215 ކިލޯގެ ޑްރަގުގެ މައްސަލައިގައި ހައްޔަރުކުރި ދެ މީހުން.
215 ކިލޯގެ ޑްރަގުގެ ތުހުމަތުކުރެވޭ މީހުންގެ ވަނަވަރު ހާމަކޮށްފި
މިދިޔަ ހުކުރު ދުވަހު ފުލުހުން އަތުލައިގަތް 215 ކިލޯގެ ޑްރަގު މައްސަލައިގައި ހައްޔަރުކުރި މީހުންގެ ވަނަވަރު ފުލުހުން މިއަދު ހާމަކޮށްފި އެވެ.
ތަފްސީލް - އެ މައްސަލައާ ގުޅިގެން ހައްޔަރުކޮށްފައި ވަނީ:
-
އަލީ ޝާކިރު (42އ): ރ. މަޑުއްވަރީ، ފިނިފަރު
-
ރ. ނިމާލް އަބްދުލްހާރިސް (33އ): މަޑުއްވަރި، ފެހިއަލި
ބުނީ ކީކޭ؟ - އެ މީހުންގެ ވަނަވަރު އާންމުކޮށް، ފުލުހުން ބުނީ އެ ދެ މީހުންގެ ބަންދަށް 15 ދުވަސް ކޯޓުން ޖަހައިދީފައިވާ ކަމަށެވެ.
ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) އާއި ޑްރަގު އިންޓެލިޖެންސް ޔުނިޓާއި މެރިން ޕޮލިސް އަދި ރ. އަތޮޅު ޕޮލިސް ގުޅިގެން ހިންގި އޮޕަރޭޝަނެއްގައި އެ ޑްރަގުތައް އަތުލައިގެންފައި ވަނީ ރ. އަތޮޅުގެ ފަޅުރަށެއްގައި ފޮރުވާފައި ހުއްޓަ އެވެ.
އެންގުން މުހިންމު - މި އޮޕަރޭޝަންގައި އަތުލައިގަތް 215 ކިލޯގެ ޑްރަގަކީ މިހާތަނަށް ފުލުހުންގެ އޮޕަރޭޝަނެއްގައި އެއްފަހަރާ އަތުލައިގަތް އެންމެ ގިނަ އަދަދެއްގެ މަސްތުވާތަކެއްޗެެވެ. އޭގެ ކުރިން އެންމެ ގިނައިން އަތުލައިގެންފައި ވަނީ ގދ. އަތޮޅުގެ ފަޅުރަށެއްގައި ފޮރުވާފައި ހުއްޓާ 149 ކިލޯގެ ޑްރަގެވެ.
ފަސް މަންޒަރު - މިދިޔަ ހުކުރު ދުވަހު 215 ކިލޯގެ ޑްރަގު އަތުލައިގަތް އިރު، މިިދޔަ ބުރާސްފަތި ދުވަހު ހިންގި އޮޕަރޭޝަނެެއްގައި 10 ތަނެއް ބަލައި ފާސްކޮށް، 100 ކިލޯގެ މަސްތުވާތަކެތި އަތުލައިގެންފައިވެ އެވެ.
އެ މައްސަލައިގައި 10 މީހުން ހައްޔަރު ކުރި އިރު، އަށް މީހުންގެ ބަންދުގެ މުއްދަތު ވަނީ ޖަހާފަ އެވެ. ނަމަވެސް، އެ މައްސަލައިގައި ހިމެނޭ އިސް މީހުން ކަމަށް ތުހުމަތުކުރެވޭ ދެ މީހަކު ވަނީ ކޯޓުން ދޫކޮށްލާފަ އެވެ.
މިއީ ތަފާތު ދެ ނެޓްވޯކެއް ކަމެއް ނުވަތަ ނޫން ކަމެއް ފުލުހުން މިހާތަނަށް ބުނެފައެއް ނުވެ އެވެ.