215 ކިލޯގެ ޑްރަގުގެ މައްސަލައިގައި ހައްޔަރުކުރި ދެ މީހުން، (ފޮޓޯ/ ފުލުހުން)
215 ކިލޯގެ ޑުރަގް: 2 މީހެއްގެ މައްޗަށް ދައުވާ އުފުލައިފި
މިދިޔަ އޮކްޓޫބަރު މަހުގެ 15ގައި ފަޅު ރަށެއްގައި ފޮރުވާފައި ހުއްޓައި ފުލުހުން އަތުލި 215 ކިލޯގެ މަސްތުވާތަކެތީގެ މައްސަލައިގައި ހައްޔަރުކުރި ދެ މީހުންގެ މައްޗަށް ދައުވާކުރުމަށް ރ. މަޑުއްވަރީ މެޖިސްޓްރޭޓް ކޯޓަށް ހުށަހަޅައިފި އެވެ.
ވީ ކިހިނެއް؟ - ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) އާއި ޑްރަގު އިންޓެލިޖެންސް ޔުނިޓާއި މެރިން ޕޮލިސް އަދި ރ. އަތޮޅު ޕޮލިސް ގުޅިގެން ހިންގި އޮޕަރޭޝަނެއްގައި އެ ޑްރަގުތައް އަތުލައިގަތީ ރ. ރާނބުގަލީގައި ހުރި ކަށިކެޔޮގަހެއްގެ ތެރޭގައި ފޮރުވާފައި ހުއްޓަ އެވެ.
އެ އޮޕަރޭޝަންގައި ފުލުހުން ދެ މީހަކު ހައްޔަރުކުރި އެވެ. އެ ދެ މީހުން ފުލުހުން ހައްޔަރުކުރީ "ފެށުން 2" ކިޔާ ލޯންޗެއްގައި ރ. މަޑުއްވަރިއަށް ވަތް ވަގުތު އެ ލޯންޗު ހުއްޓުވައި ބަލައި ފާސްކުރުމަށް ފަހު އެވެ.
އެ މައްސަލައާ ގުޅިގެން ހައްޔަރުކޮށްފައި ވަނީ:
-
އަލީ ޝާކިރު (42އ): ރ. މަޑުއްވަރީ، ފިނިފަރު
-
ނިމާލް އަބްދުލްހާރިސް (33އ): މަޑުއްވަރި، ފެހިއަލި
ތަފްސީލް - ޕްރޮސެކިއުޓަ ޖެނެރަލް އޮފީހުގެ މީޑިއާ އޮފިސަރު، ޕަބްލިކް ޕްރޮސެކިއުޓާ އަހްމަދު ޝަފީއު ވިދާޅުވީ އެ މައްސަލައިގައި ދައުވާކުރަން ފޮނުވީ ޑިސެމްބަރު 19 ވަނަ ދުވަހު ކަމަށެވެ. ދެމީހުންގެ މައްޗަށް އުފުލީ ޑައިމޯފިން ޓްރެފިކްކުރުމުގެ ކުށުގެ ދައުވާ އެވެ. މައްސަލައިގައި ހިމެނޭ އަލީ ޝާކިރުގެ މައްޗަށް ވަނީ ކުޑަކަމުދާއެއްޗެހި ދިނުމަށް އިންކާރުކުރުމުގެ ކުށުގެ ދައުވާ ވެސް ހުށަހަޅައިފަ އެވެ.
ހައްޔަރުކުރި ދެމީހުން ވެސް ތިބީ ކްރިމިނަލް ކޯޓުގެ އަމުރެއްގެ ދަށުން ޝަރީއަތް ނިމެންދެން ބަންދުކޮށްފަ އެވެ.
އެންގުން މުހިންމު - އެ އޮޕަރޭޝަންގައި އަތުލައިގަތް 215 ކިލޯގެ ޑްރަގަކީ ރާއްޖެ އެތެރެކުރަން ގެނައި މަސްތުވާތަކެތި ކަމަށް ނުބެލެވޭ ކަމަށް ފުލުހުން މީގެ ކުރިން ވަނީ ބުނެފަ އެވެ. އެއީ މިހާތަނަށް ފުލުހުންގެ އޮޕަރޭޝަނެއްގައި އެއްފަހަރާ އަތުލައިގަތް އެންމެ ގިނަ އަދަދެއްގެ މަސްތުވާތަކެއްޗެވެ. އޭގެ ކުރިން އެންމެ ގިނައިން އަތުލައިގެންފައި ވަނީ ގދ. އަތޮޅުގެ ފަޅުރަށެއްގައި ފޮރުވާފައި ހުއްޓާ 149 ކިލޯގެ ޑްރަގެވެ.
އިތުރަށް ކިޔާލަން -