ އަހްމަދު ޝަކީލް ވަނީ ދައުލަތުން ބައެއް ކަންކަން ސާފުކުރައްވައިފަ އެވެ. އެގޮތުން، ދައުލަތުން ހިފަހައްޓަން ބޭނުންވާ ދެ ޕާސްޕޯޓުގެ މުއްދަތު ހަމަވެފައިވާކަން ދައުލަތަށް ފާހަގަކުރެވިފައިވޭތޯ ގާޒީ ސުވާލުކުރެއްވި އެވެ.

ދައުލަތުގެ ވަކީލު ވިދާޅުވީ އެކަން އެނގޭ ކަމަށާއި، ނަމަވެސް ޕާސްޕޯޓަކީ ކޮންމެ އިރެއްގައި ވެސް އާކުރެވޭނެ އެއްޗެއް ކަމަށެވެ. އަދި މުއްދަތު ހަމަވެފައިވާ ޕާސްޕޯޓަކީ ބާތިލް އެއްޗެއް ކަމަށާއި އެފަދަ ޕާސްޕޯޓެއްގައި ފުރައިގެން ނުދެވޭނެ ކަމަށް ވެސް ވަކީލު ވިދާޅުވި އެވެ.

ވަކީލު ވިދާޅުވީ ޕާސްޕޯޓުތައް މުއްދަތު ހަމަވެފައި ވީ ނަމަވެސް، މި އަމުރުގެ މަގުސަދަކީ ޔާމީން ރާއްޖެ ދޫކޮށް ދިއުން މަނާކުރުން ކަމަށާއި، އެހެންކަމުން އަމުރު ނެރެދީފި ނަމަ އެ މަގުސަދު ހާސިލްވާނެ ކަމަށެވެ.

އޭގެ އިތުރުން، މި ބާވަތުގެ ހުރިހާ މައްސަލައެއްގައި ހިމެނޭ އެންމެންގެ ޕާސްޕޯޓު ހިފަހައްޓަން އެދިފައިވޭތޯ ވެސް ގާޒީ ސުވާލުކުރެއްވި އެވެ. ދައުލަތުގެ ވަކީލު ވިދާޅުވީ، މައްސަލަތަކުގެ ކުޑަ ބޮޑު މިނަށް ބަލައި، ގިނަ މައްސަލަތަކެއްގައި ޕާސްޕޯޓު ހިފަހައްޓަން އެދުނު ނަމަވެސް ހުރިހާ މައްސަލައެއްގައި އެފަދަ އަމުރަކަށް އެދިފައި ނުވާނެ ކަމަށެވެ.

ނިންމުން - ކްރިމިނަލް ކޯޓުން އެ މައްސަލައިގައި ނެރުނު އަމުރުގައި ބުނީ:

ގުޅުންހުރި ކަމެއް - ޖިންސީ ކުށުގެ ހަތް ދައުވާއެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ފުރުން މަނާކުރުމުގެ އަމުރަކަށް އެދި ދައުލަތުން ހިފަހައްޓަން އެދުނީ ވެސް ކެންސަލް ކޮށްފައި އޮތް ޕާސްޕޯޓެކެވެ. ކެންސަލްކޮށްފައިވާ ޕާސްޕޯޓެއް ހިފަހައްޓަން ކޯޓުން އަމުރު ނެރެންޖެހޭނެ ސަބަބެއް ނެތް ކަމަށާއި، އަދި އެ އަމުރަކުން ނެރެވޭނެ ގާނޫނީ ނަތީޖާއެއް ނެތް ކަމަށް ހައި ކޯޓުން އޮތީ ބުނެފަ އެވެ.

އިތުރަށް ކިޔާލަން -